ପାହାନ୍ତିଆ କଟକ ଟୁର୍ ରେ ପୁଣି ପାଣ୍ଡିଆନ୍

ଭୁୁବନେଶ୍ୱର: କଟକ ଏସସିବି ମେଡ଼ିକାଲ୍ କଲେଜ ଏବଂ ହସ୍ପିଟାଲ୍(ଏସସିବି)ର ପ୍ରସ୍ତାବିତ ଦ୍ୱିତୀୟ କ୍ୟାମ୍ପସ୍ ଅଞ୍ଚଳକୁ ଆଜି ବୁଲି ଦେଖିଛନ୍ତି ୫-ଟି ସଚିବ ଭି.କେ.ପାଣ୍ଡିଆନ୍ । ଭୋର୍ ୫ଟା ୧୫ ମିନିଟ୍ ରେ ଶ୍ରୀ ପାଣ୍ଡିଆନ୍, ପୂର୍ତ୍ତ ସଚିବ ଡ. କ୍ରିଷନ୍ କୁମାର ଏବଂ ଅନ୍ୟାନ୍ୟ ଅଧିକାରୀମାନେ ମହାନଦୀର ହାଡ଼ିଆ ପଠା ଓ ସିସୋର ପଠା ଅଞ୍ଚଳ ପରିଦର୍ଶନ କରିଥିଲେ । ମେରିଟାଇମ୍ ମ୍ୟୁଜିୟମ୍ ଠାରେ ବିଭାଗୀୟ ଅଧିକାରୀମାନଙ୍କ ସହ ବୈଠକ କରି ଦ୍ୱିତୀୟ କ୍ୟାମ୍ପସ୍ ରୂପରେଖ ସମ୍ପର୍କରେ ଆଲୋଚନା କରିଥିଲେ ।

ଏଥିସହ ନୌବାଣିଜ୍ୟ ସଂଗ୍ରହାଳୟ ପରିଦର୍ଶନ କରିଥିଲେ । ମହାନଦୀ ପଠାରେ ପର୍ଯ୍ୟଟନର ବିକାଶ ଲାଗି କ’ଣ କରାଯାଇପାରିବ ତାହା ଅନୁଧ୍ୟାନ କରିଥିଲେ । ଆରଡିସି, କଟକ ଜିଲ୍ଲାପାଳ, ଏସପିଙ୍କ ସମେତ ଜଳସମ୍ପଦ ଓ ପୂର୍ତ୍ତ ବିଭାଗର ବରିଷ୍ଠ ଅଧିକାରୀମାନେ ପାଣ୍ଡିଆନ୍ ଙ୍କ ବୈଠକରେ ଉପସ୍ଥିତ ଥିଲେ ।

ପାହାନ୍ତା ପହରରେ ୫-ଟି ସଚିବଙ୍କର ପୁନର୍ବାର ଏହି ତୋଫାନୀ ଗସ୍ତକୁ ନେଇ କଟକ ଜିଲ୍ଲା ପ୍ରଶାସନ ଏବଂ ସାଧାରଣରେ ବେଶ୍ ଚର୍ଚ୍ଚା ହେଉଛି ।

ପୂର୍ବରୁ ଗତ ନଭେମ୍ବର ୬ ତାରିଖ ରାତି ପାହିବା ପୂର୍ବରୁ ପାଣ୍ଡିଆନ୍ ଅଚାନକ କଟକ ଏସସିବିରେ ପହଞ୍ଚି ବିଭିନ୍ନ ୱାର୍ଡ ବୁଲିବା ସହ ରୋଗୀସେବା ବ୍ୟବସ୍ଥାର ତଦାରଖ କରିଥିଲେ । ମେଡ଼ିକାଲ୍ ବିଲଡିଂ ଏବଂ ଖେଳ ପଡ଼ିଆ ବୁଲି ଭିତ୍ତିଭୂମି ଅନୁଧ୍ୟାନ କରିଥିଲେ । ସାଙ୍ଗରେ ଥିଲେ ପୂର୍ତ୍ତ ସଚିବ ଡ. କ୍ରିଷନ୍ କୁମାର, ସ୍ୱାସ୍ଥ୍ୟ ସଚିବ ଡାକ୍ତର ପ୍ରମୋଦ ମେହେର୍ଦ୍ଦା, ଜାତୀୟ ସ୍ୱାସ୍ଥ୍ୟ ମିଶନ୍ ନିର୍ଦ୍ଦେଶିକା ଶାଳିନୀ ପଣ୍ଡିତଙ୍କ ସମେତ ଅନ୍ୟାନ୍ୟ ଅଧିକାରୀବୃନ୍ଦ ।

ସେଦିନ ସଂଧ୍ୟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକସେବା ଭବନରେ ଏକ ଉଚ୍ଚସ୍ତରୀୟ ବୈଠକରେ ଆଲୋଚନା କରି ଏସସିବି ପାଇଁ ୧ ହଜାର କୋଟିରୁ ଅଧିକ ଟଙ୍କାର ପ୍ୟାକେଜ୍ ଘୋଷଣା କରିଥିଲେ । ଦେଶର ଶ୍ରେଷ୍ଠ ଚିକିତ୍ସା ସେବା ଅନୁଷ୍ଠାନ ସହିତ ଏସସିବିକୁ ସମକକ୍ଷ କରିବାକୁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେବା ସହ ଏସସିବିକୁ ଏମସ୍ ପ୍ଲସ୍ ଅନୁଷ୍ଠାନ ଭାବେ ଗଢ଼ିବାକୁ ଘୋଷଣା କରିଥିଲେ ।

ଚଳିତ ମାସ ୯ ତାରିଖରେ ପାଣ୍ଡିଆନ୍ ଓ ଟିମ୍ ବଡ଼ି ଭୋର୍ ରୁ କୋଣାର୍କରେ ପହଞ୍ଚି ସୂର୍ଯ୍ୟମନ୍ଦିର ଓ ଏହାର ଆଖାପାଖ ଅଞ୍ଚଳ ବୁଲି ଦେଖିଥିଲେ । ଖୁବ୍ ଶୀଘ୍ର ସେଠାରେ ସୌନ୍ଦର୍ଯ୍ୟକରଣ କାର୍ଯ୍ୟ ଆରମ୍ଭ ହେବ ବୋଲି ଜଣାପଡ଼ିଛି । ଆଜି ପାଣ୍ଡିଆନ୍ ଙ୍କ କଟକ ଗସ୍ତ ପରେ ଏସସିବି ଦ୍ୱିତୀୟ କ୍ୟାମ୍ପସ୍ ଏବଂ ମହାନଦୀ ପଠାରେ ପର୍ଯ୍ୟଟନର ବିକାଶ ପାଇଁ ମୁଖ୍ୟମନ୍ତ୍ରୀ ପ୍ୟାକେଜ୍ ଘୋଷଣା କରିପାରନ୍ତି ବୋଲି କୁହାଯାଉଛି ।