ମହାପ୍ରଭୁଙ୍କ ୟେସ୍ ବ୍ୟାଙ୍କ ଡିପୋଜିଟ୍ ଟଙ୍କା ଫେରିଲା

ପୁରୀ: ଦ୍ୱନ୍ଦ, ଆଶଙ୍କାର ଅବସାନ ଘଟିଲା । ୟେସ୍ ବ୍ୟାଙ୍କରେ ଜମା ଥିବା ମହାପ୍ରଭୁଙ୍କ ମୂଳ ୫୪୫ କୋଟି ଟଙ୍କା ମଧ୍ୟରୁ ଆଜି ୮ କୋଟି ଟଙ୍କା ସୁଧ ସହ ୩୮୯ କୋଟି ମୂଳଟଙ୍କା ଫେରି ଆସିଥିବା ବେଳେ ଅବଶିଷ୍ଟ ୧୫୬ କୋଟି ଟଙ୍କା ମାର୍ଚ୍ଚ ୩୦ ତାରିଖ ମ୍ୟାଚୁରିଟି ପରେ ସୁଧ ସହ ଫେରିବ । ୟେସ୍ ବ୍ୟାଙ୍କରୁ ଏହି ଟଙ୍କା ପୁରୀ ଷ୍ଟେଟ୍ ବ୍ୟାଙ୍କ ମୁଖ୍ୟ ଶାଖାରେ ଥିବା ଜଗନ୍ନାଥ ଟେମ୍ପୁଲ୍ କର୍ପସ୍ ଫଣ୍ଡ୍ କୁ ଇ-ଟ୍ରାନସଫର୍ ହୋଇଛି । ୟେସ୍ ବ୍ୟାଙ୍କର ବରିଷ୍ଠ ଉପସଭାପତି ଜୟଦେବ ଦାସ ଏ ସମ୍ପର୍କରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ୍ କୁମାରଙ୍କୁ ଚିଠି ଲେଖି ଅବଗତ କରାଇଛନ୍ତି ।

ମ୍ୟାଚୁରିଟି ପାଇଥିବା ୩୮୯ କୋଟିର ମୂଳ ଜମାଟଙ୍କା ଉପରେ ୮ କୋଟି ୨୩ ଲକ୍ଷ ୨୭ ହଜାର ୬୩୬ ଟଙ୍କା ସୁଧ ମିଳିଛି । ଏହି ସୁଧକୁ ମିଶାଇ ୟେସ୍ ବ୍ୟାଙ୍କରୁ ସର୍ବମୋଟ ୩୯୭, ୨୩,୨୭,୬୩୬ ଟଙ୍କା ଷ୍ଟେଟ୍ ବ୍ୟାଙ୍କ ଆକାଉଣ୍ଟକୁ ଟ୍ରାନସଫର୍ ହୋଇଛି । ଦ୍ୱିତୀୟ ପର୍ଯ୍ୟାୟରେ ୧୫୬ କୋଟି ଟଙ୍କା(ଦୁଇଟି ଫିକ୍ସଡ୍ ଡିପୋଜିଟ୍) ଏବଂ ତାହାର ସୁଧ ଟଙ୍କା ଷ୍ଟେଟ୍ ବ୍ୟାଙ୍କ ଜଗନ୍ନାଥ ଟେମ୍ପୁଲ୍ କର୍ପସ୍ ଫଣ୍ଡ୍ ଆକାଉଣ୍ଟକୁ ଟ୍ରାନସଫର୍ ହୋଇଯିବ ବୋଲି ୟେସ୍ ବ୍ୟାଙ୍କର ବରିଷ୍ଠ ଉପସଭାପତି ଶ୍ରୀ ଦାସ ଜଣାଇଛନ୍ତି ।

ସୂଚନାଯୋଗ୍ୟ, ଶ୍ରୀମନ୍ଦିରର ଏହି ଟଙ୍କାକୁ ଘରୋଇ ୟେସ୍ ବ୍ୟାଙ୍କରେ ଗତବର୍ଷ ଫିକ୍ସଡ୍ ଡିପୋଜିଟ୍ ଆକାରରେ ରଖାଯାଇଥିଲା । ୨୦୧୯ ମାର୍ଚ୍ଚ ୧୯ ତାରିଖରେ ୩୮୯ କୋଟି ଏବଂ ମାର୍ଚ୍ଚ ୩୦ ତାରିଖରେ ୧୫୬ କୋଟିର ଦୁଇଟି ଫିକ୍ସଡ଼୍ ଡିପୋଜିଟ୍ ଏହିଭଳି ସର୍ବମୋଟ ୫୪୫ କୋଟି ଟଙ୍କା ଜମା ରହିଥିଲା । ତେବେ ୟେସ୍ ବ୍ୟାଙ୍କ ଦେବାଳିଆ ହୋଇଯିବାରୁ ମହାପ୍ରଭୁଙ୍କ ଏହି ଟଙ୍କା ଫେରିପାଇବା ନେଇ ଅନିଶ୍ଚିତତା ସୃଷ୍ଟି ହୋଇଥିଲା । ଏହାକୁ ନେଇ ରାଜ୍ୟ ସରକାରଙ୍କୁ ବିଧାନସଭାରେ ଘେରି ହୋ ହଲ୍ଲା କରିଥିଲେ ବିରୋଧୀ ଦଳ ।

ଅନ୍ୟପକ୍ଷରେ ଟଙ୍କା ସୁରକ୍ଷିତ ଅବସ୍ଥାରେ ଫେରି ପାଇବା ପାଇଁ ମନ୍ଦିର ପ୍ରଶାସନ ଏବଂ ରାଜ୍ୟ ସରକାରଙ୍କ ପକ୍ଷରୁ ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ ଏବଂ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ହସ୍ତକ୍ଷେପ ଲୋଡ଼ାଯାଇଥିଲା । ବିଜେଡ଼ି ସାଂସଦମାନେ ମଧ୍ୟ ଦୁଇ ଦୁଇ ଥର ଅର୍ଥମନ୍ତ୍ରୀଙ୍କୁ ଭେଟି ମହାପ୍ରଭୁଙ୍କ ଟଙ୍କାର ସୁରକ୍ଷା ମାଗିଥିଲେ ।

ଇତିମଧ୍ୟରେ ୟେସ୍ ବ୍ୟାଙ୍କର ପୁନଃରୁଦ୍ଧାର ପାଇଁ କେନ୍ଦ୍ର ସରକାର ପଦକ୍ଷେପ ନେବା ପରେ ଗତକାଲି ସଂଧ୍ୟାରୁ ୟେସ୍ ବ୍ୟାଙ୍କ କାରବାର ସ୍ୱାଭାବିକ ହୋଇଥିଲା । ଆଉ ସୁଧମୂଳ ସହ ମହାପ୍ରଭୁଙ୍କ ଟଙ୍କା ସୁରକ୍ଷିତ ଅବସ୍ଥାରେ ଫେରି ଆସିଛି ।