ଭୁୁବନେଶ୍ୱର: ଅତୀତରେ ଏକ ବ୍ଲୁ ସିଡି ବିବାଦରେ ଫସିଥିବା ତତ୍କାଳୀନ ଭୁବନେଶ୍ୱର ମେୟର ତଥା ଏବେକାର ବିଧାୟକ ଅନନ୍ତ ନାରାୟଣ(ବୁନୁ) ଜେନା ପୁଣି ବିବାଦ ଘେରକୁ ଆସିଛନ୍ତି । ଜଣେ ମହିଳାଙ୍କୁ ଅସଦାଚରଣ କରିଥିବାର ସଙ୍ଗୀନ ଅଭିଯୋଗରେ ପଡ଼ିଛନ୍ତି । ମହିଳାଙ୍କ ଅଭିଯୋଗ ଅନୁଯାୟୀ ତାଙ୍କ ସ୍ୱାମୀ ଘରେ ନ ଥିବା ବେଳେ ବିଧାୟକ ତାଙ୍କ ସହଯୋଗୀମାନଙ୍କ ସହ ବଳପୂର୍ବକ ଘରେ ପଶି ଗାଳିଗୁଲଜ କରିଥିଲେ । ବନ୍ଧୁକ ଦେଖାଇ ଜୀବନରୁ ମାରିଦେବାର ଧମକାଇଥିଲେ ।
ଅଭିଯୋଗକାରିଣୀ ମହିଳାଙ୍କ ଘର ଖୋର୍ଦ୍ଧା ଜିଲ୍ଲା ସାରୁଅ ଅଞ୍ଚଳରେ । ବିଧାୟକଙ୍କ ବିରୋଧରେ ସେ ବାଘମାରୀ ଥାନାରେ ଦେଇଥିବା ଏତଲାକୁ ପୁଲିସ ଗ୍ରହଣ କରିଛି ।
ମହିଳା ତାଙ୍କ ଏତଲାରେ ଦର୍ଶାଇଛନ୍ତି ଯେ ଗତ ୧୯ ତାରିଖ ରାତି ସାଢ଼େ ୧୦ଟାରେ ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା ନିଜ ସହଯୋଗୀଙ୍କ ମାନଙ୍କୁ ଧରି ତାଙ୍କ ଘରେ ବଳପୂର୍ବକ ପଶିଥିଲେ । ସେମାନଙ୍କ ହାତରେ ବନ୍ଧୁକ, ଖଣ୍ଡା ତଲୱାର ଥିଲା । ସେତେବେଳକୁ ତାଙ୍କ ଘରେ କେହି ପୁରୁଷ ଲୋକ ନ ଥିଲେ । ବିଧାୟକ ଓ ତାଙ୍କ ସହଯୋଗୀମାନେ ତାଙ୍କ ସ୍ୱାମୀଙ୍କ ନାଁରେ ଅଶ୍ଲୀଳ ଭାଷାରେ ଗାଳିଗୁଲଜ କରିବା ସହ ତାଙ୍କ ଚୁଟି ଘୋଷାରି ଟଣାଓଟରା କରିଥିଲେ । ପରିବାରର ଅନ୍ୟ ସଦସ୍ୟମାନେ ପହଞ୍ଚିବାରୁ ଜୀବନରୁ ମାରିଦେବାର ଧମକ ଦେଇ ପଳାଇ ଯାଇଥିଲେ ।
୨୦ ତାରିଖରେ ମହିଳାଙ୍କ ଏତଲାକୁ ବାଘମାରୀ ଥାନା ଆଇଆଇସି ଗ୍ରହଣ କରି ଆଇପିସିର ଧାରା ୪୪୮(ଜବରଦସ୍ତ ଘରେ ପଶିବା), ୨୯୪(ଗାଳିଗୁଲଜ କରିବା), ୩୫୪(ବି)(ମହିଳାଙ୍କ ଚୁଟି ଧରି ଟାଣିବା), ୫୦୬(ହତ୍ୟା ଧମକ, ୨୫ ଆର୍ମସ୍ ଆକ୍ଟ ଏବଂ ୩୪ ରେ ମାମଲା ରୁଜୁ କରିଛନ୍ତି । ଅଭିଯୋଗ ଉପରେ ତଦନ୍ତ ଚାଲିଥିବା ଖୋର୍ଦ୍ଧା ଏସପି ଅଜୟ ପ୍ରତାପ ସ୍ୱାଇଁ କହିଛନ୍ତି ।
