– ବାଘମାରୀ ଥାନା ଭୋଗଡ଼ା ଗାଁରେ ବଡ଼ ଧରଣର ଡକାୟତି
– ପୂର୍ବତନ ସରପଞ୍ଚଙ୍କ ସମେତ ପତ୍ନୀ, ପୁଅ ଗୁରୁତର
ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ବାଘମାରୀ ଥାନା ଭୋଗଡ଼ା ଗ୍ରାମରେ ଗତରାତି ପ୍ରାୟ ୨ଟା ସମୟରେ ବଡ଼ଧରଣର ସଶସ୍ତ୍ର ଡକାୟତି । ଏକାଧିକ ବୋମା ମାଡ଼ । ଘଟଣା ସମୟରେ ପୋଲିସ ପହଞ୍ଚିଥିଲେ ମଧ୍ୟ ପୋଲିସ ଉପରକୁ ବୋମାମାଡ଼। ବୋମା ମାଡ଼ ସହିତ ବିଭିନ୍ନ ମାରଣାସ୍ତ୍ରରେ ମରଣାନ୍ତକ ଆକ୍ରମଣ କରି ଡକାୟତମାନେ ନଗଦ ଟଙ୍କା ସମେତ ଲକ୍ଷାଧିକ ଟଙ୍କା ମୁଲ୍ୟର ବହୁ ସୁନାରୁପା ଅଳଙ୍କାର ଏବଂ ମୁଲ୍ୟବାନ ସାମଗ୍ରୀ ଲୁଟି ନେଇଛନ୍ତି । ଏଥିରେ ଗୄହ ମାଲିକଙ୍କ ସମେତ ପରିବାରର ତିନି ଗୁୁରୁତର ଆହତ ହୋଇଛନ୍ତି ।
ଗତକାଲି ରାତି ପ୍ରାୟ ୨ଟା ସମୟରେ ଏହି ଘଟଣା ଘଟିଛି । ବାଘମାରୀ ଥାନା ଅନ୍ତର୍ଗତ ପଙ୍ଗାରସିଙ୍ଗ ପଞ୍ଚାୟତର ପୁର୍ବତନ ସରପଞ୍ଚ ସୁକାନ୍ତ ଜୟସିଂଙ୍କର ଭୋଗଡ଼ା ଗ୍ରାମସ୍ଥିତ ବାସଭବନରେ କିଛି ସଶସ୍ତ୍ର ଡକାୟତ ଏକାଧିକ ବୋମା ମାଡ଼ କରି ବଳପୂର୍ବକ ଘରର ଲୁହା କବାଟ ଭାଙ୍ଗି ଘର ଭିତରକୁ ପଶିବାକୁ ଚେଷ୍ଟା କରିଥିଲେ। ସୁକାନ୍ତ ଜୟସିଂ ଏବଂ ତାଙ୍କ ପୁତ୍ର ସୌମ୍ୟ ଜୟସିଂ ବିରୋଧ କରିବାରୁ, ଡକାୟତ ମାନେ ତାଙ୍କ ଉପରକୁ ବୋମା ଫିଙ୍ଗି ଏବଂ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରି ଘର ଭିତରୁ ନଗଦ ଟଙ୍କା, ଲକ୍ଷାଧିକ ଟଙ୍କା ମୁଲ୍ୟର ସୁନା ଓ ରୁପା ଗହଣା ଏବଂ ଅନ୍ୟାନ୍ୟ ମୁଲ୍ୟବାନ୍ ସାମଗ୍ରୀ ଲୁଟି ନେଇଛନ୍ତି।
ସେହି ସମୟରେ ବୋମା ମାଡ଼ ଶବ୍ଦ ଶୁଣିପାରି ପୋଲିସ ପାଟ୍ରୋଲିଂ ଗାଡ଼ି ଏବଂ ସେହି ଗ୍ରାମର କିଛି ଲୋକ ତତକ୍ଷଣାତ୍ ପହଞ୍ଚିଥିଲେ ମଧ୍ୟ, ବିଭିନ୍ନ ମାରଣାସ୍ତ୍ରରେ ସଜ୍ଜିତ ଡକାୟତ ମାନେ ତାଙ୍କ ଉପରକୁ ବୋମାମାଡ଼ କରି ଏବଂ ମାରଣାସ୍ତ୍ରର ଭୟ ଦେଖାଇ ସମସ୍ତ ମୁଲ୍ୟବାନ୍ ଚୋରି ସାମଗ୍ରୀ ନେଇ ରାତ୍ରିର ଅନ୍ଧକାରରେ ନିକଟସ୍ଥ ଗ୍ରାମ୍ୟ ଜଙ୍ଗଲ ରାସ୍ତାଦେଇ ଖସିଯିବାରେ ସମର୍ଥ ହୋଇଥିଲେ।
ସୁକାନ୍ତ ଜୟସିଂଙ୍କ ପତ୍ନୀ ଗୁରୁତର ଆହତହୋଇ ଭୁବନେଶ୍ବରରେ ଏକ ଘରୋଇ ଚିକିତ୍ସାଳୟରେ ଭେଣ୍ଟିଲେଟରରେ ଚିକିତ୍ସିତ ହେଉଛନ୍ତି ଏବଂ ଖୋର୍ଦ୍ଧା ଜିଲ୍ଲା ଚିକିତ୍ସାଳୟ ରେଫର କରିଦେବାରୁ ସୁକାନ୍ତ ଓ ତାଙ୍କ ପୁଅ ସୌମ୍ୟ ମଧ୍ୟ ଭୁବନେଶ୍ବରରେ ଅନ୍ୟ ଏକ ଚିକିତ୍ସାଳୟରେ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି।
