ଆଜି ବି ଦିନସାରା ଛେଚିବ ବର୍ଷା

ଭୁବନେଶ୍ୱର: ବଙ୍ଗୋପ ସାଗରରେ ସୃଷ୍ଟ ଲଘୁଚାପ ଅଧିକ ଘନୀଭୂତ ହୋଇ ଆଜି ସକାଳେ ଗଭୀର ଅବପାତରେ ପରିଣତ ହୋଇଛି । ଏହାର ପ୍ରଭାବରେ ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, କେନ୍ଦ୍ରାପଡ଼ା, ଢ଼େଙ୍କାନାଳ ଓ ନୟାଗଡ଼ ଜିଲ୍ଲାରେ ଆଜି ବି ଦିନ ତମାମ ପ୍ରବଳରୁ ଅତି ପ୍ରବଳ ବର୍ଷା ଲାଗି ରହିବ । ପଶ୍ଚିମ ଓଡ଼ିଶାରେ ଏହାର ପ୍ରଭାବ ଅନୁଭୂତ ହୋଇ ସମ୍ବଲପୁର, ଦେବଗଡ଼, ଅନୁଗୁଳ, ସୋନପୁର, ବରଗଡ଼ ଜିଲ୍ଲାରେ ପ୍ରବଳ ବର୍ଷିବ । ଆସନ୍ତା ୨୪ ଘଣ୍ଟାରେ ଲଘୁଚାପ ଦୁର୍ବଳ ହୋଇ ଅବପାତ ସ୍ଥିତିକୁ ଆସିବ ।

ଭୁବନେଶ୍ୱର ପାଣିପାଗ ଅଫିସ୍ ପକ୍ଷରୁ ଆଜି ଦିନ ପାଇଁ ୫ ଜିଲ୍ଲାକୁ ରେଡ୍ ୱାର୍ଣ୍ଣିଂ ଓ ୧୦ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ରେଡ୍ ୱାର୍ଣ୍ଣିଂ ଜାରି ଜିଲ୍ଲାଗୁଡ଼ିକ ହେଲା ସମ୍ବଲପୁର, ଦେବଗଡ଼, ଅନୁଗୁଳ, ସୋନପୁର ଓ ବରଗଡ । ବଲାଙ୍ଗୀର, ଝାରସୁଗୁଡ଼ା, ସୁନ୍ଦରଗଡ଼, ବୌଦ୍ଧ, କେନ୍ଦୁଝର, ଢ଼େଙ୍କାନାଳ, ଖୋର୍ଦ୍ଧା, ଜଗତସିଂହପୁର, ପୁରୀ, କଟକ ପାଇଁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି ।

ଉତ୍ତର ପଶ୍ଚିମ ବଙ୍ଗୋପସାଗର ଏବଂ ତତସଂଲଗ୍ନ ପଶ୍ଚିମ କେନ୍ଦ୍ରୀୟ ବଙ୍ଗୋପସାଗର ଅଞ୍ଚଳରେ ପବନର ବେଗ ଘଣ୍ଟା ପ୍ରତି ୫୦ରୁ ୬୦ କିମି ରହିବ । ଉପକୂଳ ଓ ଉତ୍ତର ଓଡ଼ିଶାରେ ୩୫ରୁ ୪୫ କିମି ବେଗରେ ପବନ ବହିବ । ଏଥିପାଇଁ ତଳିଆ ଅଞ୍ଚଳର ଲୋକମାନଙ୍କୁ ସତର୍କ କରାଇଛି ପାଣିପାଗ ବିଭାଗ । ୧୪ ତାରିଖ ପର୍ଯ୍ୟନ୍ତ ମତ୍ସ୍ୟଜୀବୀମାନେ ସମୁଦ୍ର ଭିତରକୁ ନ ଯିବା ପାଇଁ ପରାମର୍ଶ ଦିଆଯାଇଛି ।

ଗତ ୨୪ ଘଣ୍ଟା ଭିତରେ ଭୁବନେଶ୍ୱର ଓ ପୁରୀରେ ଦିନିକିଆ ସେପ୍ଟେମ୍ବର ବର୍ଷା ରେକର୍ଡ ଭାଙ୍ଗିଛି । ପୁରୀରେ ୩୪୨.୫ ମିମି ବର୍ଷା ରେକର୍ଡ କରାଯାଇଛି । ଏହା ୮୭ ବର୍ଷର ପୁରୁଣା ରେକର୍ଡ ଭାଙ୍ଗିଛି । ଜିଲ୍ଲାର ଅସ୍ତରଙ୍ଗରେ ସର୍ବାଧିକ ୫୩୦ ମିମି ବର୍ଷା ହୋଇଥିଲା ବେଳେ କାକଟପୁରରେ ୫୩୨ ମିମି ବର୍ଷା ରେକର୍ଡ କରାଯାଇଛି । ଭୁବନେଶ୍ୱରରେ ୧୯୫ ମିମି ବର୍ଷା ସହ ୬୩ ବର୍ଷର ପୁରୁଣା ରେକର୍ଡ ଭାଙ୍ଗିଛି ।

ଭୁବନେଶ୍ୱର, ପୁରୀକୁ ମିଶାଇ ଉପକୂଳ ଓଡ଼ିଶାର ୯ଟି ସ୍ଥାନରେ ୩୦୦ ମିମିରୁ ଅଧିକ ବର୍ଷା ହେଲାଣି । ୨୦ ଟି ସ୍ଥାନରେ ୨୦ ସେମିରୁ ଅଧିକ ବର୍ଷା, ୨୦ ଟି ସ୍ଥାନରେ ୧୨ ରୁ ୨୦ ସେମି ବର୍ଷା ଏବଂ ୧୭ଟି ସ୍ଥାନରେ ପ୍ରବଳ ବର୍ଷା ହୋଇଛି । ଏହିଭଳି ଭାବେ ରାଜ୍ୟର ସମୁଦାୟ ୫୭ଟି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ରେକର୍ଡ ହୋଇଥିବା ପାଣିପାଗ ଅଫିସ ପକ୍ଷରୁ କୁହାଯାଇଛି ।

ପ୍ରବଳ ବର୍ଷାରେ ଭୁବନେଶ୍ୱର ଓ କଟକ ସହରର ଅଧିକାଂଶ ଅଞ୍ଚଳ ଡୁବି ରହିଛି । ମୁଖ୍ୟରାସ୍ତାରେ ବର୍ଷା ପାଣି ଲହରି ଭାଙ୍ଗୁଛି । କଲୋନୀ, ସାହିବସ୍ତି ରେ ପାଣି ପଶିଥିବାରୁ ଲୋକମାନେ ଜଳବନ୍ଦୀରେ ଅଛନ୍ତି । ଲୋକମାନଙ୍କୁ ପାଣିଘେରିରୁ ରକ୍ଷା କରିବାରେ ଉଭୟ ବିଏମସି ଓ ସିଏମସି ସମ୍ପୂର୍ଣ୍ଣ ଫେଲ୍ ମାରିଛନ୍ତି ।

ରାଜଧାନୀ ଭୁବନେଶ୍ୱରର ଅବସ୍ଥା ଅତ୍ୟନ୍ତ ବେହାଲ ହୋଇପଡ଼ିଛି । ସହରର ଅଧିକାଂଶ ମୁଖ୍ୟ ରାସ୍ତାଗୁଡ଼ିକରେ ବର୍ଷାପାଣି ଲହରି ଭାଙ୍ଗୁଥିବାରୁ ସାଧାରଣ ଜୀବନଯାତ୍ରା ବ୍ୟାଘାତ ହୋଇଛି । ତଳିଆ ଅଞ୍ଚଳରେ ଥିବା ଘରଗୁଡ଼ିକରେ ଅଣ୍ଟାଏ ଉଚ୍ଚରେ ପାଣି ବୋହୁଥିବାରୁ ଲୋକମାନେ ଅସହ୍ୟ ଯନ୍ତ୍ରଣା ଭୋଗୁଛନ୍ତି । ବସ୍ତି କଥା ଛାଡ଼ନ୍ତୁ, କଲୋନୀ ଏବଂ ଆପାର୍ଟମେଣ୍ଟତଳେ ମଧ୍ୟ ବର୍ଷା ପାଣି ଲହରି ଭାଙ୍ଗୁଛି । ପୁରୁଣା ଭୁବନେଶ୍ୱର ଅଞ୍ଚଳର ଅଧିକାଂଶ ମନ୍ଦିର ବର୍ଷାପାଣିରେ ବୁଡ଼ିଲାଣି ।

ସେପଟେ କେନ୍ଦ୍ରାପଡ଼ା ଜିଲ୍ଲାରେ କାନ୍ଥପଡ଼ି ଦୁଇଜଣ ଲୋକ ପ୍ରାଣ ହରାଇଥିବା ଖବର ମିଳିଛି । ଗରଦପୁର ବ୍ଲକ୍ ବଡ଼ବେତରା ଗାଁର ଜଣେ ବୃଦ୍ଧଙ୍କର ମୃତ୍ୟୁ ହୋଇଥିଲା ବେଳେ ଡେରାବିଶ ବେଣୀପୁର ଢ଼ିହସାହିରେ ଜଣେ ବୃଦ୍ଧାଙ୍କର ମୃତ୍ୟୁ ହୋଇଛି ।

ପ୍ରବଳ ବର୍ଷା ଯୋଗୁଁ ୧୨ ଟି ଜିଲ୍ଲାରେ ଦୁଇ ଦିନ ପାଇଁ ସ୍କୁଲକୁ ଛୁଟି ଘୋଷଣା କରିଛନ୍ତି ରାଜ୍ୟ ସରକାର ।