ଭୁୁବନେଶ୍ୱର: ସିଭି ରମଣ ଗ୍ଲୋବାଲ୍ ବିଶ୍ୱବିଦ୍ୟାଳୟର ଦ୍ୱିତୀୟ ବର୍ଷ କମ୍ପ୍ୟୁଟର ସାଇନସ୍ ଛାତ୍ର ସୌରଭ ସୁମନ ଗତକାଲିଠାରୁ ନିଖୋଜ ହୋଇଯାଇଛନ୍ତି । ହଷ୍ଟେଲ୍ ରେ ରହୁଥିବା ଏହି ଛାତ୍ରଜଣଙ୍କର ଗତକାଲି ମଧ୍ୟାହ୍ନ ଭୋଜନ ପରଠୁ ଆଉ ପତ୍ତା ମିଳୁନି । ସାଙ୍ଗମାନେ ସବୁଆଡ଼େ ଖୋଜାଖୋଜି କରି ବିଫଳ ହେବା ପରେ ତମାଣ୍ଡୋ ଥାନାରେ ଏତଲା ଦେଇଥିଲେ ମଧ୍ୟ ପୁଲିସ ନିଷ୍କ୍ରିୟ ଥିବା ଅଭିଯୋଗ ହୋଇଛି । ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ମଧ୍ୟ ସହଯୋଗ କରୁ ନ ଥିବା ତାଙ୍କ ବନ୍ଧୁମାନେ ଅଭିଯୋଗ କରିଛନ୍ତି ।
ବିଶ୍ୱବିଦ୍ୟାଳୟର ଓଲଡ୍ ଆପାର୍ଟମେଣ୍ଟ ହଷ୍ଟେଲ୍ ରୁମ୍ ନଂ ୪୦୫ ରେ ଦୁଇବନ୍ଧୁ ସୌରଭ ସୁମନ ଏବଂ ଶୋଭିତ୍ ରହୁଛନ୍ତି । ଅଭିଯୋଗ ଅନୁଯାୟୀ, ସୌରଭ ଗତକାଲି ଦିନ ୨ଟାରେ ହଷ୍ଟେଲ୍ ରେ ମଧ୍ୟାହ୍ନ ଭୋଜନ କରିଥିଲେ । ମାତ୍ର ତାପରଠାରୁ କେହି ତାଙ୍କୁ ଦେଖିନାହାନ୍ତି । ତାଙ୍କର ମୋବାଇଲ୍ ଫୋନ୍ ଟି କିନ୍ତୁ ହଷ୍ଟେଲ୍ ରୁମ୍ ରେ ଅଛି ।
ସାଙ୍ଗମାନେ ଗତକାଲି ସଂଧ୍ୟା ପରଠୁ ତାଙ୍କୁ ଖୋଜାଖୋଜି କରି ବିଫଳ ହେବା ପରେ ତମାଣ୍ଡୋ ଥାନାରେ ଏତଲା ଦେଇଥିଲେ । ହେଲେ ପୁଲିସ ଏ ପର୍ଯ୍ୟନ୍ତ ତାଙ୍କୁ ଠାବ କରିବା ପାଇଁ ସାମାନ୍ୟତମ ଉଦ୍ୟମ କରି ନ ଥିବା ଅଭିଯୋଗ ହୋଇଛି । ସୌରଭଙ୍କୁ ଠାବ କରିବା ପାଇଁ ଖୋଦ୍ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ମଧ୍ୟ ସହଯୋଗ କରୁ ନ ଥିବା ସାଙ୍ଗମାନେ ଅଭିଯୋଗ କରିଛନ୍ତି । ତେବେ ଏହି ଅଭିଯୋଗ ଉପରେ ପୁଲିସ ଏବଂ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରିନାହିଁ ।
୩୦ ଘଣ୍ଟା ବିତିଯାଇଥିଲେ ମଧ୍ୟ ସୌରଭଙ୍କ ଖୋଜଖବର ମିଳୁ ନ ଥିବାରୁ ବନ୍ଧୁମାନେ ଭୟଭୀତ ହୋଇପଡ଼ିଛନ୍ତି । କେହି ତାଙ୍କର ଠାବ ପାଇଥିଲେ ରୁମମେଟ୍ ଶୋଭିତ୍ ଙ୍କୁ ତାଙ୍କ ମୋବାଇଲ୍ ନଂ ୭୩୬୭୦୪୩୮୩୧ କିମ୍ବା ବନ୍ଧୁ ଆକାଶ ମୁଖାର୍ଜୀଙ୍କୁ ମୋବାଇଲ୍ ନଂ ୯୩୪୮୩୮୯୮୪୩ ଯୋଗେ ଯୋଗାଯୋଗ କରିବାକୁ ଅନୁରୋଧ କରାଯାଇଛି ।
ନିଖୋଜ ଛାତ୍ର ସୌରଭ ସୁମନ୍ ଙ୍କ ଘର ବିହାରର ଦରଭଙ୍ଗା । ତେବେ ତାଙ୍କ ପରିବାର ରାଞ୍ଚିରେ ରହୁଛନ୍ତି ।
