ମା’ ମାନେ ଚାହିଁଲେ ୧୦୦ ବର୍ଷ: ନବୀନ

ବିଜେଡିର ରୌପ୍ୟ ଜୟନ୍ତୀ ସମାରୋହ

ଭୁବନେଶ୍ୱର: ବିଜୁ ଜନତା ଦଳକୁ ଆଜି ୨୫ ବର୍ଷ ପୂରିଛି । ବିଜୁ ପଟ୍ଟନାୟକଙ୍କ ମୃତ୍ୟୁ ପରେ ୧୯୯୭ ମସିହା ଡିସେମ୍ବର ୨୬ ତାରିଖରେ ଏହି ଆଞ୍ଚଳିକ ଦଳ ଗଠନ ହୋଇଥିଲା । ନେତୃତ୍ୱ ନେଇଥିଲେ ବିଜୁବାବୁଙ୍କ ସୁପୁତ୍ର ନବୀନ ପଟ୍ଟନାୟକ । ସେଦିନ ପୋତା ଯାଇଥିବା ଏହି ଛୋଟ ମଞ୍ଜିଟି ଆଜି ମହାଦ୍ରୁମର ରୂପ ନେଇଛି । ନବୀନ ପଟ୍ଟନାୟକଙ୍କର ଉଚ୍ଚ ବ୍ୟକ୍ତିତ୍ୱ, ବଳିଷ୍ଠ ନେତୃତ୍ୱ, ଆଦର୍ଶ, ଶୃଙ୍ଖଳା, ସରଳତା ଏବଂ ସ୍ୱଚ୍ଛ ଭାବମୂର୍ତ୍ତି ଯୋଗୁଁ ଏହା ସମ୍ଭବ ହୋଇପାରିଛି । ସାଢ଼େ ଚାରି କୋଟି ଓଡ଼ିଆଙ୍କୁ ନିଜ ପରିବାର ମଣୁଥିବା ନବୀନଙ୍କ ସେବା ଓ ସମର୍ପଣ ମନୋଭାବ ତାଙ୍କୁ ଜନମାନସରେ ଅପ୍ରତିଦ୍ୱନ୍ଦୀ କରିଦେଇଛି । ତାଙ୍କ ନେତୃତ୍ୱରେ ବିଜୁ ଜନତା ଦଳ ଦେଶର ସର୍ବବୃହତ୍ତ ଆଞ୍ଚଳିକ ଦଳ ଭାବେ ଉଭା ହୋଇଛି । ଲଗାତର ପଞ୍ଚମ ଥର ଓଡ଼ିଶାରେ ସରକାର ଗଠନ କରିଛି । ୨୫ ବର୍ଷର ଏହି ସଫଳ ଯାତ୍ରା ଆଗକୁ ନେବା ପାଇଁ ଦଳ ନିଜର ସଂକଳ୍ପରୁ ସାମାନ୍ୟ ବିଚ୍ୟୁତ ହୋଇନାହିଁ । ଆଜି ପୁରୀ ତାଳବଣିଆ ପଡିଆଠାରେ ୨୬ତମ ପ୍ରତିଷ୍ଠା ଦିବସ ପାଳନର ବିରାଟ ଆୟୋଜନ ଏହି ସଂକଳ୍ପର ଏକ ପ୍ରତିଫଳନ ମାତ୍ର । ଏହି ଅବସରରେ ଦଳୀୟ କର୍ମୀଙ୍କୁ ଗୁରୁମନ୍ତ୍ର ଦେଇଥିଲେ ନବୀନ । କହିଥିଲେ, ଆଗାମୀ ୧୦୦ ବର୍ଷ ପର୍ଯ୍ୟନ୍ତ ବିଜୁ ଜନତା ଦଳ ଓଡିଶାବାସୀଙ୍କ ସେବା କରି ଚାଲିବ ।

ପୁରୀ ତାଳବଣିଆଠାରେ ଆୟୋଜିତ ବିଶାଳ ସମାବେଶକୁ ଉଦବୋଧନ ଦେଇଥିଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । କହିଥିଲେ, ଆଜି ବିଜେଡି ଓଡ଼ିଶାବାସୀଙ୍କ ସେବାର ୨୫ ବର୍ଷ ପାଳନ କରୁଛି । ଓଡ଼ିଶାର ସାଢ଼େ ଚାରି କୋଟି ଜନତା ଆମକୁ ସେବା କରିବାର ସୁଯୋଗ ଦେଇଥିବାରୁ ମୁଁ ସେମାନଙ୍କ ପାଖରେ ଚିର ଋଣୀ । ବିଜେଡି ସବୁବେଳେ ଓଡ଼ିଶାବାସୀଙ୍କ ପାଖରେ ଋଣୀ ।

ଆଗ ନବୀନ ତାଙ୍କ ଭାଷଣରେ ବିଜେଡି କାହିଁକି ସଫଳ ତାହା ଗୋଟି ଗୋଟି କହିଥିଲେ । ପ୍ରଥମତଃ, ଆଞ୍ଚଳିକ ଦଳ ଭାବେ ବିଜେଡି ନିଜ ଏଜେଣ୍ଡାରୁ ହଟିନାହିଁ । ଓଡ଼ିଶାର ସ୍ୱାର୍ଥ, ଉନ୍ନତି, ଗୌରବ, ଭାଷା, ସଂସ୍କୃତି, ସ୍ୱାଭିମାନ ପାଇଁ ଦଳ କାମ କରି ଚାଲିଛି । ଦ୍ୱିତୀୟରେ, ବିଜୁବାବୁଙ୍କ ଆଦର୍ଶ ହିଁ ଦଳର ପାଥେୟ । ମହାନ ଜନନାୟକ ବିଜୁବାବୁଙ୍କ ରାସ୍ତାରେ ବିଜେଡି କାମ କରୁଛି ଏବଂ ଆଗକୁ କରିବ । ତୃତୀୟରେ, ବିଜେଡିର ସ୍ୱଚ୍ଛ ଓ ନିର୍ମଳ ଶାସନ । ଚତୁର୍ଥରେ, ମହିଳା ସଶକ୍ତିକରଣ । ଆମର ଦୃଢ଼ ବିଶ୍ୱାସ ମା’ ମାନଙ୍କ ଉନ୍ନତି ଓଡ଼ିଶାକୁ ଆଗକୁ ନେଇଯିବ । ମା’ ମାନେ ସଶକ୍ତ ହେଲେ ପରିବାର, ରାଜ୍ୟ, ଦେଶ ସଶକ୍ତ ହେବ ବୋଲି ନବୀନ କହିଥିଲେ ।

ମୁଖ୍ୟମନ୍ତ୍ରୀ କହିଥିଲେ ଯେ ବିଜେଡି ପାଇଁ ସବୁବର୍ଗର ଉନ୍ନତି ଗୁରୁତ୍ୱପୂର୍ଣ୍ଣ । ମାଲକାନଗିରିଠାରୁ ମୟୁରଭଞ୍ଜ, ବରଗଡ଼ରୁ ପୁରୀ ସବୁ ଅଞ୍ଚଳର ଉନ୍ନତି ପାଇଁ ଆମେ କାମ କରୁଛୁ । ଆଞ୍ଚଳିକ ବୈଷମ ଦୂର କରିବା ଆମର ଲକ୍ଷ୍ୟ । ଓଡ଼ିଶାର ଯାହା ବି ସମସ୍ୟା ଅଛି ତାହାର ସମାଧାନ ପ୍ରଫେସନାଲ୍ ଦୃଷ୍ଟିଭଙ୍ଗୀରେ କରାଯାଉଛି ।

ପ୍ରାକୃତିକ ଦୁର୍ବିପାକର ସଫଳ ମୁକାବିଲାଠାରୁ ଆରମ୍ଭ କରି ଖାଦ୍ୟ ନିରାପତ୍ତା, ଭିତ୍ତିଭୂମି ଉନ୍ନୟନ ଏବଂ ସ୍ୱଚ୍ଛ ଶାସନ ପାଇଁ ଆମେ ସାରା ବିଶ୍ୱର ଦୃଷ୍ଟି ଆକର୍ଷଣ କରିଛୁ ବୋଲି ନବୀନ କହିଥିଲେ । ସେହିଭଳି ସ୍ୱାସ୍ଥ୍ୟ ସେବା କ୍ଷେତ୍ରରେ ଆମ ସରକାରର ଦୃଷ୍ଟିଭଙ୍ଗୀ ମଧ୍ୟ ସ୍ପଷ୍ଟ । ଆମ ପାଇଁ ପ୍ରତ୍ୟେକ ଜୀବନ ମୂଲ୍ୟବାନ । କୋଭିଡ୍ ମୁକାବିଲା ହେଉ କିମ୍ବା ବିଏସକେୱାଇ ଭଳି କ୍ରାନ୍ତିକାରୀ ଯୋଜନା ହେଉ, ଆମେ ଲୋକଙ୍କ ସେବାରେ ଉତ୍ସର୍ଗୀକୃତ । ଦେଶ ବିଦେଶରେ ଆମର ଗଭର୍ଣ୍ଣାସ୍ ମଡେଲକୁ ସମସ୍ତେ ପ୍ରଶଂସା ଏବଂ ଅନୁସରଣ କରୁଛନ୍ତି । ଆମ ସରକାର ପ୍ରଫେସନାଲ୍ ମଡେଲରେ କାମ କରୁଛି ବୋଲି କହିଥିଲେ ।

ବିଜେଡି କର୍ମୀଙ୍କ ଉଦେ୍ଦଶ୍ୟରେ ମୁଖ୍ୟମନ୍ତ୍ରୀ କହିଥିଲେ, ମୁଁ ଯାହା ବି କହିଲି ସେ ସବୁ ଗୋଟେ ପଟରେ । କିନ୍ତୁ ତାକୁ ଲୋକଙ୍କ ପାଖକୁ ପହଞ୍ଚାଇବା, ଲୋକଙ୍କ ହୃଦୟକୁ ଛୁଇଁବାର ଦାୟିତ୍ୱ ନେଇଛନ୍ତି ବିଜେଡିର କର୍ମୀମାନେ । ଦଳର ବାର୍ତ୍ତାକୁ ଲୋକଙ୍କ ପାଖରେ ପହଞ୍ଚାଇବା ପାଇଁ ଆପଣମାନେ ସକ୍ଷମ ହୋଇଛନ୍ତି । ସେଥିପାଇଁ ଏହି ଦଳ ଲୋକଙ୍କର ବିଶ୍ୱାସର ପାତ୍ର ହୋଇଛି । ବିଜେଡି କେବେ ବି ଜଣେ ଦି ଜଣଙ୍କ ଉପରେ ନିର୍ଭର କରିନାହିଁ କି କରିବ ନାହିଁ । ଏହା ଏକ ସାମାଜିକ ଆନେ୍ଦାଳନ । ଏଥିରେ ପ୍ରତ୍ୟେକ ଘରର ଲୋକଙ୍କ ଭାଗିଦାରି ରହିଛି । ଓଡ଼ିଶା କେଉଁଠି ଥିଲା ଏବେ କେଉଁଠି ଅଛି, ମୁଁ କହିବା ଦରକାର ନାହିଁ । ଏହା ସାରା ବିଶ୍ୱ ଦେଖୁଛି ।

ଓଡ଼ିଶାର ବିକାଶକୁ ଆହୁରି ଆଗକୁ ନେବାକୁ ଓଡ଼ିଶାର ଯୁବ ପୀଢ଼ି ବିଜେଡିରେ ସାମିଲ ହେବାକୁ ନବୀନ ଆହ୍ୱାନ ଦେଇ କହିଥିଲେ ଯେ ଜାତୀୟ ଦଳ ଏଜେଣ୍ଡାରେ ଜାତୀୟ ରାଜନୀତି ହିଁ ରହିବ । ସେମାନଙ୍କ ଏଜେଣ୍ଡାରେ ଓଡ଼ିଶା କେବେ ବି ଫୋକସରେ ରହିବ ନାହିଁ । ଏକମାତ୍ର ଆଞ୍ଚଳିକ ଦଳ ଭାବେ ବିଜୁ ଜନତା ଦଳ ହିଁ ଓଡ଼ିଶାର ଉନ୍ନତି କରିପାରିବ ।

ଓଡ଼ିଶାର ମା’ ମାନେ ଏହି ଧାରାରେ ସାମିଲ ହୋଇ ଦାୟିତ୍ୱ ନେବାକୁ ନବୀନ ପରାମର୍ଶ ଦେଇଥିଲେ । ମା’ ମାନଙ୍କ ଆଶୀର୍ବାଦ ରହିଲେ, ବିଜୁ ଜନତା ଦଳ ୨୫ ବର୍ଷ କ’ଣ, ୫୦ ବର୍ଷ କ’ଣ, ଶହେ ବର୍ଷ ବି ସେବା କରି ଚାଲିବ । ଶଙ୍ଖ ଚିହ୍ନ ସବୁବେଳେ ଓଡ଼ିଆ ସ୍ୱାଭିମାନର ଜୟନାଦ କରି ଚାଲିଥିବ ବୋଲି କହିଥିଲେ ।

ବିଜେଡିର ଏହି ରୌପ୍ୟ ଜୟନ୍ତୀ ସମାରୋହରେ ସବୁ ବର୍ଗର ନେତାଙ୍କୁ ଗୁରୁତ୍ୱ ଦିଆଯାଇଥିଲା । ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିଲା ସଭା । ସାରା ରାଜ୍ୟରୁ ୫୦ ହଜାରରୁ ଅଧିକ ନେତା ଏବଂ କର୍ମୀ ଏଥିରେ ଯୋଗଦେଇଥିଲେ ।

ମା’ ମାନଙ୍କ ଆଶୀର୍ବାଦ ରହିଲେ ୨୫ କି ୫୦ ବର୍ଷ କ’ଣ.. ୧୦୦ ବର୍ଷ ବି ଓଡିଶାର ସେବା କରି ଚାଲିବ ବୋଲି କହିଥିଲେ ।