ରାୟଗଡ଼ା/ଭୁବନେଶ୍ୱର: ଓଡ଼ିଶା ବୁଲିବାକୁ ଆସିଥିବା ରୁଷୀୟ ସାଂସଦ ପାଭେଲ୍ ଆଣ୍ଟୋଭ ଏବଂ ତାଙ୍କ ବନ୍ଧୁ ଭ୍ଲାଦମିର୍ ଙ୍କର ଅସ୍ୱାଭାବିକ ମୃତ୍ୟୁକୁ ନେଇ ହଇଚଇ ସୃଷ୍ଟି ହୋଇଛି । ରାୟଗଡ଼ାର ଏକ ହୋଟେଲରେ ଥିଲା ବେଳେ ଦୁଇଦିନରେ ଦୁଇବନ୍ଧୁଙ୍କର ଆଗପଛ ହୋଇ ମୃତ୍ୟୁ ହୋଇଥିଲା । ରୁଷ ରାଷ୍ଟ୍ରପତି ପୁତିନ୍ ଙ୍କର ଦୃଢ଼ ସମାଲୋଚକ ଭାବେ ପରିଚିତ ପାଭେଲ୍ ଏବଂ ତାଙ୍କ ବନ୍ଧୁଙ୍କର ଏଭଳି ମୃତ୍ୟୁକୁ କେହି ସହଜରେ ଗ୍ରହଣ କରିନାହାନ୍ତି । ଏହା ପଛରେ କ୍ରେମଲିନ୍ ର ହାତ ଥାଇପାରେ ବୋଲି ଜାତୀୟ ଓ ଅନ୍ତର୍ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ଘଟଣାର ଗୁରୁତ୍ୱ ଦୃଷ୍ଟିରୁ କ୍ରାଇମବ୍ରାଞ୍ଚ ତଦନ୍ତ ପାଇଁ ଓଡିଶା ପୁଲିସ ଡିଜି ନିର୍ଦ୍ଦେଶ ଦେଇଛନ୍ତି ।
ସୂଚନା ଅନୁଯାୟୀ, ରୁଷିଆର ଅନ୍ୟତମ ଧନୀ ସାଂସଦ ପାଭେଲ ଆଣ୍ଟୋଭ୍ ତାଙ୍କର ୬୬ତମ ଜନ୍ମଦିନ ପାଳିବା ପାଇଁ ତିନି ବନ୍ଧୁ ଭ୍ଲାଦମିର୍ ବିନାନୋଭ, ପାନସେଙ୍କୋ ଏବଂ ଟୁରଭୋଙ୍କୁ ଧରି ଓଡ଼ିଶା ଆସିଥିଲେ । ଗତ ୧୯ ତାରିଖରେ ସେମାନେ ଦିଲ୍ଲୀରୁ ଓଡ଼ିଶାକୁ ଆସିଥିଲେ । ଦାରିଙ୍ଗିବାଡି ଓ ଅନ୍ୟ କିଛି ଜାଗା ବୁଲାବୁଲି କଲା ପରେ ୨୧ ତାରିଖରେ ରାୟଗଡ଼ା ଆସିଥିଲେ । ସେଠାରେ ସାଇ ଇଣ୍ଟରନ୍ୟାସନାଲ୍ ହୋଟେଲରେ ଦୁଇଟି ରୁମ୍ ରେ ଅବସ୍ଥାନ କରିଥିଲେ । ରୁମ୍ ନଂ ୨୦୩ରେ ପାଭେଲ୍ ଏବଂ ଭ୍ଲାଦମିରି ଥିଲା ବେଳେ ପାଖ ରୁମ୍ ରେ ଦମ୍ପତ୍ତି ପାନସେଙ୍କୋ ଏବଂ ଟୁରଭୋ ରହିଥିଲେ ।
୨୨ ତାରିଖ ସକାଳେ ଭ୍ଲାଦମିର୍ ବିଦାନୋଭ ହୋଟେଲ୍ ରୁମ୍ ରୁ ଅଚେତ ଅବସ୍ଥାରେ ଉଦ୍ଧାର ହୋଇଥିଲେ । ଡାକ୍ତରଖାନାରେ ତାଙ୍କୁ ମୃତ ଘୋଷଣା କରାଯାଇଥିଲା । ହୃଦଘାତ ଯୋଗୁଁ ତାଙ୍କର ମୃତ୍ୟୁ ହୋଇଥିବା ପୋଷ୍ଟମର୍ଟମ ରିପୋର୍ଟରୁ ଜଣାପଡ଼ିଛି । ପରିବାରର ସହମତିକ୍ରମେ ତାଙ୍କର ଶବକୁ ସେହି ରାୟଗଡ଼ାରେ ସତ୍କାର କରାଯାଇଥିଲା । ତେବେ ଦିନକ ପରେ ଅର୍ଥାତ ୨୪ ତାରିଖରେ ପାଭେଲ୍ ଆଣ୍ଟୋଭଙ୍କ ସନ୍ଦେହଜନକ ଅବସ୍ଥାରେ ମୃତ୍ୟୁ ହୋଇଥିଲା । ହୋଟେଲର ତିନି ମହଲା ଛାତରୁ ଖସିପଡ଼ି ସେ ଗୁରୁତର ଆହତ ହୋଇଥିଲେ । ଝରକା ବାଟେ ସେ ତଳକୁ ଖସିପଡ଼ିଥିବା ସନେ୍ଦହ କରାଯାଉଛି । ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲେ ମଧ୍ୟ ଡାକ୍ତର ମୃତ୍ୟୁ ଘୋଷଣା କରିଥିଲେ ।
ହୋଟେଲ ମାଲିକ କୌଶିକ ଠକ୍କର ଏବଂ ମ୍ୟାନେଜରଙ୍କ କହିବାନୁଯାୟୀ, ବନ୍ଧୁ ଭ୍ଲାଦମିରଙ୍କ ଆକସ୍ମିକ ମୃତ୍ୟୁ ପରେ ପାଭେଲ୍ ମାନସିକ ଭାବେ ଭାଙ୍ଗି ପଡ଼ିଥିଲେ । ୨୪ ତାରିଖ ଦିନ ତାଙ୍କୁ ଆମେ ତାଙ୍କୁ ପାଇ ନ ଥିଲୁ । ଖୋଜାଖୋଜି ପରେ ତଳେ ପଡ଼ିଥିବା ଦେଖିଲୁ । ତାଙ୍କୁ ତୁରନ୍ତ ହସ୍ପିଟାଲ୍ ନିଆଗଲା, ମାତ୍ର ଡାକ୍ତର ମୃତ୍ୟୁ ଘୋଷଣା କରିଥିଲେ । ପରିବାରର ସହମତି ଅନୁଯାୟୀ ରାୟଗଡ଼ାରେ ତାଙ୍କର ମଧ୍ୟ ଶବ ସତ୍କାର ହେବ ।
ରାୟଗଡ଼ା ପୁଲିସ ଏହି ମୃତ୍ୟୁ ଘଟଣାର ଛାନଭିନ୍ କରୁଥିଲା ବେଳେ ଆଜି ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ଏବଂ ଏସପି ଘଟଣାସ୍ଥଳ ଯାଞ୍ଚ କରିଛନ୍ତି । ସେପଟେ ଘଟଣାର କ୍ରାଇମବ୍ରାଞ୍ଚ ତଦନ୍ତ ପାଇଁ ଡିଜିପି ସୁନୀଲ ବଂଶଲ ପରବର୍ତ୍ତୀ ସମୟରେ ନିର୍ଦ୍ଦେଶ ଦେଇଛନ୍ତି । ପାଭେଲ୍ ଙ୍କ ମୃତ୍ୟୁ ପଛରେ ଷଡ଼ଯନ୍ତ୍ର ରହିଛି କି ନାହିଁ ତାହାର ତଦନ୍ତ ହେବ ।
ଋଷର ଅନ୍ୟତମ ବିତ୍ତଶାଳୀ ସାଂସଦ ତଥା କୋଟିପତି ବ୍ୟବସାୟୀ ପାଭେଲ୍ ରାଷ୍ଟ୍ରପତି ପୁତିନ୍ ଙ୍କର କଠୋର ସମାଲୋଚକ ଥିଲେ । ବ୍ୟବସ୍ଥା ବିରୋଧରେ ସ୍ପର ଉତ୍ତୋଳନ କରୁଥିଲେ । ମାନବାଧିକାର ପାଇଁ ଲଢ଼େଇ କରୁଥିଲେ । ୟୁକ୍ରେନ୍ ଉପରେ ଋଷର ପ୍ରଚଣ୍ଡ ଆକ୍ରମଣକୁ ସେ ଦୃଢ଼ ବିରୋଧ କରୁଥିଲେ ।
ପୂର୍ବ ଭାରତ ଏବଂ ଓଡ଼ିଶା ଆଦିବାସୀଙ୍କ ଜୀବନଶୈଳୀ ପରଖିବା ତାଙ୍କର ରୁଚି ଥିଲା । ପ୍ରାକୃତିକ ପରିବେଶକୁ ସେ ବହୁତ ଭଲ ପାଉଥିଲେ । ସେଥିପାଇଁ ଓଡ଼ିଶାର ପ୍ରାକୃତିକ ପରିବେଶ ଭିତରେ ଜନ୍ମଦିନ ପାଳିବା ପାଇଁ ଯୋଜନା କରିଥିଲେ । ରାୟଗଡ଼ାରୁ ସେ ଜୟପୁର ଆସିଥାନ୍ତେ ଏବଂ କୋରାପୁଟର ଅପୂର୍ବ ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିଥାନ୍ତେ ।