ଅସନ୍ତୁଷ୍ଟ କଂଗ୍ରେସିଆଙ୍କ ଖେଳ ଆରମ୍ଭ!

ଭୁୁବନେଶ୍ୱର: ଓଡ଼ିଶାରେ କଂଗ୍ରେସ ଉଧେଇବା ଅବସ୍ଥାରେ ନାହିଁ । ନେତୃତ୍ୱ ସଙ୍କଟ ଓ ଗୋଷ୍ଠୀ କନ୍ଦଳ ଦଳକୁ ରସତଳଗାମୀ କରିଦେଇଛି । ପାଖାପାଖି ଅଢ଼େଇ ଦଶନ୍ଧି ଧରି କ୍ଷମତାଛଡ଼ା ହୋଇଥିବା ଏହି ଦଳର ଗୋଷ୍ଠୀ କନ୍ଦଳ ପୁରୁଣା ରୋଗ ହୋଇଗଲାଣି । ନୂଆ ନେତୃତ୍ୱରେ ଦଳର ସଂଗଠନ ସବଳ ହେବା ବଦଳରେ ଆହୁରି ଦୁର୍ବଳର ସଙ୍କେତ ଦେଉଛି । ଯାହାର ଟ୍ରେଲର୍ ଆଜି ରାଜଧାନୀରେ ଦେଖିବାକୁ ମିଳିଛି । କଂଗ୍ରେସର କିଛି ଅସନ୍ତୁଷ୍ଟ ନେତାଙ୍କୁ ଗୋଟିଏ ମଞ୍ଚରେ ଦେଖିବାକୁ ମିଳିଛି । ପରିବର୍ତ୍ତିତ ଦଳର ଚରିତ୍ର ଓ ନେତୃତ୍ୱ ବିରୋଧରେ ସେମାନେ ବିଷ ଓଗାଳିଛନ୍ତି । ୨୦୨୪ ପାଇଁ ଏହା ଅସନ୍ତୁଷ୍ଟ କଂଗ୍ରେସିଆଙ୍କ ବିକଳ୍ପ ଭିତ୍ତିଭୂମି ବୋଲି କୁହାଯାଉଛି ।

କଂଗ୍ରେସର ବିଦ୍ରୋହୀ ବିଧାୟକ ମହମ୍ମଦ ମୋକିମ୍ ଙ୍କ ଆୟୋଜନରେ ଆଜି ଜୟଦେବଭନଠାରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । ବିଷୟବସ୍ତୁ ଥିଲା ‘ଜାନକୀବାବୁ ଓ ବସନ୍ତବାବୁଙ୍କ ଯୋଡି: ଓଡ଼ିଶା ରାଜନୀତିର ସୁବର୍ଣ୍ଣ ଯୁଗ’ ।

ଶ୍ରୀ ମୋକିମ୍ ଙ୍କ ସମେତ କଂଗ୍ରେସର ବରିଷ୍ଠ ନେତା ଚିରଞ୍ଜୀବ ବିଶ୍ୱାଳ, ପୂର୍ବତନ କଂଗ୍ରେସ ନେତା ତଥା ବିଜେଡି ବିଧାୟକ ସୌମ୍ୟରଂଜନ ପଟ୍ଟନାୟକ, ବରିଷ୍ଠ ସାମ୍ବାଦିକ ରବି ଦାସ ଏବଂ ସନ୍ଦୀପ ସାହୁ ମଞ୍ଚାସୀନ ଥିଲା ବେଳେ ମଞ୍ଚ ତଳେ ଅନ୍ୟମାନଙ୍କ ମଧ୍ୟରେ ଥିଲେ ନିରଞ୍ଜନ ପଟ୍ଟନାୟକ, ସ୍ୱର୍ଗତ ଜାନକୀ ବଲ୍ଲଭ ପଟ୍ଟନାୟକଙ୍କ ପୁଅ ପୃଥ୍ୱୀବଲ୍ଲଭ ପଟ୍ଟନାୟକ, ବରିଷ୍ଠ ବିଧାୟକ ସୁରେଶ ରାଉତରାୟଙ୍କ ପୁଅ ମନ୍ମଥ ରାଉତରାୟ ପ୍ରମୁଖ । ଜୟଦେବଭବନ ପ୍ରେକ୍ଷାଳୟରେ ସମର୍ଥକ ଓ ଦର୍ଶକଙ୍କ ଖଚାଖଚ ଭିଡ ହୋଇଥିଲା ।

କଂଗ୍ରେସର ବରିଷ୍ଠ ନେତା ଚିରଞୀବ ବିଶ୍ୱାଳ ଏହି ଖୋଲାମଞ୍ଚରୁ କଂଗ୍ରେସ ନେତୃତ୍ୱ ଉପରେ ମନଭରି ବର୍ଷିଥିଲେ । ସେ କହିଥିଲେ, ଦଳରେ ନେତୃତ୍ୱ ଓ ଲଢ଼ୁଆ ମନବୃତ୍ତିର ଅଭାବ ଦେଖାଦେଇଛି । ଦଳ ପ୍ରତି ଆକୃଷ୍ଟ ହୋଇ ଗୋଟିଏ ବି ଯୁବକ ଆସୁନାହାନ୍ତି । ଏଠି ବିଚିତ୍ର ଅବସ୍ଥା ଦେଖିବାକୁ ମିଳୁଛି । ଯେମିତିକି ଜଣେ ସଂଗଠନ କରିବ, ଆଉ ଜଣେ ଟିକେଟ ପାଇବ । ପିସିସି ସଭାପତି ଯିଏ ହେବ ସେ କାହାରିକୁ ପଚାରିବେ ନାହିଁ । ଦଳରେ ଏବେ ୯ ବିଧାୟକ । ହେଲେ ମୁଖ୍ୟମନ୍ତ୍ରୀ ପ୍ରାର୍ଥୀ ୨୦ ଜଣ । ୯ ରୁ ପୁଣି ୯୦ ବିଧାୟକ? ଆସନ୍ତା ନିର୍ବାଚନରେ ୧୪୭ ନିର୍ବାଚନମଣ୍ଡଳୀରେ ପ୍ରାର୍ଥୀ ଦେଇପାରିବନି ବୋଲି ଚିରଞ୍ଚୀବ କଟାକ୍ଷ କରିଥିଲେ ।

ନିରଞ୍ଜନ ପଟ୍ଟନାୟକ ତାଙ୍କ ବକ୍ତବ୍ୟରେ ମନର ଅସନ୍ତୋଷ ଠଉରେଇଥିଲେ । ସେ କହିଥିଲେ, ଏଠି ଠିକ୍ ଲୋକଙ୍କୁ ଠିକ୍ ସହଯୋଗ ମିଳୁନାହିଁ । ଏମିତି ହେଲେ ବିଜେଡି ସହ ଲଢ଼େଇ କରିବା କଷ୍ଟକର ବ୍ୟାପାର । ବିଧାୟକ ମହମ୍ମଦ ମୋକିମ୍ ମଧ୍ୟ କଂଗ୍ରେସ ନେତୃତ୍ୱ ବିରୋଧରେ ରୋକଠୋକ୍ କଥା ଶୁଣାଇଥିଲେ । ଏଠି ନେତୃତ୍ୱ କାନକୁହା କଥାରେ ନ ଭଳି ଯେଉଁଦିନ ବ୍ରଣ୍ଡ ମାଇଣ୍ଡରେ ସମସ୍ତଙ୍କୁ ସାଙ୍ଗରେ ନେଇ କାମ କରିବ ସେଦିନ ଦଳ ପାଇଁ ଭଲ ଦିନ ଆସିବ ବୋଲି କହିଥିଲେ ।

ଏକଦା କଂଗ୍ରେସରୁ ଅସନ୍ତୁଷ୍ଠ ହୋଇ ଦଳ ଛାଡ଼ିଥିବା ଜାନକୀବାବୁଙ୍କ ଜ୍ୱାଇଁ ତଥା ଏବେକାର ବିଜେଡି ବିଧାୟକ ସୌମ୍ୟରଂଜନ ପଟ୍ଟନାୟକ ଏହି ଆଲୋଚନାଚକ୍ରକୁ ଅତିଥି ହୋଇ ଆସିଥିଲେ ମଧ୍ୟ ଆୟୋଜନର ଉଦେ୍ଦଶ୍ୟ ସଂକ୍ରାନ୍ତରେ କିଛି ନ ଜାଣିଲା ଭଳି ପ୍ରଥମରୁ ଅଭିନୟ କରିଥିଲେ । ଜାଣିଥିଲେ ଏଠାକୁ ଆସିନଥାନ୍ତି ବୋଲି କହିଥିଲେ ।

ଜାନକୀବାବୁ ଓ ବସନ୍ତବାବୁଙ୍କ ଯୋଡିରେ ଶାସନ ଅମଳକୁ ପ୍ରଶଂସା କରିବା ସହ ଆଜିର ଶାସନ ବ୍ୟବସ୍ଥା ସହ ତୁଳନା କରିଥିଲେ । ରାଜ୍ୟ ଓ ଦେଶରେ ବର୍ତ୍ତମାନର ଶାସନବ୍ୟବସ୍ଥାରେ ଗଣତନ୍ତ୍ର ବଦଳରେ ବାବୁତନ୍ତ୍ରର ପ୍ରାଧାନ୍ୟ ବଢ଼ିଥିବା ସେ କହିଥିଲେ । ଓଡ଼ିଶାରେ ବିରୋଧୀ ଆଉ ଦଳ ହୋଇନାହାନ୍ତି ବୋଲି ସେ କଟାକ୍ଷ କରିବା ସହ ଜାନକୀବାବୁଙ୍କ ଜ୍ୱାଇଁ କହି ଆପଣମାନେ ମତେ ବହୁତ ନିର୍ଯ୍ୟାତନା ଦେଇଛନ୍ତି ବୋଲି ସୌମ୍ୟ କ୍ଷୋଭ ପ୍ରକଟ କରିଥିଲେ ।

କଂଗ୍ରେସିଆ ଅସନ୍ତୁଷ୍ଟଙ୍କ ମେଳି ଏବଂ ଏଥିରେ ସୌମ୍ୟଙ୍କ ଯୋଗଦାନକୁ ନେଇ ରାଜନୈତିକ ଚର୍ଚ୍ଚା ଜୋର୍ ଧରିଛି । ବିଜେଡିରେ ଅସନ୍ତୁଷ୍ଟ ଥିବା ସୌମ୍ୟ ଆଜି ତାଙ୍କ ବକ୍ତବ୍ୟରେ ରାଜ୍ୟର ଶାସନ ବ୍ୟବସ୍ଥା ଉପରେ ପୁନର୍ବାର କ୍ଷୋଭ ପ୍ରକାଶ କରିଥିଲେ । ତେବେ ସୌମ୍ୟଙ୍କର ଏହି ଆଚରଣରେ ନୂତନତ୍ୱ ନାହିଁ । ସେ ଯେଉଁ ଦଳରେ ରହିଛନ୍ତି ସେହି ଦଳ ବିରୋଧରେ ବିଦ୍ରୋହ କରିବାର ରେକର୍ଡ ଅଛି । କ୍ଷମତା ନିଶା ଏହାର କାରଣ ବୋଲି ତାଙ୍କଠାରେ ଅପବାଦ ଲାଗିଛି ।

ତେବେ ବିଜେଡି ଶାସନ ବ୍ୟବସ୍ଥା ବିରୋଧରେ ସୌମ୍ୟଙ୍କ ବିଷୋଦଗାର ଆଗାମୀ ଦିନରେ ତାଙ୍କ ପାଇଁ ନୂଆ ବିକଳ୍ପର ଚିନ୍ତା ଆଣିନାହିଁ ତ? ଅସନ୍ତୁଷ୍ଟ କଂଗ୍ରେସ ବିଧାୟକ ମୋକିମ୍ ଙ୍କ ଡାକରାରେ ଆଜିର ଆଲୋଚନାଚକ୍ରରେ ତାଙ୍କର ଯୋଗଦାନ ଏହି ବିକଳ୍ପର ଇସାରା ବୋଲି ଆଲୋଚନା ହେଉଛି ।