ଭୁବନେଶ୍ୱର: ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡ଼ରେ ଦଳର ସଫଳତାରେ ଉତ୍ସାହିତ ହୋଇଛନ୍ତି ଓଡ଼ିଶାର ବିଜେପି ନେତା । ଆଗାମୀ ନିର୍ବାଚନରେ ଓଡ଼ିଶାରେ ପଦ୍ମ ଫୁଟାଇ ସରକାର ଗଠନ କରିବାକୁ ସେମାନେ ଦମ୍ଭ ବାହାର କଲେଣି । ୨୪ ନିର୍ବାଚନ ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିବାକୁ ୧୯ ତାରିଖରେ ଦିଲ୍ଲୀ ବାହାରିଛନ୍ତି । ରାଜ୍ୟ ସଭାପତି ମନମୋହନ ସାମଲଙ୍କ ନେତୃତ୍ୱରେ ବିଜେପିର ୨୨ ଜଣ ଯାକ ବିଧାୟକ ଏବଂ ତିନି କେନ୍ଦ୍ରମନ୍ତ୍ରୀ ଏଥିରେ ସାମିଲ ହେବେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ୍ ଶାହ ଏବଂ ରାଷ୍ଟ୍ରୀୟ ସଭାପତି ଜେ.ପି. ନଡ୍ଡାଙ୍କୁ ଭେଟିବାର କାର୍ଯ୍ୟକ୍ରମ ସ୍ଥିର ହୋଇଛି ।
ଓଡ଼ିଶାରେ ବିଜେଡି ସହ ବିଜେପିର ଗୋପନ ସମ୍ପର୍କକୁ ନେଇ ଲୋକଙ୍କ ମଧ୍ୟରେ ଏକ ଧାରଣା ତିଆରି ହୋଇସାରିଛି । ବିଜେଡି ପ୍ରତି କଠୋର ଆଭିମୁଖ୍ୟ ପୋଷଣ ନ କଲେ ଏହି ଧାରଣା ବିଜେପିକୁ ଆଗାମୀ ନିର୍ବାଚନରେ ଘାଟା ହେବ ବୋଲି ରାଜ୍ୟ ନେତୃତ୍ୱ ଭଲଭାବେ ହୃଦୟଙ୍ଗମ କରିଛନ୍ତି । ହାଇକମାଣ୍ଡଙ୍କୁ ଏହା ଅବଗତ କରାଯିବ ଏବଂ ଆଗାମୀ ରଣନୀତି ସମ୍ପର୍କରେ ସ୍ପଷ୍ଟ ଆଦେଶ ଧରି ରାଜ୍ୟ ବିଜେପି ଏଠାରେ ଅଭିଯାନ ଅଭିଯାନ ଆରମ୍ଭ କରିବ ବୋଲି ଦଳର ଜଣେ ବରିଷ୍ଠ ନେତାଙ୍କ ସୂତ୍ରରୁ ଜଣାପଡ଼ିଛି ।
ବିଶେଷକରି ପ୍ରଧାନମନ୍ତ୍ରୀ ମୋହୀ, ଅମିତ ଶାହ ଏବଂ ନଡ୍ଡାଙ୍କ ମୁହଁରୁ ବିଜେଡି ଓ ନବୀନ ପଟ୍ଟନାୟକଙ୍କ ସରକାର ବିରୋଧରେ ଟାଣ କଥା ନ ଶୁଣିଲେ ଲୋକଙ୍କ ମନରେ ଜମାଟ ବାନ୍ଧିଥିବା ସନ୍ଦେହ ଦୂର ହେବନି । ସୁତରାଂ ଗତ ନିର୍ବାଚନ ବେଳେ ବିଜେଡି ପ୍ରତି ଦିଲ୍ଲୀରୁ ଯେଉଁ ଭଳି କଠୋର ଆଭିମୁଖ୍ୟ ଥିଲା ତାହା ଫେରାଇ ଆଣିବାକୁ ରାଜ୍ୟ ନେତାମାନେ ଆଶା ରଖିଥିବା କୁହାଯାଉଛି ।
ସୂଚନାଥାଉକି ଛତିଶଗଡ଼, ମଧ୍ୟପ୍ରଦେଶ ଏବଂ ରାଜସ୍ଥାନ ନିର୍ବାଚନରେ ଦଳର ସଫଳତା ରାଜ୍ୟ ନେତାଙ୍କୁ ଅତ୍ୟଧିକ ଉତ୍ସାହିତ କରିଛି । ଓଡ଼ିଶାରେ ଏଥର ବିଜେପି ସରକାର ନିଶ୍ଚିତ ବୋଲି ରାଜ୍ୟ ସଭାପତି ମନମୋହନ ସାମଲ ଏବଂ ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ଦମ୍ଭ ଦେଖାଇଛନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଆଜତକ ଚାନେଲର ଏକ କାର୍ଯ୍ୟକ୍ରମରେ ଯୋଗଦେଇ ଓଡ଼ିଶାରେ ୧୫ ରୁ ଅଧିକ ଲୋକସଭା ଆସନରେ ବିଜେପି ଜିତିବ ବୋଲି ଆକଳନ ଲଗାଇଛନ୍ତି । ଓଡ଼ିଶାରେ ସରକାର ଗଠନ ସମ୍ପର୍କରେ ସେଠାରେ କିଛି ମତାମତ ଦେଇ ନ ଥିଲେ ମଧ୍ୟ ଗତକାଲି ବାରଙ୍ଗଠାରେ ଅନୁଷ୍ଠିତ ଦଳୀୟ କାର୍ଯ୍ୟକ୍ରମରେ ଓଡ଼ିଶା ବିଧାନସଭାରେ ବିଜେପି ଏକ ନମ୍ବରରେ ରହିବ ବୋଲି କହି କର୍ମୀଙ୍କୁ ଉତ୍ସାହିତ କରିଛନ୍ତି । ତେବେ ବିଧାନସଭାରେ ଦଳକୁ କେତେ ଆସନ ମିଳିବ ଅନୁମାନ ଲଗାଇ ପାରିନାହାନ୍ତି ।
