ଡେରାବିଶ୍ ସିଡିପିଓ ମଣିଷ ନା ପଶୁ?

ନିରପେକ୍ଷ ତଦନ୍ତ ପାଇଁ କାର୍ଯ୍ୟରୁ ହଟିଲେ ସିଡିପିଓ

ଭୁବନେଶ୍ୱର: କେନ୍ଦ୍ରାପଡ଼ା ଜିଲ୍ଲା ଡେରାବିଶ ବ୍ଲକ୍ ସିଡିପିଓ ସ୍ନେହଲତା ସାହୁ । ଜଣେ ମହିଳା । ଅଫିସ୍ ର କିରାଣୀ ହେଉଛନ୍ତି ବର୍ଷା ପ୍ରିୟଦର୍ଶିନୀ ମହାପାତ୍ର । ଇଏ ବି ଜଣେ ମହିଳା । ୭ ମାସର ଗର୍ଭବତୀ ଥିଲେ । ଅଫିସ୍ ରେ କାମ କରୁଥିବା ବେଳେ ଗର୍ଭ ଯନ୍ତ୍ରଣାରେ ଛଟପଟ ହୋଇ ଡାକ୍ତରଖାନା ଯିବାକୁ ଛୁଟି ମାଗିଲେ । ମାତ୍ର ସିଡିପିଓ ମାଡାମ୍ ତାଙ୍କୁ ଗାଳି କରି ଛୁଟି ଦେବାକୁ ମନା କରିଦେଲେ । ବେଶୀ ରୋଲ୍ କରନା ବୋଲି ଟାପରା କଲେ । ଖବର ପାଇ ବର୍ଷାଙ୍କର ପରିବାର ଲୋକ ସେଠାରେ ପହଞ୍ଚି ଗୁରୁତର ବର୍ଷାଙ୍କୁ ଡାକ୍ତରଖାନା ନେଇ ଆସିଲେ । ମାତ୍ର ସେତେବେଳକୁ ତାଙ୍କ ଗର୍ଭସ୍ଥ ଶିଶୁର ମୃତ୍ୟୁ ହୋଇସାରିଥିଲା ।

ଗତ ୨୫ ତାରିଖରେ ଘଟଣା ଘଟିଥିବା ଅଭିଯୋଗ ହୋଇଛି । ସୋସିଆଲ୍ ମିଡିଆରେ ଏହାର ଏକ ଭିଡିଓ ଭାଇରାଲ୍ ହେବା ପରେ ସମସ୍ତଙ୍କ ଛାତି ଥରାଇ ଦେଇଛି । ସଂପୃକ୍ତ ସିଡିପିଓ ମଣିଷ ନା ପଶୁ ବୋଲି ପ୍ରଶ୍ନ ଉଠିଛି । ଅଭିଯୋଗ ସତ୍ୟ ହୋଇଥିଲେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ସବୁ ମହଲରୁ ଦାବି ହୋଇଛି ।

ଅଭିଯୋଗକାରିଣୀ ହେଉଛନ୍ତି ନିଜେ ବର୍ଷା ପ୍ରିୟଦର୍ଶିନୀ ମହାପାତ୍ର । ୨୫ ତାରିଖରେ ଅଫିସ୍ ରେ ସେ କାମ କରୁଥିବା ବେଳେ ଗର୍ଭ ଯନ୍ତ୍ରଣାରେ ଛଟପଟ ହୋଇଥିଲେ । ସେ ୭ ମାସର ଗର୍ଭବତୀ ଥିଲେ ଏବଂ ଅଚାନକ ତାଙ୍କର ପ୍ରସବ ଯନ୍ତ୍ରଣା ହୋଇଥିଲା । ଏହା ସିଡିପିଓଙ୍କୁ ଜଣାଇବା ସହ ଘର ଲୋକଙ୍କୁ ମଧ୍ୟ ଖବର ଦେଇଥିଲେ । ଘର ଲୋକ ଆସି ପହଞ୍ଚି ସାରିଥିଲେ ମଧ୍ୟ ଡାକ୍ତରଖାନା ଯିବାକୁ ସିଡିପିଓ ତାଙ୍କୁ ଛୁଟି ଦେଇ ନ ଥିଲେ । ବହୁତ ରୋଲ୍ କରୁଛ କହି ଓଲଟି ଚିଲେଇଥିଲେ । ଯନ୍ତ୍ରଣାରେ ଛଟପଟ ହେଲା ବେଳେ ପାଣି ମଧ୍ୟ ଦେଇ ନ ଥିଲେ । ଯିଏ ପାଣି ଦେଲେ ଓଲଟି ତାଙ୍କୁ ଗାଳି କରିଥିଲେ ।

ତାଙ୍କର ଏଭଳି ଅବସ୍ଥାରେ ଘର ଲୋକ ତାଙ୍କୁ ଏକ ଘରୋଇ ଡାକ୍ତରଖାନାକୁ ନେଇ ଆସିଥିଲେ । ଡାକ୍ତର ତୁରନ୍ତ ତାଙ୍କର ପ୍ରସବ କରାଇଥିଲେ ମଧ୍ୟ ଶିଶୁଟିର ମୃତ୍ୟୁ ହୋଇସାରିଥିଲା । ନିଷ୍ପାପ ଶିଶୁର ମୃତ୍ୟୁ ପାଇଁ ସିଡିପିଓଙ୍କୁ ସିଧାସଳଖ ଦାୟୀ କରିଛନ୍ତି ବର୍ଷା । ଗର୍ଭ ଯନ୍ତ୍ରଣାରେ ସେ ଛଟପଟ ହେଉଥିଲା ବେଳେ ସିଡିପିଓ ଟେବୁଲ୍ ବାଡ଼େଇ ତାଙ୍କୁ ଗାଳି କରିବାରୁ ତାଙ୍କର ହାର୍ଟ ବିଟ୍ ବଢ଼ିଯାଇଥିଲା ଏବଂ ସେ ଅଚେତ ହୋଇଯାଇଥିଲେ । ପୂର୍ବରୁ ମଧ୍ୟ ବାରମ୍ବାର ତାଙ୍କ ଉପରେ ଏଭଳି ଅତ୍ୟାଚାର କରି ଆସୁଥିଲେ । ଡାକ୍ତରଙ୍କ ମତରେ ଗର୍ଭସ୍ଥ ଶିଶୁର ମୃତ୍ୟୁ ପାଇଁ ଏହା କାରଣ ବୋଲି ବର୍ଷା କହିଛନ୍ତି ।

ଗର୍ଭସ୍ଥ ଶିଶୁକୁ ହରାଇବା ପରେ ବର୍ଷାଙ୍କ ଆଖିରୁ ଲୁହ ଶୁଖୁନି । ଏଭଳି ବସ୍ ଙ୍କ ପାଖରେ ଚାକିରି କରି ମନସ୍ତାପରେ ଘାରି ହେଉଛନ୍ତି । ସିଡିପିଓ ସ୍ନେହଲତା ସାହୁ କ’ଣ ପାଇଁ ତାଙ୍କୁ ଏଭଳି ନିର୍ଯ୍ୟାତନା ଦେଉଥିଲେ ବୋଲି ସାମ୍ବାଦିକଙ୍କ ପ୍ରଶ୍ନରେ ସେ ସଙ୍ଗୀନ ଅଭିଯୋଗ ଆଣିଛନ୍ତି । ସିଡିପିଓ ବିଭିନ୍ନ ଦୁର୍ନୀତିରେ ଲିପ୍ତ ଅଛନ୍ତି । ତାଙ୍କୁ କିଭଳି ମିଥ୍ୟା ବିଲ୍ କରିବାକୁ ବାଧ୍ୟ କରୁଥିଲେ, ତାହାର ଉଦାହରଣ ଦେଇ ସେ କହିଛନ୍ତି ଯେ ଅଫିସ୍ ପାଇଁ ନୂଆ ଗଡ଼ରେଜ୍ ଆଲମାରୀ କିଣା ହୋଇ ନ ଥିଲେ ମଧ୍ୟ ସେ ବାବଦରେ ୨୨ ହଜାର ଟଙ୍କାର ବିଲ୍ କରାଯାଇଛି । ଗାଡି ଚାଲୁନି, ହେଲେ ତେଲ ଖର୍ଚ୍ଚର ବିଲ୍ ହେଉଛି । ଏଭଳି କାର୍ଯ୍ୟକୁ ପ୍ରଥମରୁ ସେ ବିରୋଧ କରିବାରୁ ସିଡିପିଓଙ୍କ ଆକ୍ରୋଶର ଶିକାର ହୋଇଛନ୍ତି ।

ପରିଣାମସ୍ୱରୂପ ସିଡିପିଓ ତାଙ୍କୁ କଥା କଥାକେ ଗାଳି କରୁଥିଲେ । ବ୍ୟକ୍ତିଗତ କଥା କହି ଆକ୍ଷେପ କରୁଥିଲେ । ଛୁଟି ଦେଉ ନ ଥିଲେ । ଅଫିସ୍ ରେ ତାଙ୍କୁ ପ୍ରବଳ ମାନସିକ ନିର୍ଯ୍ୟାତନା ଦେଉଥିଲେ । ଏହାକୁ ସେ ଘରଲୋକଙ୍କୁ କହି ନ ପାରି ସବୁଦିନ ଏକୁଟିଆ ଭୀଷଣ କାନ୍ଦୁଥିଲେ ଏବଂ ଚାକିରିର ଆବଶ୍ୟକତାକୁ ମୁଣ୍ଡରେ ରଖି ମନକୁ ବୁଝାଇ ଦେଉଥିଲେ । ଘଟଣାର ୪ ଦିନ ପୂର୍ବରୁ ତାଙ୍କର ନିର୍ଯ୍ୟାତନା ବଢ଼ି ଯାଇଥିଲା, ଯାହା ତାଙ୍କ ଗର୍ଭସ୍ଥ ଶିଶୁର ଜୀବନ ନେଇଗଲା ବୋଲି ସେ ଗଣମାଧ୍ୟମକୁ କାନ୍ଦି କାନ୍ଦି କହିଛନ୍ତି ।

ତେବେ ବର୍ଷାଙ୍କ ଅଭିଯୋଗକୁ ଅତି ସନ୍ତର୍ପଣରେ ଉଡ଼ାଇ ଦେଇଛନ୍ତି ସିଡିପିଓ ମ୍ୟାଡାମ୍ । ବର୍ଷାଙ୍କ ଅଭିଯୋଗର ସତ୍ୟତା ନାହିଁ ବୋଲି ଗଣମାଧ୍ୟକୁ ପ୍ରତିକ୍ରିୟା ଦେଇ ଓଲଟି ବର୍ଷାଙ୍କ କାର୍ଯ୍ୟ ଦକ୍ଷତା ଉପରେ ଅଙ୍ଗୁଳି ଉଠାଇଛନ୍ତି । ସେଦିନ ଅଫିସରେ ବର୍ଷାଙ୍କ ସମ୍ପର୍କୀୟଙ୍କ ସହ ତାଙ୍କର ଉଚ୍ଚବାଚର ଯେଉଁ ଭିଡିଓଟି ଭାଇରାଲ୍ ହୋଇଛି, ତାହା ଫେକ୍ ଭିଡିଓ ବୋଲି ମଧ୍ୟ ସଫେଇ ଦେଇଛନ୍ତି । ଭିଡିଓଟି ଏଡିଟ୍ କରାଯାଇଛି ବୋଲି ତାଙ୍କର ଯୁକ୍ତି ।

ଏହି ସମ୍ବେଦନଶୀଳ ମାମଲାକୁ ଜିଲ୍ଲା ପ୍ରଶାସନ ଗୁରୁତ୍ୱର ସହ ନେଇଛି । ବର୍ଷା ପ୍ରିୟଦର୍ଶିନୀଙ୍କ ଅଭିଯୋଗର ତଦନ୍ତ ପାଇଁ ଏକ ତିନିଜଣିଆ କମିଟି ଗଠନ କରାଯାଇଛି । କମିଟିର ରିପୋର୍ଟ ଆସିବା ପରେ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲା ସମାଜ ମଙ୍ଗଳ ଅଧିକାରୀ ମନୋରମା ସ୍ୱାଇଁ କହିଛନ୍ତି ।

ଶେଷ ଖବର ଅନୁଯାୟୀ, ଏହି ଘଟଣାକୁ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ମଧ୍ୟ ଗୁରୁତ୍ୱର ସହ ଗ୍ରହଣ କରିଛନ୍ତି । ମାମଲାର ତଦନ୍ତ କରି ତୁରନ୍ତ ରିପୋର୍ଟ ଦେବାକୁ କେନ୍ଦ୍ରାପଡ଼ା ଜିଲ୍ଲାପାଳଙ୍କୁ ସେ ନିର୍ଦ୍ଦେଶ ଦେଇଛନ୍ତି ।

ସିଡିପିଓଙ୍କୁ ଅପସାରଣ: ଘଟଣାର ନିରପେକ୍ଷ ତଦନ୍ତ ପାଇଁ ସିଡିପିଓ ସ୍ନେହଲତା ସାହୁଙ୍କୁ ବ୍ଲକ୍ ଅଫିସରୁ ଆଜି ଅପସାରଣ କରାଯାଇଛି । ତଦନ୍ତ ରିପୋର୍ଟ ଆସିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ତାଙ୍କ ଏକ୍ସ ଆକାଉଣ୍ଟରେ ସୂଚନା ଦେଇଛନ୍ତି ।

ସିଡିପିଓ ଶ୍ରୀମତୀ ସାହୁଙ୍କ ବିରୋଧରେ ଇତିମଧ୍ୟରେ ଦୁର୍ନୀତିର ଲମ୍ବା ଅଭିଯୋଗ ଆସିବାରେ ଲାଗିଲାଣି । ଚାକିରି ନାଁରେ ସେ କିଛି ଜଣଙ୍କଠାରୁ ଟଙ୍କା ଆତ୍ମସାତ୍ କରିଥିବା ଅଭିଯୋଗ ଆସିଛି ।