ଭୁବନେଶ୍ୱର: ସୂଚନା ଓ ଲୋକସମ୍ପର୍କ ନିର୍ଦ୍ଦେଶକ ଭାବେ ଗତ ମାସରେ ନିଯୁକ୍ତି ପାଇଥିଲେ ଦେବପ୍ରସାଦ ଦାଶ । ଏହି ପଦବୀରେ ଆସନ୍ତାକାଲି ତାଙ୍କର ମାସେ ପୂରିଥାନ୍ତା । ମାତ୍ର ଆଜି ସଂଧ୍ୟାରେ ରାଜ୍ୟ ସରକାର ତାଙ୍କୁ ଅଚାନକ ହଟାଇ ତାଙ୍କର ମୂଳ ପଦବୀ ଓଡ଼ିଆ ଭାଷା, ସାହିତ୍ୟ ଏବଂ ସଂସ୍କୃତି ବିଭାଗରେ ସୀମିତ ରଖିଛନ୍ତି ।
ଗତ ଏପ୍ରିଲ୍ ୨୨ ତାରିଖରେ ରାଜ୍ୟ ସରକାର ଏକ ନିର୍ଦ୍ଦେଶନାମାରେ ଶ୍ରୀ ଦାଶଙ୍କୁ ସ୍ୱତନ୍ତ୍ର ସଚିବ ପାହ୍ୟାକୁ ପଦୋନ୍ନତି ଦେଇ ସୂଚନା ଓ ଲୋକସମ୍ପର୍କ ବିଭାଗର ନିର୍ଦ୍ଦେଶକ ଭାବେ ନିଯୁକ୍ତି ଦେଇଥିଲେ । ଓଡ଼ିଆ ଭାଷା, ସାହିତ୍ୟ ଏବଂ ସଂସ୍କୃତି ବିଭାଗରେ ମୂଳ ନିଯୁକ୍ତି ସହ ଏହା ଥିଲା ତାଙ୍କର ଅତିରିକ୍ତ ଦାୟିତ୍ୱ । ଫେବ୍ରୁଆରୀ ୨୮ ରେ ସରୋଜ ସାମଲଙ୍କ ଅବସର ପରଠାରୁ ସୂଚନା ଓ ଲୋକସମ୍ପର୍କ ନିର୍ଦ୍ଦେଶକ ପଦବୀ ଖାଲି ଥିଲା । ଦେବପ୍ରସାଦ ଦାଶ ଦାୟିତ୍ୱ ନେବା ପରେ ବିଭାଗ ଚଳଚଞ୍ଚଳ ହୋଇଥିଲା ।
ବିଜେଡି ସରକାରରେ ଶ୍ରୀ ଦାଶ ଦୀର୍ଘ ୬ ବର୍ଷ ଧରି ଚାକିରିରୁ ନିଲମ୍ବିତ ଥିଲେ । ବିଜେପି ସରକାର ଆସିବା ପରେ ତାଙ୍କ ଉପରୁ ନିଲମ୍ବନ ଉଠାଇ ଓଡ଼ିଆ ଭାଷା, ସାହିତ୍ୟ ଏବଂ ସଂସ୍କୃତି ବିଭାଗରେ ନିଯୁକ୍ତି ଦେଇଥିଲେ । ମାସେ ତଳେ ସୂଚନା ଓ ଲୋକସମ୍ପର୍କ ବିଭାଗରେ ତାଙ୍କୁ ଅତିରିକ୍ତ ଦାୟିତ୍ୱ ମିଳିଥିଲା । ଜଣେ ଦକ୍ଷ ଅଫିସର ଭାବେ ଜଣାଶୁଣା ଶ୍ରୀ ଦାଶଙ୍କ କାର୍ଯ୍ୟକାଳ ସେଠାରେ ମାସେ ନ ପୂରୁଣୁ ରାଜ୍ୟ ସରକାର ତାଙ୍କୁ ଅଚାନକ ହଟାଇବା ପଛର କାରଣକୁ ନେଇ ଜୋରଦାର ଚର୍ଚ୍ଚା । ଆଗକୁ ରଥଯାତ୍ରା ଏବଂ ମୋହନ ମାଝୀ ସରକାରଙ୍କ ବର୍ଷ ପୂର୍ତ୍ତି ଉତ୍ସବ ଆୟୋଜନ ଭଳି ସୂଚନା ଓ ଲୋକସମ୍ପର୍କ ବିଭାଗ ହାତରେ ଗୁରୁ ଦାୟିତ୍ୱ ଥିବା ବେଳେ ଅଚାନକ ନିର୍ଦ୍ଦେଶକଙ୍କୁ ହଟାଇବା ଅନେକଙ୍କୁ ସହଜ ମନେ ହେଉନାହିଁ ।
ସରକାରଙ୍କ ବର୍ଷ ପୂର୍ତ୍ତି ଉତ୍ସବ କାମର ଟେଣ୍ଡରକୁ ନେଇ କିଛି ଗଡ଼ବଡ଼ ହୋଇଥିବା ଶୁଣିବାକୁ ମିଳୁଛି । ଯେଉଁଥିପାଇଁ ଶ୍ରୀ ଦାଶ ବଳି ପଡ଼ିଛନ୍ତି । ତେବେ ଏ ନେଇ ସଠିକ ସୂଚନା ମିଳିପାରିନାହିଁ ।
ସୂଚନା ଓ ଲୋକସମ୍ପର୍କ ବିଭାଗର ନୂଆ ନିର୍ଦ୍ଦେଶକ ଭାବେ ନିଯୁକ୍ତି ପାଇଛନ୍ତି ଅନୁଜ କୁମାର ଦାସ ପଟ୍ଟନାୟକ । ପିଏମ୍ ପୋଷଣ ଏବଂ ଏମଏମ ପୋଷଣର ରାଜ୍ୟ ନୋଡାଲ୍ ଅଫିସର ଭାବେ ସେ କାର୍ଯ୍ୟ କରୁଥିଲେ । ଏହି ଜାଗାକୁ ବଦଳି ହୋଇଛନ୍ତି ସୁରେନ୍ଦ୍ର କୁମାର ପଣ୍ଡା । ସେ ବର୍ତ୍ତମାନ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ସ୍ୱତନ୍ତ୍ର ସଚିବ ଭାବେ କାର୍ଯ୍ୟ କରୁଛନ୍ତି ।
ଖୋର୍ଦ୍ଧା ଜିଲ୍ଲା ଟାଙ୍ଗୀର ପୂର୍ବତନ ତହସିଲଦାର ଶ୍ରୀମତୀ ମିତାଲି ପାତ୍ରଙ୍କୁ ବାରିପଦା ସିଡିଏମ ଆଣ୍ଡ ପିଏଚଓର ପ୍ରଶାସନିକ ଅଧିକାରୀ ଭାବେ ନିଯୁକ୍ତି ମିଳିଛି । ରାୟଗଡ଼ା ଆଇଟିଡିଏ ପିଏ ଭାବେ ଅଜୟ କୁମାର ପ୍ରଧାନଙ୍କ ବଦଳି ବାତିଲ ହୋଇଛି । ସେ ପୂର୍ବଭଳି ଗୁଣୁପୁର ଆଇଟିଡିଏ ପିଏ ଭାବେ କାର୍ଯ୍ୟ କରିବେ ।
