‘ଏସଆଇଆରର ପୁନଃସମୀକ୍ଷା ହେଉ’
ଭୁବନେଶ୍ୱର: ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କ “ଭୋଟ ଚୋରି”‘ କେଳେଙ୍କାରୀକୁ ନେଇ ସାରା ଦେଶ ହୁଲସ୍ତୁଲ । ବିରୋଧୀ ଦଳ ନେତା ରାହୁଲ ଗାନ୍ଧୀ ତାଙ୍କୁ ‘ଦେଶଦ୍ରୋହୀ’ ଆଖ୍ୟା ଦେଇ ଇସ୍ତଫା ଦାବି କରିଛନ୍ତି । କକ୍ରୋଚ୍ ପାର୍ଟି ତାଙ୍କୁ ୨୪ ଘଣ୍ଟାର ମହଲତ ଦେଇଛନ୍ତି । ଏ ପ୍ରସଙ୍ଗରେ ବିଜେଡି ସଭାପତି ନବୀନ ପଟ୍ଟନାୟକ ଆଜି ମୁହଁ ଖୋଲିଛନ୍ତି । ମୁଖ୍ୟ ନିର୍ବାଚନ କମିସନର(ସିଇଓ)ଙ୍କ ଇସ୍ତଫା ଦାବି କରି ଏସଆଇଆର ପ୍ରକ୍ରିୟାର ପୁନଃସମୀକ୍ଷା ଆବଶ୍ୟକ ବୋଲି ମତ ଦେଇଛନ୍ତି । ଏସଆଇଆର୍ କାର୍ଯ୍ୟକ୍ରମକୁ ବିଜେଡି ପ୍ରଥମରୁ ବିରୋଧ କରୁଛି । ଏହି କାର୍ଯ୍ୟକ୍ରମରେ ବ୍ୟାପକ ଅନିୟମିତତା ହୋଇଛି ବୋଲି ସେ କହିଛନ୍ତି ।
ସେହିଭଳି, ଏମଏମଡିଆର ପ୍ରସଙ୍ଗରେ ଦଳର କଠୋର ଆଭିମୁଖ୍ୟ ଦୋହରାଇଛନ୍ତି ନବୀନ । ସଂସଦରେ ସଂଶୋଧନ ବିଲ୍ ପାରିତ ବେଳେ ବିଜେପିର ୨୦ ସାଂସଦ ଚୁପ୍ ରହିବାକୁ ସେ ନାପସନ୍ଦ କରିବା ସହ ଏହାର ପୁନଃ ସମୀକ୍ଷା ପାଇଁ ସରକାରଙ୍କ ଉପରେ ଚାପ ପକାଯିବ ବୋଲି କହିଛନ୍ତି । ଏମଏମଡିଆର ସଂଶୋଧନ ଆଇନ ରାଜ୍ୟର ରାଜସ୍ୱ ପାଇଁ ବଡ଼ କ୍ଷତି ଆଣିବ ବୋଲି ନବୀନ ତାଙ୍କ ପ୍ରତିକ୍ରିୟାରେ କହିଛନ୍ତି ।
ସୂଚନାଥାଉକି,ଏମଏମଡିଆର ସଂଶୋଧନ ବିଲ୍ କୁ ନବୀନ ପ୍ରଥମରୁ ବିରୋଧ କରି ଆସୁଛନ୍ତି । ଏ ସମ୍ପର୍କରେ ଆଲୋଚନା ପାଇଁ ବିଧାନସଭାର ସ୍ୱତନ୍ତ୍ର ଅଧିବେଶନ ଡାକିବାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଆଗ ଚିଠି ଲେଖିଥିଲେ । ଏହା ପରେ ବିଜେପି ସାଂସଦମାନଙ୍କୁ ଚିଠି ଲେଖି ଦଳମତ ନିର୍ବିଶେଷରେ ଓଡ଼ିଶା ମାଟିର ସ୍ୱାର୍ଥ ପାଇଁ କାମ କରିବାକୁ ପରାମର୍ଶ ଦେଇଥିଲେ । ନିକଟରେ ବିଧାନସଭାରେ ଏମଏମଡିଆର ଉପରେ ମୋସନ୍ ଆଣି ସ୍ୱତନ୍ତ୍ର ଆଲୋଚନା କରିବାକୁ ମୁଖ୍ୟମନ୍ତ୍ରୀଙ୍କୁ ଆଉ ଏକ ଚିଠି ଲେଖିଥିଲେ ।
ଏହି ପ୍ରସଙ୍ଗକୁ ନେଇ ବିଧାନସଭାରେ ବିଜେଡି ପ୍ରତିବାଦ ଜାରି ରଖିଛି । ବିଧାନସଭା ଆରମ୍ଭରୁ କଂଗ୍ରେସ ଏହା ବିରୋଧରେ ସ୍ୱର ଉଠାଇଥିବା ବେଳେ ଏବେ ଉଭୟ ଦଳର ଏହା ମୁଖ୍ୟ ପ୍ରସଙ୍ଗ ହୋଇଛି । ଲଗାତର ଚତୁର୍ଥ ଦିନ ପାଇଁ ଆଜି ବିଧାନସଭା ଅଚଳ ହୋଇଛି । କଂଗ୍ରେସ ବିଧାୟକମାନେ ପ୍ଲାକାର୍ଡ ଧରି ଗୃହରେ ପ୍ରତିବାଦ ଜାରି ରଖିଥିବା ବେଳେ ବିଜେଡି ବିଧାୟକମାନେ ରାଜରାସ୍ତାକୁ ଓହ୍ଲାଇ ପ୍ରତିବାଦ କରୁଛନ୍ତି । ଗତକାଲି ଓଏଏମସି ଅଫିସ ଆଗରେ ଅର୍ଥନୈତିକ ଅବରୋଧ ଆନ୍ଦୋଳନ କରିଥିଲେ । ଆଜି ଏଜି ଛକରେ ଧାରଣା ଦେଇଛନ୍ତି ।
ଏମଏମଡିଆର ସଂଶୋଧନ ଆଇନ ପ୍ରତ୍ୟାହାର ନହେଲା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ଏବଂ ଆଗକୁ ବ୍ୟାପକ ହେବ ବୋଲି ଉଭୟ ବିଜେଡି ଓ କଂଗ୍ରେସ ପକ୍ଷରୁ ଚେତାବନୀ ଦିଆଯାଇଛି ।
