କାଲି ଓଡ଼ିଶା ବନ୍ଦ

ଭୁବନେଶ୍ୱର: କଂଗ୍ରେସ ନେତୃତ୍ୱରେ ‘ଇଣ୍ଡି’ ମେଣ୍ଟ ପକ୍ଷରୁ ଆସନ୍ତାକାଲି ଓଡ଼ିଶା ବନ୍ଦ ଡାକରା ଦିଆଯାଇଛି । ଏମଏମଡିଆର ସଂଶୋଧନ ଆଇନକୁ ସମ୍ପୂର୍ଣ୍ଣ ରଦ୍ଦ କରିବା, ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କୁ ତୁରନ୍ତ ବରଖାସ୍ତ, ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଏବଂ ବନ୍ୟା ପ୍ରଭାବିତ ସମସ୍ତ ଲୋକଙ୍କୁ ତୁରନ୍ତ ରିଲିଫ୍ ଓ ପୁନର୍ବାସ ସହାୟତା ଯୋଗାଇବା ଦାବିରେ ଏହି ବନ୍ଦ ପାଳନ କରାଯିବ । ଶାନ୍ତିପୂର୍ଣ୍ଣ ଓ ଶୃଙ୍ଖଳିତ ବନ୍ଦ ପାଳନ ପାଇଁ ରାଜ୍ୟବାସୀଙ୍କୁ ନିବେଦନ କରାଯାଇଛି ।

ଗାଡ଼ି ଚଳାଚଳ, ଦୋକାନ ବଜାର, ଅଦାଲତ, ସରକାରୀ ଓ ବେସରକାରୀ କାର୍ଯ୍ୟାଳୟ ବନ୍ଦ ରଖିବା ପାଇଁ ଇଣ୍ଡି ମେଣ୍ଟ ପକ୍ଷରୁ ନିବେଦନ କରାଯାଇଛି । ତେବେ ହସ୍ପିଟାଲ, ଆମ୍ବୁଲାନ୍ସ, ଅଗ୍ନିଶମ ସେବା, ଔଷଧ ଦୋକାନ ତଥା ଅନ୍ୟାନ୍ୟ ଅତ୍ୟାବଶ୍ୟକ ସେବା ବନ୍ଦରୁ ବାଦ୍ ଦିଆଯିବ । ଓଡ଼ିଶା ବନ୍ଦକୁ ସଫଳ କରିବା ପାଇଁ ଆଜି ସଂଧ୍ୟାରେ ରାଜଧାନୀରେ କଂଗ୍ରେସ ପକ୍ଷରୁ ମଶାଲ ଶୋଭାଯାତ୍ରା ଅନୁଷ୍ଠିତ ହୋଇଛି ।

ଅଟୋ ଚାଳକ ସଂଘ ଆନ୍ଦୋଳନରେ ସାମିଲ ହେବାକୁ ଘୋଷଣା କରିଥିବା ବେଳେ ଘରୋଇ ବସ୍ ମାଲିକ ସଂଘ ସାମିଲ ହେବ ନାହିଁ ବୋଲି ଘୋଷଣା କରିଛି । ଆସନ୍ତାକାଲି ଅଟୋ ବନ୍ଦ ନେଇ ସୂଚନା ଦେଇଛନ୍ତି ଅଟୋ ଚାଳକ ସଂଘର ସମ୍ପାଦକ । ସେହିଭଳି ଓଡ଼ିଶା ବନ୍ଦରେ ସାମିଲ ହେବ ନାହିଁ ବୋଲି ଘରୋଇ ବସ୍ ମାଲିକ ସଂଘ ସଭାପତି ଲୋକନାଥ ପାଣି କହିଛନ୍ତି । ବସ୍ ଏକ ଅତ୍ୟାବଶ୍ୟକ ସେବା ହୋଇଥିବାରୁ ବନ୍ଦରେ ସାମିଲ ହେବୁ ନାହିଁ ବୋଲି ସେ କହିଛନ୍ତି । ଘରୋଇ ବସ୍ ଗଡ଼ିବ, ଯାତ୍ରୀ ପରିବହନ ଜାରି ରହିବ ବୋଲି ସେ ଜଣାଇବା ସହ ସେଥିପାଇଁ ସରକାରଙ୍କଠାରୁ ସୁରକ୍ଷା ଲୋଡ଼ିଛନ୍ତି ।

ଓଡ଼ିଶା ବନ୍ଦକୁ ବିଜେଡି ସମର୍ଥନ କରିବ ନାହିଁ ବୋଲି ଘୋଷଣା କରିଥିବାରୁ ଏହାର ପ୍ରଭାବକୁ ନେଇ ଚର୍ଚ୍ଚା, ଆଲୋଚନା ଜାରି ରହିଛି । ଓଡ଼ିଶା ବନ୍ଦକୁ ଲୋକଙ୍କର ସ୍ୱତଃସ୍ପୃତ ସମର୍ଥନ ରହିଲେ ତାହା କଂଗ୍ରେସର ଶକ୍ତିବୃଦ୍ଧି ବୋଲି ଧରାଯିବ । ଏହି ଦୃଷ୍ଟିରୁ ରାଜନୈତିକ ଛକାପଂଝା ଲାଗି ରହିଛି ।

ବିଜେଡିର ୟୁ-ଟର୍ଣ୍ଣ: ଆଗ ହଁ, ପରେ ନାଁ

‘ଇଣ୍ଡି’ ମେଣ୍ଟ ପକ୍ଷରୁ ଡାକରା ଦିଆଯାଇଥିବା ଓଡ଼ିଶା ବନ୍ଦକୁ ସମର୍ଥନ କରିବ ବୋଲି ବିଜେଡି ଆଜି ପ୍ରଥମେ ଘୋଷଣା କରିଥିଲା । ହେଲେ ଅଧଘଣ୍ଟା ପରେ ନାଁ କହିିଦେଲା । ଗତକାଲି ନୂଆଦିଲ୍ଲୀରେ “ଇଣ୍ଡି’ ମେଣ୍ଟ ପକ୍ଷରୁ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଅନୁଷ୍ଠିତ ଆନ୍ଦୋଳନରେ ବିଜେଡି ସାମିଲ ହୋଇଥିବା ବେଳେ ରାଜ୍ୟରେ କିନ୍ତୁ ଦଳର ଆଭିମୁଖ୍ୟ ଚର୍ଚ୍ଚାର ବିଷୟ ହୋଇଛି ।

କାଲିର ଓଡ଼ିଶା ବନ୍ଦକୁ ବିଜେଡି ସମର୍ଥନ କରିବ ବୋଲି ଦଳର ମୁଖ୍ୟ ସଚେତକ ଶ୍ରୀମତୀ ପ୍ରମିଳା ମଲ୍ଲିକ ଆଜି ପ୍ରଥମେ ଗଣମାଧ୍ୟମକୁ ବାଇଟ୍ ଦେଇଥିଲେ । ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ‘ଇଣ୍ଡି’ ମେଣ୍ଟ ସହ ଆମେ ଅଛୁ । ଏହି ପ୍ରସଙ୍ଗରେ ଓଡ଼ିଶା ବନ୍ଦକୁ ସମର୍ଥନ କରାଯିବ । ତେବେ ବିଧିବଦ୍ଧ ଘୋଷଣାକୁ ଅପେକ୍ଷା କରିବାକୁ କହିଥିଲେ । ଅଧଘଣ୍ଟା ପରେ ଏକ ସାମ୍ବାଦିକ ସମ୍ମିଳନୀ କରି ସେ କିନ୍ତୁ ତାଙ୍କର ମତ ବଦଳାଇଥିଲେ । କାଲିର ବନ୍ଦକୁ ବିଜେଡି ସମର୍ଥନ କରିବ ନାହିଁ ବୋଲି ଘୋଷଣା କରିଥିଲେ । କୌଣସି ମେଣ୍ଟରେ ବିଜେଡି ସାମିଲ ନାହିଁ । ବିଜେଡି ସମଦୂରତା ନୀତି ପାଳନ କରୁଛି । ଏସଆଇଆର ଓ ସିଇସି ପ୍ରସଙ୍ଗରେ ଇଣ୍ଡି ମେଣ୍ଟକୁ ସମର୍ଥନ କରିଛୁ । ଆମର କଂଗ୍ରେସ ପ୍ରତି କୌଣସି ଦୁର୍ବଳତା ନାହିଁ । ଓଡ଼ିଶା ବନ୍ଦ ନିଷ୍ପତ୍ତି ବେଳେ ସେମାନେ କ’ଣ ଆମକୁ ପଚାରି ଥିଲେ କି ବୋଲି ଶ୍ରୀମତୀ ମଲ୍ଲିକ ସାମ୍ବାଦିକଙ୍କ ପ୍ରଶ୍ନରେ ଜବାବ ଦେଇଥିଲେ ।

ବିଜେଡିର ଏହି ଆଭିମୁଖ୍ୟକୁ କଟାକ୍ଷ କରିଛି କଂଗ୍ରେସ । ଦଳର ବରିଷ୍ଠ ନେତା ସନ୍ତୋଷ ସିଂହ ସାଲୁଜା କହିଛନ୍ତି, ବିଜେଡି ହେଉଛି ଦିଗହରା ପାର୍ଟି । ବିଜେପି ସହ ରହିବାର ଅଭ୍ୟାସ ଅଛି । କାଲି ବିଜେଡି ସାଂସଦ ଦିଲ୍ଲୀରେ ଇଣ୍ଡି ମେଣ୍ଟକୁ ସମର୍ଥନ କଲେ । ଆଜି ସକାଳେ କହିଲେ ଇଣ୍ଡି ମେଣ୍ଟର ଓଡ଼ିଶା ବନ୍ଦକୁ ସମର୍ଥନ କରିବୁ । ଏବେ ପୁଣି କହିଲେ କରିବୁନୁ । କାରଣ ବିଜେଡି ଉପରେ ବିଜେପିର ଚାପ ରହୁଛି । ଦିଲ୍ଲୀରୁ ଫୋନ୍ ଆସିଲା, ତେଣୁ ଡରିଗଲେ । ବିଜେଡି ଦୋମୁହାଁ ନୀତି ଆପଣାଉଛି ବୋଲି ସେ କହିଛନ୍ତି ।