ମୁମ୍ବାଇ: ବଲିଉଡର ପ୍ରଖ୍ୟାତ ତଥା ଲୋକପ୍ରିୟ ଅଭିନେତା ନାନା ପାଟେକର(୭୫) ଆଉ ନାହାନ୍ତି । ଗୋଆସ୍ଥିତ ବାସଭବନରେ ଆଜି ବଡି ଭୋରରୁ ତାଙ୍କର ହୃଦଘାତରେ ପରଲୋକ ହୋଇଯାଇଛି । ଦୀର୍ଘ ୪ ଦଶନ୍ଧି ଧରି ଲୋକପ୍ରିୟତାର ଶୀର୍ଷରେ ଥିବା ଏହି ମହାନ୍ କଳାକାରଙ୍କ ଆକସ୍ମିକ ବିୟୋଗ ବଲିଉଡ୍ ଜଗତ ଏବଂ କୋଟି କୋଟି ଭାରତୀୟଙ୍କୁ ମ୍ରିୟମାଣ କରିଦେଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କଠାରୁ ଆରମ୍ଭ କରି ବିଶିଷ୍ଟ ବ୍ୟକ୍ତିମାନେ ଗଭୀର ଶୋକପ୍ରକାଶ କରିଛନ୍ତି ।
ରିପୋର୍ଟ ଅନୁଯାୟୀ, ଗୋଆ ଫ୍ଲାଟରେ ଅବସ୍ଥାନ କରୁଥିବା ନାନା ଗତକାଲି ରାତି ପ୍ରାୟ ସାଢ଼େ ଦୁଇଟାରେ ଅସହଜ ଅନୁଭବ କରିଥିଲେ । ପରବର୍ତ୍ତୀ ସମୟରେ ତାଙ୍କୁ ଅଚେତ ଅବସ୍ଥାରେ ତାଙ୍କୁ ହସପିଟାଲ୍ ନିଆଯାଇଥିଲା । ୪୫ ମିନିଟ୍ ଧରି ସିପିଆର ଦିଆଯାଇଥିଲେ ମଧ୍ୟ ସ୍ୱାସ୍ଥ୍ୟରେ ଉନ୍ନତି ଆସି ନ ଥିଲା । ଭୋର୍ ପ୍ରାୟ ୫ଟା ବେଳେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ ।
ବଲିଉଡ୍ ରେ ନାନା ପାଟେକର ଜଣେ ସ୍ୱତନ୍ତ୍ର କଳାକାର ଭାବେ ପରିଚିତ ଥିଲେ । ତାଙ୍କର ବ୍ୟକ୍ତିତ୍ୱ, ଆକ୍ଟିଂ, ଅନ୍ଦାଜ ଥିଲା ଭିନ୍ନ । ତାଙ୍କ ଅଭିନୀତ ଫିଲ୍ମର ଥିଲା ଅନନ୍ୟ ଆକର୍ଷଣ । ମହାରାଷ୍ଟ୍ରର ରାଇଗଡ଼ ଜିଲ୍ଲାରେ ଜନ୍ମିତ ବିଶ୍ୱନାଥ ଓରଫ୍ ନାନା ପାଟେକର ୧୯୭୮ ମସିହାରେ ବଲିଉଡ୍ ଜଗତରେ ପ୍ରବେଶ କରିଥିଲେ ମଧ୍ୟ ତାଙ୍କର ନିଆରା ଅଭିନୟ, ସଂଳାପ ପାଇଁ ମାତ୍ର ୧୦ ବର୍ଷରେ ଲୋକପ୍ରିୟତାର ଉପରକୁ ଉଠିଥିଲେ ।
୧୯୮୮ ମସିହାରେ ‘ସଲାମ’ ଏବଂ ୧୯୮୯ ମସିହାରେ ରିଲିଜ୍ ‘ପରିନ୍ଦା’ ତାଙ୍କୁ ସ୍ୱତନ୍ତ୍ର ପରିଚୟ ଦେଇଥିଲା । ୧୯୯୪ରେ ରିଲିଜ୍ ‘କ୍ରାନ୍ତିବୀର’ ରେ ତାଙ୍କର ବଳିଷ୍ଠ ଅଭିନୟ ତାଙ୍କୁ ଲୋକପ୍ରିୟତାର ଶୀର୍ଷକୁ ନେଇଯାଇଥିଲା । ତାଙ୍କ ଅଭିନୀତ ପରିନ୍ଦା, କ୍ରାନ୍ତିବୀର, ପ୍ରହାର, ଖାମୋସୀ, ଅଗ୍ନିସାକ୍ଷୀ, ଯଶୱନ୍ତ, ୱାଜୁଦ୍, ତ୍ରିରଙ୍ଗା, ଅଙ୍କୁଶ, ଯୁଗପୁରୁଷ ଆଦି ଚଳଚିତ୍ର ଗୋଟେ ଗୋଟେ ମାଇଲଖୁଣ୍ଟ କହିଲେ ଅତ୍ୟୁକ୍ତି ହେବ ନାହିଁ ।
ଶ୍ରେଷ୍ଠ ଅଭିନୟ ପାଇଁ ତାଙ୍କୁ ତିନି ଥର ଜାତୀୟ ଚଳଚିତ୍ର ପୁରସ୍କାର ଏବଂ ଚାରି ଥର ଫିଲ୍ମ ଫେୟାର ଆୱାର୍ଡ ମିଳିଥିଲା । ୨୦୧୩ ମସିହାରେ ଭାରତ ସରକାରଙ୍କ ପକ୍ଷରୁ ତାଙ୍କୁ ମର୍ଯ୍ୟାଦାଜନକ ‘ପଦ୍ମଶ୍ରୀ’ ସମ୍ମାନ ମିଳିଥିଲା ।
ଅଭିନୟ ଛଡ଼ା ୧୯୮୮ ମସିହାରେ ନାନା ପାଟେକର ଟେରିଟୋରିଆଲ୍ ଆର୍ମିରେ କ୍ୟାପଟେନ୍ ଭାବେ ଯୋଗ ଦେଇ ୩ ବର୍ଷ ଟ୍ରେନିଂ ନେଇଥିଲେ । ମରାଠ ଲାଇଟ୍ ଇନଫାଣ୍ଟ୍ରିରେ ଯେ ମେଜର ଭାବେ କାର୍ଯ୍ୟ କରିଥିଲେ । ୧୯୯୯ କାରଗିଲ୍ ଯୁଦ୍ଧରେ ପାକିସ୍ଥାନ ବିରୋଧରେ ଲଢ଼ିଥିଲେ । ଟେରିଟୋରିଆଲ୍ ଆର୍ମିରେ ଲେଫଟନାଣ୍ଟ କର୍ଣ୍ଣେଲ ଭାବେ ୨୦୧୩ ମସିହାରେ ଅବସର ଗ୍ରହଣ କରିଥିଲେ ।
କେବଳ ଜଣେ ଦକ୍ଷ କଳାକାର ନ ଥିଲେ । ଜଣେ ହୃଦୟବାନ ମଣିଷ ଥିଲେ ନାନା । ପୁନେ ନିକଟରେ ୨୭ ଏକର ଜମି ଉପରେ କରିଥିବା ଫାର୍ମ ହାଉସ୍ ରେ ନିଜେ ଚାଷ କରି ଅମଳ କରୁଥିବା ଫସଲର ବିକ୍ରି ଅର୍ଥକୁ ଗରିବ ଚାଷୀଙ୍କ ସହାୟତାରେ ବିନିଯୋଗ କରୁଥିଲେ । ମହାରାଷ୍ଟ୍ରରେ ଋଣ ପରିଶୋଧ କରି ନ ପାରି ଆତ୍ମହତ୍ୟା କରିଥିବା ଅନେକ ଚାଷୀଙ୍କ ପରିବାରର ଭରଣପୋଷଣ ଦାୟିତ୍ୱ ନେଇଥିଲେ । ଲାଟୁରରେ ଦୁର୍ଦ୍ଦଶାଗ୍ରସ୍ତ ୬୨ ପରିବାରର ଦାୟିତ୍ୱ ବୁଝୁଥିଲେ ।
ନାନା ତାଙ୍କର ଅଧିକାଂଶ ସମୟ ତାଙ୍କର ପୁନେ ଫାର୍ମ ହାଉସ୍ ରେ କାଟୁଥିଲା ବେଳେ ମୁମ୍ବାଇ ଏବଂ ଗୋଆରେ କ୍ୱଚିତ୍ ରହୁଥିଲେ । ତାଙ୍କର ପତ୍ନୀ ନୀଲକାନ୍ତି ଏବଂ ପୁଅ ମଲହାର ଅଛନ୍ତି ।
