ଭୁବନେଶ୍ୱର: ୪ ଦଫା ଦାବି ନେଇ ‘ଇଣ୍ଡି’ ମେଣ୍ଟ ପକ୍ଷରୁ ଡାକରା ଦିଆଯାଇଥିବା ୧୨ ଘଣ୍ଟିଆ ଓଡ଼ିଶା ବନ୍ଦର ପ୍ରଭାବ ଆଜି ସାରା ରାଜ୍ୟରେ ଅନୁଭୂତ ହୋଇଛି । ବସ୍ ଚଳାଚଳଠାରୁ ବଜାର, ବ୍ୟବସାୟ ପ୍ରତିଷ୍ଠାନ ପ୍ରାୟତଃ ବନ୍ଦ ରହିଥିଲା । ଶିକ୍ଷାନୁଷ୍ଠାନଗୁଡ଼ିକୁ ବନ୍ଦ ରଖାଯାଇଥିଲା । କଂଗ୍ରେସ ଓ ବାମଦଳ ଦ୍ୱାରା ମୁଖ୍ୟ ରାସ୍ତା ଅବରୋଧ, ବିକ୍ଷୋଭ ଓ ପିକେଟିଂକୁ ଛାଡ଼ିଦେଲେ ବନ୍ଦ ପ୍ରାୟତଃ ଶାନ୍ତିପୂର୍ଣ୍ଣ ଥିବା ପୁଲିସ କହିଛି । କାଁ ଭାଁ ଘଟଣାକୁ ଛାଡ଼ିଦେଲେ କୌଣସି ବଡ଼ ଅଘଟଣ ଘଟିନାହିଁ ।
ଏମଏମଡିଆର ସଂଶୋଧନ ଆଇନକୁ ସମ୍ପୂର୍ଣ୍ଣ ରଦ୍ଦ କରିବା, ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କୁ ତୁରନ୍ତ ବରଖାସ୍ତ, ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଏବଂ ବନ୍ୟା ପ୍ରଭାବିତ ସମସ୍ତ ଲୋକଙ୍କୁ ତୁରନ୍ତ ରିଲିଫ୍ ଓ ପୁନର୍ବାସ ସହାୟତା ଯୋଗାଇବା ଦାବିରେ ଓଡ଼ିଶା ବନ୍ଦ ଡାକରା ଦିଆଯାଇଥିଲା । ଏହାକୁ ସମର୍ଥନ ଦେବ ନାହିଁ ବୋଲି ବିଜେଡିର ଘୋଷଣା ପରିପ୍ରେକ୍ଷୀରେ ଆନ୍ଦୋଳନ ଫୁସୁକି ଯିବ ବୋଲି ଆଶଙ୍କା କରାଯାଉଥିଲା । ମାତ୍ର ଦୁର୍ବଳ ସଂଗଠନ ସତ୍ତ୍ୱେ କଂଗ୍ରେସ ଦମଦାର ପ୍ରସଙ୍ଗକୁ ନେଇ ନିଜର ଦମ୍ ଦେଖାଇଛି । ଓଡ଼ିଶା ବନ୍ଦ ଆଶାତୀତ ସଫଳତା ପାଇଛି ।
ଆଜି ସକାଳୁ ସକାଳୁ ବନ୍ଦର ପ୍ରଭାବ ଦେଖିବାକୁ ମିଳିଥିଲା । ଘରୋଇ ବସ୍ ଚଳାଚଳ ବନ୍ଦ ନ କରିବାକୁ ମାଲିକ ସଂଘ ନିଷ୍ପତ୍ତି ନେଇଥିଲେ ମଧ୍ୟ ତାହାକୁ କେହି ମାନି ନ ଥିଲେ । ରାଜଧାନୀର ବରମୁଣ୍ଡା ମୁଖ୍ୟ ବସଷ୍ଟାଣ୍ଡରୁ କୌଣସି ବସ୍ ବାହାରି ନ ଥିଲା କି ଅନ୍ୟ ଆଡୁ ବସ୍ ଆସି ନ ଥିଲା । ଅଟୋ ଚଳାଚଳ ବି କରି ନ ଥିଲା । ଟ୍ରେନ୍ ବନ୍ଦ ଥିଲା । ଏଥିଯୋଗୁଁ ଯାତ୍ରୀମାନେ କିନ୍ତୁ ପ୍ରବଳ ହନ୍ତସନ୍ତ ହୋଇଥିଲେ ।
ଭୁବନେଶ୍ୱରରେ ମାଷ୍ଟର କ୍ୟାଣ୍ଟିନ୍ ଛକରୁ ପିସିସି ସଭାପତି ଭକ୍ତ ଚରଣ ଦାସଙ୍କ ନେତୃତ୍ୱରେ ଇଣ୍ଡିଆ ବ୍ଲକ୍ ର ନେତୃବୃନ୍ଦ ଓ କର୍ମୀମାନେ ଏକତ୍ରିତ ହୋଇ ଲୋକସେବା ଭବନ ଅଭିମୁଖେ ମିଳିତ ପଦଯାତ୍ରା କରିଥିଲେ । ବାଟରେ ପୁଲିସ ବହୁ ସଂଖ୍ୟକ ନେତା ଓ କର୍ମୀଙ୍କୁ ଅଟକ ରଖିଥିଲା । ଯୁବ ଓ ଛାତ୍ର କଂଗ୍ରେସର ପକ୍ଷରୁ ଏକ ମଟରସାଇକେଲ ରାଲି ସହର ପରିକ୍ରମା କରିଥିଲା ।
ଭୁବନେଶ୍ୱରର ପ୍ରମୁଖ ଛକଗୁଡ଼ିକରେ ଆନ୍ଦୋଳନକାରୀମାନେ ପିକେଟିଂ କରିଥିଲେ । ଜାତୀୟ ରାଜପଥ ଅବରୋଧ ଯୋଗୁଁ ଗାଡ଼ି ଚଳାଚଳ ଠପ୍ ହୋଇଯାଇଥିଲା । ଭୁବନେଶ୍ୱରରୁ ଆରମ୍ଭ କରି କଟକ, ଜଗତସିଂହପୁର, ଢ଼େଙ୍କାନାଳ, ଅନୁଗୁଳ, ବାଲେଶ୍ୱର, ଭଦ୍ରକ, ବ୍ରହ୍ମପୁର, ସମ୍ବଲପୁର, ରାଉରକେଲା, ବରଗଡ଼, କୋରାପୁଟ, ରାୟଗଡ଼ା, ମାଲକାନଗିରି, କଳାହାଣ୍ଡି, ନୂଆପଡ଼ା ସବୁଠି ବନ୍ଦର ପ୍ରଭାବ ଦେଖିବାକୁ ମିଳିଥିଲା । ସାଧାରଣ ପରିବହନ ସେବା ବନ୍ଦ ଥିଲା ବେଳେ ଦୋକାନ ବଜାର ଓ ବ୍ୟବସାୟ ପ୍ରତିଷ୍ଠାନ ବନ୍ଦ ଥିଲା ।
ବନ୍ଦ ବେଳେ ଭଦ୍ରକରେ ଉତ୍ତେଜନା ଦେଖିବାକୁ ମିଳିଥିଲା । ୧୬ ନମ୍ବର ଜାତୀୟ ରାଜପଥର କଲେଜ ଛକ ଓଭର ବ୍ରିଜ ଉପରେ ପୁଲିସ-ଆନ୍ଦୋଳନକାରୀଙ୍କ ମଧ୍ୟରେ ମୁହାଁମୁହିଁ ହୋଇଥିଲା । ଗୋଟେ କାରକୁ ଅଟକାଇବାକୁ ଉଦ୍ୟମ ଯୋଗୁଁ ଉତ୍ତେଜନା ସୃଷ୍ଟି ହୋଇଥିଲା । ଏହି ସମୟରେ ସିଟି ଡିଏସପିଙ୍କ କଲରକୁ ଜଣେ ସିପିଏମ୍ ନେତା ଧରି ପକାଇବାରୁ ପୁଲିସ ପ୍ରତିଶୋଧପରାୟଣ ହୋଇଥିଲା । ମହିଳା ଆନ୍ଦୋଳନକାରୀମାନଙ୍କୁ ପୁଲିସ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି ।
ଓଡ଼ିଶା ବନ୍ଦକୁ ସାଧାରଣ ଜନତା ସ୍ୱତଃସ୍ପୃତ ସମର୍ଥନ ଦେଇଛନ୍ତି ଏବଂ ଏହା ସମ୍ପୂର୍ଣ୍ଣ ସଫଳ ହୋଇଛି ବୋଲି ପିସିସି ସଭାପତି ଭକ୍ତ ଚରଣ ଦାସ ପ୍ରତିକ୍ରିୟା ଦେଇଛନ୍ତି । ରାଜ୍ୟବାସୀଙ୍କ ସହଯୋଗ ପାଇଁ ‘ଇଣ୍ଡି’ ବ୍ଲକ୍ ତରଫରୁ ଅଭିନନ୍ଦନ ଓ କୃତଜ୍ଞତା ଜଣାଯାଇଛି । ଗଣତାନ୍ତ୍ରିକ ଅଧିକାରକୁ ଦୁର୍ବଳ କରିବାର ପ୍ରୟାସ ଏବଂ ଓଡ଼ିଶାର ସମ୍ପଦର ଶୋଷଣ ବିରୋଧରେ ଏହି ବନ୍ଦ ଏକ ଗଣତାନ୍ତ୍ରିକ ପ୍ରତିବାଦ ବୋଲି ପିସିସି ସଭାପତି କହିଛନ୍ତି ।
ଅନ୍ୟପକ୍ଷରେ ଓଡ଼ିଶା ବନ୍ଦର ପ୍ରଭାବ ନାହିଁ ବୋଲି ଶାସକ ଦଳ ଦାବି କରିଛି । ଓଡ଼ିଶା ବନ୍ଦ ଡାକରାକୁ ରାଜ୍ୟବାସୀ ପ୍ରତ୍ୟାଖ୍ୟାନ କରିଛନ୍ତି ବୋଲି ସାଂସଦ ରବିନ୍ଦ୍ର ନାରାୟଣ ବେହେରା ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । କଂଗ୍ରେସର ଅସ୍ତିତ୍ୱ ରକ୍ଷା ଉଦ୍ୟମ ଫସର ଫାଟିଯାଇଛି ବୋଲି ବିଧାୟକ ବାବୁ ସିଂ କହିଛନ୍ତି ।
ଆଜିର ଓଡ଼ିଶା ବନ୍ଦକୁ ନେଇ ବିଜେଡି କୌଣସି ପ୍ରତିକ୍ରିୟା ଦେଇନାହିଁ । ତେବେ ଏମଏମଡିଆର ସଂଶୋଧନ ଆଇନ ପ୍ରତ୍ୟାହାର ଏବଂ ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କ ବରଖାସ୍ତ ଦାବିରେ ବିଜେଡି ଆନେ୍ଦାଳନ ଜାରି ରଖିଛି ଏବଂ ଆଗକୁ ଜାରି ରହିବ ବୋଲି ଦଳର ବରିଷ୍ଠ ବିଧାୟକ ଡ. ଅରୁଣ ସାହୁ କହିଛନ୍ତି ।
