ବଦଳୁଛି ବିଜେପି ସମୀକରଣ, ଆଉ ଓଡ଼ିଶା ଫେରିବେନି ଧର୍ମେନ୍ଦ୍ର !

ଭୁବନେଶ୍ୱର: ବିଜେପୁର ପରାଜୟରେ ଦୋହଲିଯାଇଛି ବିଜେପିର ସ୍ଥିତି । ନେତୃତ୍ୱ, ଫର୍ମୂଲା ଫେଲ୍ ମାରିଲା ପରେ ହାଇକମାଣ୍ଡ ବ୍ୟସ୍ତ ବିବ୍ରତ ହୋଇପଡ଼ିଛନ୍ତି । ନବୀନ ପଟ୍ଟନାୟକଙ୍କ ବିରୋଧରେ ଲଢ଼ିବା ପାଇଁ ଧମକ, ଗର୍ବ, ଅହଂକାର, ପଇସା କାମ କରିବନି ବୋଲି ସେମାନେ ବୁଝିଯାଇଛନ୍ତି । ସେଥିରୁ ମୁକୁଳିବା ପାଇଁ ହାଇକମାଣ୍ଡ କଠୋର ହୋଇଥିବା ସୂଚନା ମିଳିଛି । ଧର୍ମେନ୍ଦ୍ର ପ୍ରଧାନଙ୍କୁ ହଟାଇ ଅନ୍ୟ କାହାରିକୁ ନବୀନଙ୍କ ବିକଳ୍ପ ଚେହେରା ଭାବେ ଉପସ୍ଥାପିତ କରାଯିବ । ରଣନୀତି, ଆଚରଣ ଓ ଉଚ୍ଚାରଣରେ ବ୍ୟାପକ ପରିବର୍ତ୍ତନ କରି ଓଡ଼ିଶାରେ ବିଜେପିକୁ ନୂଆ ରୂପରେ ଆର୍ବିଭୂତ କରାଯିବ । ଏପ୍ରିଲ୍ ସୁଦ୍ଧା ବିଜେପିର ନବକଳେବର ପାଇଁ ଦିଲ୍ଲୀରେ କସରତ୍ ଚାଲିଥିବା ସୂଚନା ମିଳିଛି ।

ନୂଆ ଫର୍ମୂଲାରେ ସୁନୀଲ ଦେଓଧରଙ୍କୁ ଓଡ଼ିଶା ବିଜେପିର ପ୍ରଭାରୀ ଦାୟିତ୍ୱ ଦେବାକୁ ଆପତତଃ ନିଷ୍ପତ୍ତି ହୋଇଛି । ତ୍ରିପୁରା ମଡ଼େଲ୍ କୁ ସେ ଓଡ଼ିଶାରେ ଆପଣେଇବେ ବୋଲି ହାଇକମାଣ୍ଡଙ୍କ ବିଶ୍ୱାସ ରହିଛି । ତେବେ ଦଳ ପାଇଁ ସବୁଠାରୁ ବଡ଼ ଚାଲେଞ୍ଜ ହୋଇଛି ନେତୃତ୍ୱ । ନବୀନ ପଟ୍ଟନାୟକଙ୍କ ବିରୋଧରେ କାହାକୁ ଲଢ଼ାଯିବ ତାହା ହାଇକମାଣ୍ଡଙ୍କୁ ସଙ୍କଟରେ ପକାଇଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦକ୍ଷତା ଓ ନେତୃତ୍ୱ ସମ୍ପୂର୍ଣ୍ଣ ଫେଲ୍ ମାରିବା ପରେ ନୂଆ ଚେହେରାକୁ ନେଇ ସେମାନେ ଦ୍ୱନ୍ଦରେ ପଡ଼ିଛନ୍ତି । ଏକାକୀ ନେତୃତ୍ୱ ବଦଳରେ ଗ୍ରୁପ୍ ଲିଡରସିପ୍ କଥା ଚିନ୍ତା କରାଯାଉଛି । ତେବେ ତାହା କେତେଦୂର କାର୍ଯ୍ୟକ୍ଷମ ହେବ ତାହାର ଗଣିତ କଷାଯାଉଛି ।

ଇତିମଧ୍ୟରେ ଧର୍ମେନ୍ଦ୍ର ପ୍ରଧାନ ବି ନିଜର ଭବିଷ୍ୟତ ଜାଣି ଓଡ଼ିଶାରୁ ମୁହଁ ଫେରାଇଲେଣି । ମନରେ ପୂର୍ବ ଦମ୍ଭ ଓ ମୁହଁରେ ସରସତା ନାହିଁ । ବିଜେପୁରରେ ଅପମାନଜନକ ପରାଜୟ ଦିଲ୍ଲୀରେ ତାଙ୍କର ଦମ୍ଭ ଓ ଓଡ଼ିଶା କାଟତି ଭାଙ୍ଗିଦେଇଛି । ମୁଖ୍ୟମନ୍ତ୍ରୀ ସ୍ୱପ୍ନ ଦେଖୁଥିବା ଧର୍ମେନ୍ଦ୍ର କେନ୍ଦ୍ରମନ୍ତ୍ରୀ ପଦରେ ନିଜକୁ ସନ୍ତୁଷ୍ଟ ରଖିବାକୁ ବାଧ୍ୟହେଲେଣି । ଏମିତିରେ, ସାଧାରଣ ନିର୍ବାଚନ ବର୍ଷେ ଥିବା ବେଳେ ମଧ୍ୟପ୍ରଦେଶରୁ ତାଙ୍କୁ ରାଜ୍ୟସଭାକୁ ପୁନଃ ନିର୍ବାଚିତ କରାଯାଇ ତାଙ୍କର ଓଡିଶା ଷ୍ଟେକ୍ ରେ ବ୍ରେକ୍ ଲଗାଇ ଦିଆଯାଇଛି । ସବୁଦୃଷ୍ଟିର, ଓଡ଼ିଶା ଆସିବା ତାଙ୍କ ପାଇଁ ଲଜ୍ଜା ଓ ଅପମାନ ହୋଇଛି । ବିଜେପୁର ପରାଜୟ ପରେ ପ୍ରଥମ ଥର ପାଇଁ ଓଡ଼ିଶା ଆସିଥିବା ଧର୍ମେନ୍ଦ୍ର କୌଣସି ସ୍ୱାଗତ ଓ ସମ୍ବର୍ଦ୍ଧନାରୁ ନିଜକୁ ଦୂରେଇ ରଖିବାକୁ ଚାହୁଁଥିଲେ ବୋଲି ଏବେ ଜଣାପଡ଼ିଛି । କେବଳ କର୍ମୀଙ୍କ ମନବଳ ଫେରାଇ ବିଜେପିର ସ୍ଥିତି ଜାହିର ରଖିବାକୁ ତାଙ୍କ ଅନୁଗତମାନେ ଜୋର୍ ଜବରଦସ୍ତ ଧର୍ମେନ୍ଦ୍ରଙ୍କୁ ମନାଇ ସ୍ୱାଗତ ସମ୍ବର୍ଦ୍ଧନାର ଆୟୋଜନ କରିଥିଲେ ବୋଲି ତାଙ୍କର ଜଣେ ବିଶ୍ୱସ୍ତ ସ୍ୱୀକାର କରିଛନ୍ତି । ଧର୍ମେନ୍ଦ୍ର ଆଉ ଓଡ଼ିଶା ଫେରିବେନି ବୋଲି ସେ ରୋକଠୋକ୍ ସୂଚନା ଦେଇଛନ୍ତି ।

ଅନ୍ୟ ଏକ ସୂତ୍ରରୁ ମିଳିଥିବା ଖବର ଅନୁଯାୟୀ ଧର୍ମେନ୍ଦ୍ର ନିଜ ଆଡୁ ଓଡ଼ିଶା ଲଢ଼େଇରୁ ମୁକୁଳିବାକୁ ବ୍ୟାକୁଳ ହୋଇଛନ୍ତି । ବିଜେପୁର ପରାଜୟ ତାଙ୍କୁ ସେଥିପାଇଁ ବାଧ୍ୟ କରିଛି । ସିଧାସଳଖ ନବୀନ ଏବଂ ତାଙ୍କ ବିଜେଡ଼ି ବିରୋଧରେ ଲଢ଼ିବାକୁ ତାଙ୍କର ଆଉ ସାହାସ ନାହିଁ । ସାଧାରଣ ନିର୍ବାଚନ ଲଢ଼ି ବେଜିତ୍ ହେବା ଅପେକ୍ଷା ସେ କୁଆଡ଼େ ବ୍ୟାକ୍ ଡୋର୍ ସୁଯୋଗକୁ ଅପେକ୍ଷା କରିବେ । ସମୟ ଓ ସୁଯୋଗ ଉଣ୍ଡି ଗଳାବାଟରେ ଧର୍ମେନ୍ଦ୍ର ଓଡ଼ିଶାର ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖିଲେଣି ବୋଲି ଦିଲ୍ଲୀ ମହଲରେ ଚର୍ଚ୍ଚା ହେଉଛି ।

ସେପଟେ ବିରି ମାଡ଼ ଦେଖି କୋଳଥ ଚେପା ନ୍ୟାୟରେ ଧର୍ମେନ୍ଦ୍ରଙ୍କ ଅବସ୍ଥା ଦେଖି ତାଙ୍କ ସହଚରମାନଙ୍କ ମଧ୍ୟରେ ଭାଳେଣି ପଡ଼ିଛି । ଗର୍ବ, ଅହଂକାର ଓ ଔଦ୍ଧତ୍ୟ ସେମାନଙ୍କ ପାଇଁ କାଳ ହୋଇଛି ବୋଲି ସେମାନେ ମର୍ମେ ମର୍ମେ ବୁଝୁଛନ୍ତି । ନିଜର ଆଚରଣ ଓ ଉଚ୍ଚାରଣ ବଦଳେଇବାକୁ ଆରମ୍ଭ କଲେଣି । ତୁଣ୍ଡରେ ନିଜକୁ ଯେତେ କାଢ଼ୁଆ ଦେଖେଇଲେ ବି ବିଜେଡ଼ି ଓ ନବୀନଙ୍କ ବିରୋଧରେ ଲଢ଼ିବା ଏତେ ସହଜ ନୁହେଁ ବୋଲି ‘ବିଜେପୁର’ ସେମାନଙ୍କୁ ଶିଖେଇ ଦେଇଛି । ଧର୍ମେନ୍ଦ୍ର ହଟିଗଲା ପରେ ନିଜର ଭବିଷ୍ୟତକୁ ନେଇ ବି ସେମାନେ ଆଶଙ୍କାରେ ରହିଲେଣି । କେମିତି ନିଜକୁ ସୁରକ୍ଷିତ ରଖିବେ ସେଇ ଚିନ୍ତା ଘାରିଛି ।

ସୂଚନାଯୋଗ୍ୟ, ମିସନ୍ ୧୨୦ ପ୍ଲସ୍ ର ଏଜେଣ୍ଡା ଧରି ଓଡ଼ିଶାକୁ ପରବର୍ତ୍ତୀ ଟାର୍ଗେଟ୍ କରୁଥିବା ବିଜେପି ହାଇକମାଣ୍ଡ ଓଡ଼ିଶାର ସ୍ଥିତି ବୁଝି ଭୀଷଣ ଭାଳେଣିରେ ପଡ଼ିଛନ୍ତି । ଜଲଦି କିଛି ନ କଲେ ବିଜେଡ଼ି ବିଜେପୁର ଭଳି ଶୂନ୍ୟଟାରେ ପଞ୍ଚମ ଥର ପାଇଁ କ୍ଷମତା ମାରିନେବ ବୋଲି ହାଇକମାଣ୍ଡଙ୍କ ହୃଦୟଙ୍ଗମ ହୋଇଛି । ଓଡ଼ିଶାର ନେତାମାନେ ବି ବୁଝିଗଲେଣି ବାସ୍ତବତା । ଏଭଳିସ୍ଥିତିରେ ରାଜ୍ୟ ବିଜେପି ଏବେ ସଙ୍କଟ ଭିତରେ ଫସିଯାଇଛି ।