କର୍ଣ୍ଣାଟକ ପ୍ରତିବାଦ; ଆସନ୍ତାକାଲି କଂଗ୍ରେସର ଦେଶବ୍ୟାପୀ ଧାରଣା

ଭୁବନେଶ୍ୱର: କର୍ଣ୍ଣାଟକ ରାଜ୍ୟପାଳଙ୍କ କାର୍ଯ୍ୟକୁ ଅନୈତିକ, ଅଗଣତାନ୍ତ୍ରିକ ଦର୍ଶାଇ ତାହା ବିରୋଧରେ ଦେଶବ୍ୟାପୀ ଆନ୍ଦୋଳନକୁ ଓହ୍ଲାଇବ କଂଗ୍ରେସ । ଆସନ୍ତାକାଲି ସବୁ ରାଜ୍ୟର ରାଜଧାନୀ ଓ ଜିଲ୍ଲା ସଦର ମହକୁମା ଅଫିସ୍ ସାମନାରେ କଂଗ୍ରେସ ଦେବ ଧାରଣା । ପ୍ରଦେଶ କଂଗ୍ରେସ କମିଟି ନେତୃତ୍ୱରେ ଏହାକୁ ଜୋରଦାର କରିବା ପାଇଁ ହାଇକମାଣ୍ଡ ନିର୍ଦ୍ଦେଶ ଦେଇଛନ୍ତି । ଏ ମର୍ମରେ ଏଆଇସିସି ସାଧାରଣ ସମ୍ପାଦକ ଅଶୋକ ଗେହଲଟ ଏଆଇସିସିର ସମସ୍ତ କର୍ମକର୍ତ୍ତା, ସବୁ ରାଜ୍ୟର ପିସିସି ସଭାପତି, ବିଧାୟକ ଦଳ ନେତା ଓ ଛାମୁଆ ସଂଗଠନର ମୁଖ୍ୟମାନଙ୍କୁ ଚିଠି ଲେଖିଛନ୍ତି ।

ଶ୍ରୀ ଗେହଲଟ୍ ଲେଖିଛନ୍ତି, କର୍ଣ୍ଣାଟକରେ ରାଜ୍ୟପାଳ ବିଜେପିର ହାତବାରିସି ହୋଇ ଗଣତନ୍ତ୍ରକୁ ହତ୍ୟା କରିଛନ୍ତି । ସଂଖ୍ୟା ନ ଥିବା ସତ୍ତ୍ୱେ ବିଜେପିକୁ ସରକାର ଗଠନର ସୁଯୋଗ ଦେଇଛନ୍ତି । ରାଜ୍ୟପାଳଙ୍କୁ କଂଗ୍ରେସ ଓ ଜେଡ଼ିଏସ୍ ବିଧାୟକଙ୍କ ତାଲିକା ସହ ଆବଶ୍ୟକ ସଂଖ୍ୟାଗରିଷ୍ଠତାର ପ୍ରମାଣ ଦେଇଥିଲେ ମଧ୍ୟ ରାଜ୍ୟପାଳ ଏକପାଖିଆ ଭାବେ ସଂଖ୍ୟାଲଘୁ ବିଜେପିକୁ ସରକାର ଗଠନ ପାଇଁ ଆମନ୍ତ୍ରଣ କରିବା ସମ୍ପୂର୍ଣ୍ଣ ଅଗଣତାନ୍ତ୍ରିକ । ଏହା ରାଜ୍ୟପାଳ ପଦବୀର ମର୍ଯ୍ୟାଦା ହାନି କରିବା ସହ ଦେଶକୁ ସମ୍ବିଧାନ ସଙ୍କଟ ଆଡକୁ ଟାଣିନେଇଛି । ଆଗାମୀ ନିର୍ବାଚନଗୁଡ଼ିକରେ ଏହାର ପ୍ରଭାବ ପଡ଼ିବ ଏବଂ ଦେଶ ଏହାର କୁପରିମାଣ ଭୋଗିବ ବୋଲି ସେ ଜଣାଇ ଦେଇଛନ୍ତି ।
ଏହାକୁ ସବୁମତେ ବିରୋଧ କରିବାକୁ କଂଗ୍ରେସ ନେତା ଓ କର୍ମୀମାନଙ୍କୁ ଏଆଇସିସି ପକ୍ଷରୁ ସେ ଡାକରା ଦେଇଛନ୍ତି । କର୍ଣ୍ଣାଟକ ବାର୍ତ୍ତାକୁ ସାଧାରଣ ଜନତା, ନାଗରିକ ସଂଗଠନଗୁଡ଼ିକ ନିକଟରେ ପହଞ୍ଚାଇ ସେମାନଙ୍କ ସମର୍ଥନ ଲୋଡ଼ିବାକୁ ଆହ୍ୱାନ ଦେଇଛନ୍ତି । ନିଷ୍ପତ୍ତି ଅନୁଯାୟୀ, ସବୁ ରାଜ୍ୟର ରାଜଧାନୀରେ ପିସିସି ସଭାପତି ଓ ଦଳର ବରିଷ୍ଠ ନେତା ପ୍ରେସ୍ କନଫରେନ୍ସ କରିବା ସହ ରାଜ୍ୟପାଳଙ୍କୁ ସ୍ମାରକପତ୍ର ଦେବେ ।

ସେପଟେ ବିହାରରେ ଆରଜେଡ଼ି ମଧ୍ୟ ଆନ୍ଦୋଳନକୁ ଓହ୍ଲାଇବାର ଧମକ ଦେଇଛି । ଗତ ନିର୍ବାଚନରେ ଆରଜେଡ଼ି ସର୍ବାଧିକ ଆସନ ପାଇଥିଲା । କର୍ଣ୍ଣାଟକ ଭଳି ତାଙ୍କ ଦଳକୁ ରାଜ୍ୟପାଳ କାହିଁକି ସରକାର ଗଠନର ସୁଯୋଗ ନ ଦେବେ ତାହା ଉପରେ ଦଳ ପ୍ରଶ୍ନ ଛିଡ଼ା କରାଇଛି । ଆସନ୍ତାକାଲି ଦିନ ଗୋଟାଏରେ ଆରଜେଡ଼ିର ଏକ ପ୍ରତିନିଧିଦଳ ରାଜ୍ୟପାଳଙ୍କୁ ଭେଟି ଏ ମର୍ମରେ ସ୍ମାରକପତ୍ର ଦେବେ ବୋଲି ନିଷ୍ପତ୍ତି ନେଇଛନ୍ତି । କର୍ଣ୍ଣାଟକ ଦେଖାଦେଖି ଗୋଆ, ମଣିପୁର ଓ ମେଘାଳୟରେ ମଧ୍ୟ ଅନୁରୂପ ଦାବି ଉଠିଥିବା ଜଣାପଡ଼ିଛି ।