ଭୁବନେଶ୍ୱର: ଗତ ୧୬ ତାରିଖରେ ଝାରସୁଗୁଡ଼ାର ସୁଖାସୋଡାରୁ ଆରମ୍ଭ ହୋଇଥିବା ବିଜେଡ଼ିର ମହାନଦୀ ସୁରକ୍ଷା ମହାସଂଗ୍ରାମ ଯାତ୍ରା ଆଜି ପାରାଦ୍ୱୀପରେ ଶେଷ ହୋଇଛି । ଉଦଯାପନୀ ସମାରୋହରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭାଷଣ ଦେଇ ବିଜେପି ଉପରେ ଭୀଷଣ ବର୍ଷିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି, ମହାନଦୀ ସୁରକ୍ଷା ଅଭିଯାନ ଆଜି କେବଳ ରାଜନୀତିର ବିଷୟ ହୋଇ ରହିନାହିଁ । ଏହା ଜନ ଆନ୍ଦୋଳନର ରୂପ ନେଇଛି । ମହାନଦୀ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ କେନ୍ଦ୍ରର ବିଜେପି ସରକାର ଚୁପ ବସିବା ଦୁଃଖଦାୟକ । ଓଡ଼ିଶାର ବିଜେପି ନେତାମାନେ ଛତିଶଗଡ଼ର କାମକୁ ସମର୍ଥନ କରି ଏଠି କୁମ୍ଭୀର କାନ୍ଦଣା କାନ୍ଦୁଛନ୍ତି । ଓଡ଼ିଶା ପ୍ରତି ଦରଦ ଦେଖାଉଥିବା ବିଜେପି ନେତାମାନେ ଛତିଶଗଡ଼ ବ୍ୟାରେଜ ନିର୍ମାଣକୁ ବିରୋଧ କରିପାରିବେ କି ବୋଲି ମୁଖ୍ୟମନ୍ତ୍ରୀ ପ୍ରଶ୍ନ କରିଛନ୍ତି । ଖାଲି ପାଣି ପାଇଁ ନୁହେଁ, ମହାନଦୀର ଜୀବନ ପାଇଁ ବିଜେଡ଼ି ଲଢ଼େଇ କରୁଛି । ମହାନଦୀର ସୁରକ୍ଷା ପାଇଁ ଓଡ଼ିଶାବାସୀ ଏକାଠି ହୋଇଛନ୍ତି । ମହାନଦୀ ଜରିଆରେ ଆମ ଜୀବନ ଜୀବିକା ଉପରେ ହେଉଥିବା ଆକ୍ରମଣର ଦୃଢ଼ ଜବାବ ଦିଆଯିବ ବୋଲି ମୁଖ୍ୟମନ୍ତ୍ରୀ କହିଥିଲେ ।
ସେପଟେ ମହାନଦୀ ଉପରେ ଛତିଶଗଡ଼ ସରକାରଙ୍କ ବ୍ୟାରେଜ୍ ନିର୍ମାଣକୁ ବିରୋଧ କରିବାକୁ ବିଜେପିର ଜିଭ ଲେଉଟିନି । ଆଜି ଭୁବନେଶ୍ୱରଠାରେ ଏକ ସାମ୍ବାଦିକ ସମ୍ମିଳନୀରେ ବିଜେପିର ଜାତୀୟ ମୁଖପାତ୍ର ସମ୍ବିତ ପାତ୍ର ମୂଳ ପ୍ରସଙ୍ଗରୁ ହଟି ବିଧାନସଭାରେ ମୁଖ୍ୟମନ୍ତ୍ରୀ ଦେଇଥିବା ବିବୃତି ଉଦ୍ଧାର କରିଛନ୍ତି । ସରକାରର ମୁଖ୍ୟ ଭାବେ ମୁଖ୍ୟମନ୍ତ୍ରୀ ବିଧାନସଭାରେ ଗୋଟେ କଥା କହୁଥିବା ବେଳେ ବିଜେଡ଼ି ସଭାପତି ଭାବେ ଅଲଗା କଥା କହୁଛନ୍ତି । ମୁଖ୍ୟମନ୍ତ୍ରୀଙ୍କର ଏହା ଦୋମୁହାଁ ନୀତି ବୋଲି ସେ ଆକ୍ଷେପ କରିଛନ୍ତି ।
ପିସିସି ସଭାପତି ନିରଞ୍ଜନ ପଟ୍ଟନାୟକ ମହାନଦୀ ବିପର୍ଯ୍ୟୟ ପାଇଁ ଉଭୟ ରାଜ୍ୟ ଓ କେନ୍ଦ୍ରର ମୋଦି ସରକାରଙ୍କୁ ଦାୟୀ କରିଛନ୍ତି । ବିଜେଡ଼ି ଏମପି କେନ୍ଦ୍ରରେ ଜଳସେଚନ ମନ୍ତ୍ରୀ ଥାଇ ମଧ୍ୟ ମହାନଦୀର ସୁରକ୍ଷା ପାଇଁ କିଛି କରି ନ ଥିଲେ । ଏବେ କେନ୍ଦ୍ରର ମୋଦି ସରକାର ଛତିଶଗଡ଼ରେ ତାଙ୍କ ଦଳର ସରକାରକୁ ସୁରକ୍ଷା ଦେବାକୁ ଅଣ୍ଟା ଭିଡ଼ିଛି । ପ୍ରଧାନମନ୍ତ୍ରୀଙ୍କର ସତସାହାସ ଥିଲେ ଓଡ଼ିଶା ମାଟିରେ ତାହାର ଜବାବ ଦେବାକୁ ଶ୍ରୀ ପଟ୍ଟନାୟକ ଆହ୍ୱାନ ଦେଇଛନ୍ତି ।
