ପୈାର ନିର୍ବାଚନ: ଆଇନକୁ ଫୁ, ଚାଲିଛି ମନମାନି

ଭୁବନେଶ୍ୱର: ସ୍ଥାନ ସଂରକ୍ଷଣ ବିବାଦକୁ ନେଇ କୋର୍ଟରେ ଅଟକି ରହିଛି ରାଜ୍ୟ ପୈାର ନିର୍ବାଚନ ନିଷ୍ପତ୍ତି । ମାତ୍ର ଏହି ଅହେତୁକ ବିଳମ୍ବ ଭିତରେ ନଗର ଓ ଉନ୍ନୟନ ବିଭାଗର ମନମାନି ନୀତି ସାମନାକୁ ଆସିଛି । ୱାର୍ଡ ପୁର୍ନଗଠନ ଓ ସ୍ଥାନ ସଂରକ୍ଷଣ ନେଇ ଆପତ୍ତି ଅଭିଯୋଗର ଶୁଣାଣି ରାଜ୍ୟ ସରକାରଙ୍କ କୋର୍ଟରେ ଲମ୍ବି ଚାଲିଛି । ମାର୍ଚ୍ଚ ମାସରୁ ଜିଲ୍ଲାପାଳମାନେ ବିଜ୍ଞପ୍ତି ଜାରି କରିସାରିଥିଲେ ହେଁ ଆପେଲେଟ୍ ଅଥରିଟି(ରାଜ୍ୟ ସରକାର) ତାହା ଉପରେ ଜନସାଧାରଣଙ୍କ ଅଭିଯୋଗର ଶୁଣାଣି ଶେଷ କରିନାହାନ୍ତି । ସବୁଠାରୁ ସାଂଘାତିକ ସତ୍ୟଟି ହେଲା, ଏଥିପାଇଁ ସରକାରୀ ନିୟମକୁ ଆଖି ବୁଜି ଦିଆଯାଇଛି ।

ସଂଶୋଧିତ ଓଡ଼ିଶା ମ୍ୟୁନିସିପାଲ ଆଇନରେ ସ୍ପଷ୍ଟ ଉଲ୍ଲେଖ ଅଛି କି ରାଜ୍ୟ ସରକାରଙ୍କ କୋର୍ଟ(ଆପେଲେଟ୍ ଅଥରିଟି)କୁ ଜିଲ୍ଲାମାନଙ୍କରୁ ଆସିଥିବା ତାଲିକା ଉପରେ ଜନସାଧାରଣଙ୍କ ଆପତ୍ତି ଅଭିଯୋଗର ଫଇସଲା ମାସେ ଭିତରେ ସରିବ । କିନ୍ତୁ ଆଶ୍ଚର୍ଯ୍ୟର କଥା, ଜିଲ୍ଲାପାଳମାନେ ମାର୍ଚ୍ଚ ମାସରୁ ବିଜ୍ଞପ୍ତି ଜାରି କରିସାରିଥିଲେ ବି ଏହାକୁ ଚାଲେଂଜ କରିଥିବା ଜନସାଧାରଣଙ୍କ ଆପତ୍ତି ଅଭିଯୋଗ ଉପରେ ରାଜ୍ୟ ସରକାର ଜିଲ୍ଲାୱାରୀ ଶୁଣାଣି ଆରମ୍ଭ କରିଛନ୍ତି ଗତ ମେ ୧୯ ତାରିଖରୁ । ଆସନ୍ତା ସେପ୍ଟେମ୍ବର ୬ ତାରିଖ ପର୍ଯ୍ୟନ୍ତ ଏହାର ଶୁଣାଣି ଦିନ ଧାର୍ଯ୍ୟ ହୋଇଛି । ଏ ପର୍ଯ୍ୟନ୍ତ ୧୩ ଟି ଜିଲ୍ଲା ଜଗତସିଂହପୁର, ଯାଜପୁର, କଟକ, ଖୋର୍ଦ୍ଧା, ନୂଆପଡ଼ା, କଳାହାଣ୍ଡି, ଦେଓଗଡ଼, ସମ୍ବଲପୁର, ସୁନ୍ଦରଗଡ଼, କେନ୍ଦୁଝର, ମୟୁରଭଞ୍ଜ, ଫୁଲବାଣୀ ଓ ନୟାଗଡ଼ ଜିଲ୍ଲାର ଶୁଣାଣି ଶେଷ ହେଲାଣି । ବିଡ଼ମ୍ବନା ଯେ ଶୁଣାଣି ବେଳେ ଜିଲ୍ଲାପାଳ କିମ୍ବା ତାଙ୍କ ପ୍ରତିନିଧି ଉପସ୍ଥିତ ରହିବାର ନିୟମ ଥିଲେ ମଧ୍ୟ ଏ ପର୍ଯ୍ୟନ୍ତ କୌଣସି ଶୁଣାଣିରେ କୌଣସି ଜିଲ୍ଲାପାଳ କିମ୍ବା ତାଙ୍କ ପ୍ରତିନିଧି ଉପସ୍ଥିତ ରହିନାହାନ୍ତି । ଏଥିପାଇଁ ସରକାରଙ୍କ ତାଗିଦ୍ ବି ନାହିଁ । କାମ ଚଳେଇବା ଭଳି ନଗର ଉନ୍ନୟନ ବିଭାଗ ସାରିଦେଉଛି ଶୁଣାଣି ।

ସୂଚନାଯୋଗ୍ୟ, ସେପ୍ଟେମ୍ବର ୩୦ରେ ୬୫ଟି ପୈାରରସଂସ୍ଥାର କାର୍ଯ୍ୟକାଳ ସରୁଛି । କୋର୍ଟ ଝାମେଲା ନ ଥିଲେ ସେପ୍ଟେମ୍ବର ୩୦ ପୂର୍ବରୁ ୬୫ ଟି ପୈାରରସଂସ୍ଥାର ନିର୍ବାଚନ ଶେଷ ହୋଇଥାନ୍ତା । ହେଲେ ନଗର ଉନ୍ନୟନ ବିଭାଗର ସ୍ଥିରୀକୃତ କାର୍ଯ୍ୟସୂଚୀରେ ସେପ୍ଟେମ୍ବର ୬ ତାରିଖରେ ସରିବ ୱାର୍ଡ ପୁର୍ନଗଠନ ଓ ସ୍ଥାନ ସଂରକ୍ଷଣ ଉପରେ ଆପତ୍ତି ଅଭିଯୋଗର ଶୁଣାଣି । ଅର୍ଥାତ୍ ଓଡ଼ିଶା ମ୍ୟୁନିସିପାଲ୍(ସଂଶୋଧିତ) ନିୟମ ଅନୁଯାୟୀ, ଯାହା ଏପ୍ରିଲ୍ ରୁ ସରିବା କଥା ତାହା ଗଡ଼ି ଗଡ଼ି ଯାଇଛି ସେପ୍ଟେମ୍ବରକୁ । ସରକାର ଆଇନକୁ ଆଖି ବୁଜିଦେଇଛନ୍ତି । ହାଇକୋର୍ଟ ନିଷ୍ପତ୍ତିକୁ ରାଜ୍ୟ ସରକାର ସୁପ୍ରିମକୋର୍ଟରେ ଅପିଲ୍ କରିବାର ନିଷ୍ପତ୍ତି ପରିପ୍ରେକ୍ଷୀରେ ଏଭଳି ମନମାନି ଚଳାଇଛନ୍ତି । ଏଠାରେ ଉଲ୍ଲେଖଯୋଗ୍ୟ, ଏ ପର୍ଯ୍ୟନ୍ତ ସୁପ୍ରିମକୋର୍ଟରେ ରାଜ୍ୟ ସରକାରଙ୍କ ପିଟିସନ୍ ଗ୍ରହଣ ବି ହୋଇନାହିଁ ।
ଏ ସମ୍ପର୍କରେ ନଗର ଉନ୍ନୟନ ବିଭାଗ ପକ୍ଷରୁ କେହି ପାଟି ଖୋଲୁନାହାନ୍ତି । ପୈାର ନିର୍ଦ୍ଦେଶକଙ୍କୁ ପଚାରିବାରେ ସେ ଅନ୍ୟ କଥା କହି ବାଆଁରେଇଛନ୍ତି ।

ସୂଚନାଯୋଗ୍ୟ, ୱାର୍ଡ ପୁର୍ନଗଠନ ଓ ସ୍ଥାନ ସଂରକ୍ଷଣ ନେଇ ଜିଲ୍ଲାପାଳମାନେ ଜନସାଧାରଣଙ୍କଠାରୁ ପ୍ରସ୍ତାବ ଓ ଅଭିଯୋଗ ଆହ୍ୱାନ କରି ଗତ ଫେବୃଆରୀ ୧୫ ତାରିଖରେ ଡ୍ରାଫ୍ଟ୍ ନୋଟିଫିକେସନ୍ ଜାରି କରିଥିଲେ । ଏହାର ଶେଷ ତାରିଖ ଥିଲା ଫେବୃଆରୀ ୨୪ । ଜିଲ୍ଲାପାଳମାନେ ମାର୍ଚ୍ଚ ୮ ତାରିଖରେ ଏହାର ବିଜ୍ଞପ୍ତି ପ୍ରକାଶ କରିଥିଲେ । ଆପେଲେଟ୍ ଅଥରିଟି ଭାବେ ରାଜ୍ୟ ସରକାରଙ୍କ ନଗର ଉନ୍ନୟନ ବିଭାଗ ଜିଲ୍ଲାପାଳଙ୍କ ତାଲିକା ଉପରେ ଅଭିଯୋଗର ମାସେ ଭିତରେ ଶୁଣାଣି କରିବା ପରିବର୍ତ୍ତେ ମେ ୧୯ରୁ ଶୁଣାଣି କରି ସେପ୍ଟେମ୍ବର ୬ ପର୍ଯ୍ୟନ୍ତ ଲମ୍ବାଇଛନ୍ତି ।

ଏଠାରେ ପ୍ରଶ୍ନ ଉଠୁଛି, ନଗର ଉନ୍ନୟନ ବିଭାଗର ଅଧିକାରୀମାନେ ମ୍ୟୁନିସିପାଲ ସଂଶୋଧିତ ଆଇନ ବିଷୟରେ କ’ଣ ଏତେ ଅଜ୍ଞ ? ଅଜ୍ଞତା ଯୋଗୁଁ ଏଭଳି ବିଭ୍ରାଟ୍ ହୋଇଛି ନା ଜାଣିଶୁଣି ସମୟ ଗଡ଼ାଇବାକୁ ନୀତି ନିୟମକୁ ଜଳାଞ୍ଜଳି ଦିଆଯାଇଛି ? ମାମଲା କୋର୍ଟରେ ନ ଥିଲେ ସରକାର ପୈାର ନିର୍ବାଚନ ଠିକଣା ସମୟରେ କରାଇ ପାରିଥାଆନ୍ତେ ତ ?