ଭୁବନେଶ୍ୱର: ଦୁର୍ଦ୍ଦାନ୍ତ ଟିଟୋକୁ କେନ୍ଦ୍ରାପଡ଼ା ସହର ଭିତରେ ପେଟ୍ରୋଲ୍ ପମ୍ପ ପାଇଁ ଜାଗା ଆବଣ୍ଟନର ସାଂଘାତିକ ତଥ୍ୟ ଲାଗିଛି ମିଡ଼ ଡ଼େ ଓଡ଼ିଶା ହାତରେ । କେନ୍ଦ୍ରାପଡ଼ା ମ୍ୟୁନିସିପାଲିଟି କାଉନସିଲ୍, ଏକଜ୍ୟୁଟିଭ୍ ଅଫିସର, ଅମିନ, ଓକିଲଙ୍କ ମିଳିତ ଉଦ୍ୟମରେ ଟିଟୋ ପତ୍ନୀଙ୍କୁ ଦିଆଯାଇଛି ମ୍ୟୁନିସିପାଲିଟିର ୫ ଡିସିମିଲି ମୂଲ୍ୟବାନ ଜାଗା । ତାକୁ ଲାଗି ୯ ଡିସିମିଲି ଜାଗା ମାଡ଼ିବସିବାକୁ ବି ସୁଯୋଗ ଦିଆଯାଇଛି ।
ଅନୁସଂଧାନରୁ ଜଣାପଡ଼ିଛି, ଗତ ୨୩.୭.୨୦୧୫ ରେ ଟିଟୋର ପତ୍ନୀ ବେନଜୀର ବିବି ପେଟ୍ରୋଲ୍ ପମ୍ପ ଜାଗା ପାଇଁ କେନ୍ଦ୍ରାପଡ଼ା ମ୍ୟୁନିସିପାଲିଟି ଅଫିସରେ ଆବେଦନ କରିଥିଲେ । ଟିଟୋର ପତ୍ନୀଙ୍କ ଆବେଦନକୁ ଚାତକ ପରି ଚାହିଁଲା ଭଳି ତତକ୍ଷଣାତ୍ ସେହିଦିନ ହିଁ ଏକଜ୍ୟୁଟିଭ ଅଫିସର ତାଙ୍କ ଜେଇ ଓ ଅମିନ୍ ଙ୍କୁ ଇନକ୍ୱାରି ରିପୋର୍ଟ ଦେବା ପାଇଁ ନିର୍ଦ୍ଦେଶ ଦେଲେ । ଜେଇ ଓ ଅମିନ୍ ବି କାଳବିଳମ୍ବ ନ କରି ପରଦିନ ଅର୍ଥାତ୍ ୨୪ ତାରିଖରେ ଦେଇଦେଲେ ଇନକ୍ୱାରି ରିପୋର୍ଟ । ଆବେଦନକାରୀଙ୍କୁ ଜାଗା ଦେବାରେ କୌଣସି ସମସ୍ୟା ନାହିଁ ବୋଲି ଜଣାଇ କାଉନସିଲ୍ ତାହା ଉପରେ ବିଚାର କରୁ ବୋଲି ଲେଖି ରିପୋର୍ଟ ଦେଇଦେଲେ । ତିନି ଦିନ ପରେ ୨୮ ତାରିଖରେ ଏକଜ୍ୟୁଟିଭ୍ ଅଫିସର ତାହାକୁ ଲିଗାଲ୍ ଭିଉ(ଆଇନଗତ ମତାମତ) ପାଇଁ ପଠାଇଲେ କଟକର ବରିଷ୍ଠ ଆଇନଜୀବୀ ମନୋଜ କୁମାର ମିଶ୍ରଙ୍କ ପାଖକୁ ।
ତାହା ପାଇଲାକ୍ଷଣି ସେହି ୨୮ ତାରିଖରେ ଓକିଲ ମହାଶୟ ତାଙ୍କର ମତାମତ ଜଣାଇଲେ । ତାଙ୍କ ମତାମତ ଥିଲା ୨୫୫(୩) ମ୍ୟୁନିସିପାଲ୍ ଆକ୍ଟ ୧୯୫୦ ଏବଂ ୨୧୨ ମ୍ୟୁନିସିପାଲ୍ ରୁଲ୍,୧୯୫୩ ଅନୁଯାୟୀ ଆବେଦନକାରୀଙ୍କୁ ମ୍ୟୁନିସିପାଲିଟି ଜମି ଦେଇପାରିବ । ଓକିଲଙ୍କଠାରୁ ଏହି ମତାମତକୁ ଧରି ପରଦିନ ୨୯ ତାରିଖରେ ଅନୁଷ୍ଠିତ କାଉନସିଲ୍ ମିଟିଂରେ ଏକଜ୍ୟୁଟିଭ୍ ଅଫିସର ପକାଇଲେ ଏହି ବିଷୟ । କାଉନସିଲ୍ ବି କାଳବିଳମ୍ବ କଲା ନାହିଁ । ଟିଟୋ ପତ୍ନୀଙ୍କୁ ଜମି ଦେବାକୁ ତତକ୍ଷଣାତ ନିଷ୍ପତ୍ତି ନେଇଗଲା । ସେଥିରେ କୁହାଗଲା, ଆବେଦନକାରୀଙ୍କୁ ୫ ଡିସିମିଲ୍ ଜାଗା ୩ ବର୍ଷ ପାଇଁ ଲିଜ୍ ରେ ଦିଆଯାଉ । ସେଥିପାଇଁ ବର୍ଷକୁ ୬ ହଜାର ଟଙ୍କା ଅସୁଲ ଧାର୍ଯ୍ୟ କରାଗଲା । ଖାଲି ସେତିକି ନୁହେଁ, ୩ ବର୍ଷ ସରିଲା ପରେ କାଉନସିଲ୍ ଅନୁମୋଦନରେ ଆଉ ୩ ବର୍ଷ ଲିଜ୍ ଦିଆଯିବ ବୋଲି ନିଷ୍ପତ୍ତିପତ୍ରରେ ଲେଖି ଦିଆଗଲା ।
କାଉନସିଲ୍ ର ଏହି ନିଷ୍ପତ୍ତି ଅନୁଯାୟୀ, ୧.୮.୨୦୧୫ ରୁ ଉକ୍ତ ଜମି ପାଇଁ ଲିଜ୍ ର ଅବଧି ଆରମ୍ଭ ହେଲା । ଆଉ ସେଥିପାଇଁ କେନ୍ଦ୍ରାପଡ଼ା ମ୍ୟୁନିସିପାଲିଟି ଏକଜ୍ୟୁଟିଭ୍ ଅଫିସରଙ୍କ ସହ ଟିଟୋ ପତ୍ନୀଙ୍କ ରାଜିନାମା ହୋଇଥିଲା ୭.୮.୨୦୧୫ ରେ । ସୂଚନାଯୋଗ୍ୟ ଟିଟୋ ପତ୍ନୀଙ୍କୁ ଆବଣ୍ଟନ ହୋଇଥିବା ୫ ଡିସିମିଲ୍ ଜାଗା ସମୁଦାୟ ୭୫ ଡିସିମିଲ୍ ଜାଗାର ଏକ ଅଂଶବିଶେଷ ବା ପ୍ୟାଚ୍ ।
ବରିଷ୍ଠ ଆଇନଜୀବୀ ଶ୍ରୀ ମିଶ୍ର ଯେଉଁ ରୁଲ୍ କୁ ଆଧାର କରି ଟିଟୋ ପତ୍ନୀଙ୍କୁ ଜାଗା ଦେବା ପାଇଁ ସୁପାରିଶ କରିଥିଲେ ତାହାକୁ ନେଇ ଖୋଦ୍ ନଗର ଉନ୍ନୟନ ବିଭାଗ ଆପତ୍ତି ଉଠାଇଛି । ଜଣେ ବ୍ୟକ୍ତିଙ୍କୁ ବ୍ୟବସାୟିକ ଉଦ୍ଦେଶ୍ୟରେ ମ୍ୟୁନିସିପାଲିଟି ଜାଗା ଦେବା ପାଇଁ ୨୫୫(୩) ମ୍ୟୁନିସିପାଲ୍ ଆକ୍ଟ ୧୯୫୦ ଏବଂ ୨୧୨ ମ୍ୟୁନିସିପାଲ୍ ରୁଲ୍,୧୯୫୩ ପ୍ରଯୁଜ୍ୟ ନୁହେଁ ବୋଲି ନଗର ଉନ୍ନୟନ ବିଭାଗ ତାହାର ଅନୁଧ୍ୟାନ ରିପୋର୍ଟରେ ଦର୍ଶାଇଛି । ସଂପୃକ୍ତ ଓକିଲଙ୍କର ଏହା ‘ବ୍ଲାକନଡ୍ ମିସଗାଇଡ୍’ ବୋଲି କଡା ଟିପ୍ପଣୀ ଦିଆଯାଇଛି । ସେହିଭଳି କେନ୍ଦ୍ରାପଡ଼ା ସହରର ମୁଖ୍ୟ ଜାଗାରେ ଜଣେ ବ୍ୟକ୍ତି(ମହିଳା)ଙ୍କୁ ମ୍ୟୁନିସିପାଲିଟିର ମୂଲ୍ୟବାନ ଜାଗାକୁ ତରବରିଆ ଭାବେ ବାର୍ଷିକ ମାତ୍ର ୬ହଜାର ଟଙ୍କାରେ ଟେକି ଦେବା ପଛରେ ଅସାଧୁ ମେଣ୍ଟ କାମ କରିଥିବା କୁହାଯାଇଛି । ଆବେଦନକାରୀ, ଅଫିସର, ଓକିଲ ଏବଂ କାଉନସିଲ୍ ର ଏହା ଅସାଧୁ ମେଣ୍ଟ ବୋଲି ଟିପ୍ପଣୀ ଦିଆଯାଇଛି ।
ଶେଷ ଖବର ଅନୁଯାୟୀ, କ୍ରାଇମବ୍ରାଞ୍ଚ ଏସଟିଏଫ ହାତକୁ ଏହି ତଥ୍ୟ ଆସିବା ପରେ ମାମଲାର ଛାନଭିନ୍ ଆରମ୍ଭ ହୋଇଛି ।
