ପୁରୀ: “ଆପଣମାନେ ସାରା ରାଜ୍ୟକୁ ଅନ୍ନ ଦେଉଛନ୍ତି । ଆପଣମାନେ ଦେଉଥିବା ଚାଉଳରେ ମହାପ୍ରାସଦ ହେଉଛି । ଆପଣ ଦେଉଥିବା ପରିବା ମହାପ୍ରସାଦରେ ଲାଗୁଛି । ଆପଣମାନେ ଏକ ମହାନ କାର୍ଯ୍ୟ କରୁଛନ୍ତି । ତେଣୁ ଏହି ଯୋଜନାର ନାମ ମୁଁ ‘କାଳିଆ’ ରଖିଲି । ଆଜି ଶ୍ରୀକ୍ଷେତ୍ରରୁ ମହାପ୍ରଭୁଙ୍କ ଆର୍ଶିବାଦ ନେଇ ‘କାଳିଆ’ ଯାତ୍ରା ଆରମ୍ଭ କଲି । ‘କାଳିଆ’ ଯାତ୍ରାକୁ କେହି ରୋକିପାରିବେ ନାହିଁ । ଓଡ଼ିଶାର ଅର୍ଥନୀତିରେ ବିକାଶରେ ଏହା ମାଇଲ ଖୁଣ୍ଟ ହୋଇରହିବ ।”
ଆଜି ପୁରୀରେ ପ୍ରଥମ ‘କାଳିଆ’ ଟଙ୍କା ବଣ୍ଟନର ଶୁଭାରମ୍ଭ କରିବା ଅବସରରେ ବିଶାଳ ଚାଷୀ ସମାବେଶକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ଏହା ଥିଲା ଉଦବୋଧନ । ମୁଖ୍ୟମନ୍ତ୍ରୀ ଚାଷୀଭାଇମାନଙ୍କ ଆଗରେ ‘କାଳିଆ’ ଯୋଜନା ପଛର କାହାଣୀ କହିଥିଲେ । ସେ କହିଥିଲେ, ମୁଁ ଚାହେଁ ଆମର ଅନ୍ନଦାତାମାନେ ଭଲରେ ରୁହନ୍ତୁ । କେବଳ ଗୋଟିଏ ଥର ସାହାଯ୍ୟ କଲେ, ସମସ୍ୟା ଦୂର ହେବ ନାହିଁ । ତେଣୁ ଏପରି ଯୋଜନା ହେବା ଦରକାର ଯେପରି ଆପଣମାନେ ସବୁ ଫସଲରେ ସବୁ ଋତୁରେ ସାହାଯ୍ୟ ପାଇପାରିବେ । ସେଥିପାଇଁ ଏ କାଳିଆ ଯୋଜନା । ଆପଣମାନେ ୩ ବର୍ଷରେ ୬ଟି ଋତୁରେ ସାହାଯ୍ୟ ପାଇବେ । ଏହି ଯୋଜନାରେ ରାଜ୍ୟର ସବୁ ଚାଷୀ, ବିଶେଷକରି ଛୋଟ ଚାଷୀ, ଭାଗ ଚାଷୀ, କୃଷି ଶ୍ରମିକ ସମସ୍ତେ ସୁବିଧା ପାଇବେ । ରାଜ୍ୟର ୯୨ ପ୍ରତିଶତ ଚାଷୀ ଏଥିରୁ ଉପକାର ପାଇବେ । ଏଥିପାଇଁ କାଳିଆ ଯୋଜନାକୁ ଆଜି ସାରା ଦେଶରେ ସମସ୍ତେ ଭଲ ଯୋଜନା ଭାବରେ ପ୍ରଶଂସା କରୁଛନ୍ତି ।
