ଭୁୁବନେଶ୍ୱର: ଭାରତ ସରକାର ଘୋଷଣା କରିଥିବା ସମ୍ମାନଜନକ ପଦ୍ମଶ୍ରୀ ସମ୍ମାନ ଗ୍ରହଣ କରିବାକୁ ବିଶିଷ୍ଟ ଲେଖିକା ଗୀତା ମେହେଟ୍ଟା ମନା କରିଦେଇଛନ୍ତି । ନ୍ୟୁୟର୍କରେ ରହୁଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏହି ଏକମାତ୍ର ଭଉଣୀ ବିନମ୍ରତାର ସହ ଏହାକୁ ପ୍ରତ୍ୟାଖ୍ୟାନ କରିଛନ୍ତି । ଗତକାଲି ପଦ୍ମଶ୍ରୀ ତାଲିକା ଘୋଷିତ ହେବା ପରେ ଶ୍ରୀମତୀ ମେହେଟ୍ଟା ନ୍ୟୁୟର୍କରୁ ତାଙ୍କର ନିଷ୍ପତ୍ତି ଜଣାଇ ଦେଇଛନ୍ତି ।
ଏକ ପ୍ରେସ୍ ବିବୃତିରେ ସେ କହିଛନ୍ତି, ଭାରତ ସରକାର ତାଙ୍କୁ ପଦ୍ମଶ୍ରୀ ସମ୍ମାନ ପାଇଁ ଯୋଗ୍ୟ ମଣିଥିବାରୁ ସେ ନିଜକୁ ଗୌରବାନ୍ୱିତ ମନେ କରୁଛନ୍ତି । କିନ୍ତୁ ବଡ଼ ଦୁଃଖର ସହ ତାଙ୍କୁ କହିବାକୁ ପଡୁଛି ଯେ ସେ ଏହାକୁ ଗ୍ରହଣ କରିବାକୁ ଉଚିତ ମଣୁନାହାନ୍ତି । ଆଗକୁ ସାଧାରଣ ନିର୍ବାଚନ ଅଛି । ଏଭଳି ସମୟରେ ଏହି ପୁରସ୍କାର ଭିନ୍ନ ବାର୍ତ୍ତା ଦେଇପାରେ । ଏହାଦ୍ୱାରା ସେ ନିଜକୁ ଏବଂ ସରକାରଙ୍କୁ ଅଡୁଆରେ ପକାଇବାକୁ ଚାହୁଁନାହାନ୍ତି । ଏହା ତାଙ୍କୁ ବହୁତ ଦୁଃଖ ଦେବ ବୋଲି ଗୀତା କହିଛନ୍ତି ।
ଶ୍ରୀମତୀ ମେହେଟ୍ଟାଙ୍କ ଏହି ନିଷ୍ପତ୍ତି ସାଧାରଣରେ ଚର୍ଚ୍ଚାର ବିଷୟ ହୋଇଛି । ଏହି ନିଷ୍ପତ୍ତି ତାଙ୍କ ମର୍ଯ୍ୟାଦାକୁ ଦ୍ୱିଗୁଣିତ କରିଛି ବୋଲି ବୁଦ୍ଧିଜୀବୀମହଲ ମତ ଦେଇଛନ୍ତି । ସୂଚନାଯୋଗ୍ୟ, ସ୍ୱର୍ଗତ ବିଜୁ ପଟ୍ଟନାୟକଙ୍କ ଝିଅ ଗୀତା ମେହେଟ୍ଟା ଜଣେ ବିଶିଷ୍ଟ ଲେଖିକା ଭାବେ ଆର୍ନ୍ତଜାତୀୟସ୍ତରରେ ସୁନାମ ଅର୍ଜନ କରିଛନ୍ତି । ୧୯୯୭ରେ ତାଙ୍କ ରଚିତ ସ୍ନେକସ୍ ଆଣ୍ଡ ଲାଡର୍ସ: ଗ୍ଲିମ୍ପସ୍ ଅଫ ମଡ଼ର୍ଣ୍ଣ ଇଣ୍ଡିଆ ବହୁ ପାଠକୀୟ ଆଦର ଲାଭ କରିଥିଲା । ତାଙ୍କର ଅନ୍ୟାନ୍ୟ ଚର୍ଚ୍ଚିତ ପୁସ୍ତକ ମଧ୍ୟରେ ରହିଛି, କର୍ମ କେଲା(୧୯୭୯), ରାଜ(୧୯୮୯), ଏ ରିଭର୍ ସୂତ୍ର(୧୯୯୩) ଏବଂ ଇଟରନାଲ ଗଣେଶ: ଫ୍ରମ ବାର୍ଥ ଟୁ ରିବାର୍ଥ)୨୦୦୬) ।
ପୁସ୍ତକ ରଚନା ସହ ଶିକ୍ଷା ଓ ସାହିତ୍ୟ କ୍ଷେତ୍ରରେ ତାଙ୍କର ଅବଦାନକୁ ବହୁ ସ୍ୱୀକୃତି ମିଳିଛି । ଏହାକୁ ବିଚାର କରି ଭାରତ ସରକାର ତାଙ୍କୁ ଚଳିତବର୍ଷର ପଦ୍ମ ସମ୍ମାନ ପାଇଁ ମନୋନୀତ କରିଥିଲେ ।
