ଭୁବନେଶ୍ୱର: ଗୋଲକଙ୍କ ପରି ବେମାରରେ ପଡ଼ିଛନ୍ତି ଭୃଗୁ ! ଛତ୍ରପୁର ଥାନାରେ ହାଜର ହେଲେନି ଭୃଗୁ ବକ୍ସିପାତ୍ର । ଛତ୍ରପୁର କାଉନସିଲର୍ ଲକ୍ଷ୍ମୀଦତ୍ତ ପ୍ରଦାନ ମର୍ଡର ମାମଲାରେ ବିଜେପିର ଏହି ଟାଣୁଆ ନେତା ଆଜି ଥାନାରେ ହଜାର ହେବା ପାଇଁ ସମନ ପାଇଥିଲେ । ମାତ୍ର ଅସୁସ୍ଥ ଥିବାରୁ ହାଜର ହୋଇପାରୁ ନ ଥିବା ନିଜ ଓକିଲଙ୍କ ଜରିଆରେ ଛତ୍ରପୁର ଏସଡ଼ିପିଓ ରମେଶ ଚନ୍ଦ୍ର ସେଠୀଙ୍କୁ ଜଣାଇଛନ୍ତି । ମେଡ଼ିକାଲ୍ ସାର୍ଟିଫିକେଟ୍ ବି ଦେଇଛନ୍ତି । ପୂର୍ବରୁ ତାଙ୍କ ସାଥୀ ତଥା ବିଜେପିର ମୁଖପାତ୍ର ଗୋଲକ ମହାପାତ୍ରଙ୍କ କ୍ଷେତ୍ରରେ ସମାନ ଘଟଣା ଦେଖିବାକୁ ମିଳିଥିଲା । ତାଙ୍କୁ ୭ ତାରିଖରେ ହାଜର ପାଇଁ ସମନ ହୋଇଥିଲା । ମାତ୍ର ସେ ନିଜକୁ ଅସୁସ୍ଥ ଦର୍ଶାଇ ଓଳିଲଙ୍କୁ ପଠାଇ ଦେଇଥିଲେ । ମେଡ଼ିକାଲ୍ ସାର୍ଟିଫିକେଟ ଦେଇ ଅସୁସ୍ଥତାର ପ୍ରମାଣ ଦେଖାଇଥିଲେ ।
ଲକ୍ଷ୍ମୀଦତ୍ତ ମର୍ଡର ମାମଲାରେ ଉଭୟଙ୍କ ସଂପୃକ୍ତି ଅଭିଯୋଗ ରହିଛି । ପୂର୍ବରୁ ଗୋଲକଙ୍କୁ ଥରେ ପୁଲିସ ପଚରାଉଚୁରା କରିସାରିଛି । ଏବେ ସେହି ତଦନ୍ତକୁ ଚଞ୍ଚଳ କରିଛି । ବିଜେଡ଼ିର ଦୁଇ ହେଭିୱେଟ୍ ଅତନୁ ସବ୍ୟସାଚୀ ନାୟକ ଓ ଅରୁଣ କୁମାର ସାହୁଙ୍କୁ ଅଚାନକ ଭାବେ ସିବିିଆଇ ଚିଟଫଣ୍ଡ ମାମଲାକୁ ଟାଣି ସମନ ପଠାଇବା ଦିନ(ଜାନୁଆରୀ ୨୯) ହିଁ ଛତ୍ରପୁର ପୁଲିସ ଲକ୍ଷ୍ମୀଦତ୍ତ ମର୍ଡର ମାମଲାରେ ବିଜେପିର ଦୁଇ ନେତା ଗୋଲକ ଓ ଭୃଗୁଙ୍କୁ ସମନ କରିଥିଲା । ଗୋଲକଙ୍କୁ ୭ ଏବଂ ଭୃଗୁଙ୍କୁ ୯ ତାରିଖରେ ହାଜର ପାଇଁ ସମନ ହୋଇଥିଲା ।
ଇତିମଧ୍ୟରେ ଗୋଲକ ଓ ଭୃଗୁଙ୍କୁ ଗିରଫ ଭୟ ଘାରିଛି । ଗିରଫ ଏଡାଇବା ପାଇଁ ଦୁହେଁ ହାଇକୋର୍ଟରେ ଆଗୁଆ ଜାମିନ ଆବେଦନ କରିଛନ୍ତି । ଗତକାଲି ହାଇକୋର୍ଟରେ ସେମାନଙ୍କ ପିଟିସନ୍ ପଡ଼ିଛି । ଗୋଟିଏ ପଟେ ଏକାଠି ଆଗୁଆ ଜାମିନ ଆବେଦନ ଓ ଅନ୍ୟପଟେ ଅସୁସ୍ଥତା ଦେଖାଇ ପୃଥକ୍ ଭାବେ ଦୁଇ ନେତା ଥାନାରେ ହାଜର ନ ହେବା ଘଟଣା ଚର୍ଚ୍ଚାର ବିଷୟ ହୋଇଛି ।
