ବିଜେପିରେ ବିଦ୍ରୋହର ନିଆଁ: ଭୁବନେଶ୍ୱରରେ ତାଲା ଝୁଲିଲା, ଲକ୍ଷ୍ମୀପୁରରେ ଅଫିସ ଜଳିଲା

ଦଳ ଛାଡ଼ିଲେ ଦୁର୍ଯୋଧନ

ଭୁବନେଶ୍ୱର: ରଙ୍ଗ ମଉଜରେ ବିଜେପି ଅଫିସ ଏବର୍ଷ ବେଶୀ ଜମିଥାଆନ୍ତା । ନେତା ଓ କର୍ମୀଙ୍କ ଖୁସି ମଉଜରେ ଅଞ୍ଚଳ ଫାଟିଥାଆନ୍ତା । ସେଥିପାଇଁ ଦି ଦିନ ଆଗରୁ ଦମଦାର ପ୍ରସ୍ତୁତି ସରିଥିଲା । ହେଲେ ଅଶାନ୍ତ ଓ ବିଦ୍ରୋହର ନିଆଁରେ ଜଳିଗଲା ହୋଲି । ଖୁସିର ମାହୋଲ୍ କୁ ଆସିବାକୁ ଦେଲେନି ଦଳର ବିଦ୍ରୋହୀ କର୍ମୀ । ବିଜେପି ଅଫିସ ମୁଖ୍ୟଗେଟ୍ ରେ ଠୁଙ୍କି ଦେଲେ ତାଲା । ବାଟ ଜଗି ଦିନ ତମାମ ବସିଲେ ଧାରଣାରେ । ଅମୀୟ ଦାଶ ଙ୍କୁ ଟିକେଟ ନ ଦେଇ ଭୁଲ୍ କରିଛ । ଆଉ କିଛି ଶୁଣିବାର ନାହିଁ । ନ୍ୟାୟ ନ ମିଳିଲେ ନିଆଁ ଜଳିବ ବୋଲି ଗର୍ଜନ କଲେ । ଅମୀୟ ନିଜେ ଆସି କର୍ମୀଙ୍କୁ ବୁଝାଇବାକୁ ଚେଷ୍ଟା କରିଥିଲେ ମଧ୍ୟ କର୍ମୀ ବୁଝି ନ ଥିଲେ । ଅମୀୟଙ୍କୁ ଦେଖି କିଛି କର୍ମୀ କାନ୍ଦି ପକାଇଥିଲେ । କର୍ମୀଙ୍କ ଆବେଗରେ ଅମୀୟ ବି ନିଜର କୋହ ସମ୍ବରଣ କରିପାରି ନ ଥିଲେ ।

ଗତକାଲି ଡେରି ରାତିରେ ପ୍ରାର୍ଥୀ ତାଲିକା ଘୋଷଣା ହେବା ପରେ ଏକାମ୍ର ବିଜେପି କର୍ମୀଙ୍କ ମନରେ ଏମିତି ବିଦ୍ରୋହର ନିଆଁ ଜଳୁଛି । ଅମୀୟଙ୍କ ସମର୍ଥକମାନେ ରାତି ଅଧରେ ଦଳର ଉପସଭାପତି ସମୀର ମହାନ୍ତିଙ୍କ ଘର ଉପରକୁ ଢ଼େଲା ମାଡ଼ କରି ତାଙ୍କ କାର୍ ଭାଙ୍ଗିବା ପରେ ବିଜେପି ଅଫିସରେ ଚଢ଼ଉ କରିଥିଲେ ।

ଭୁବନେଶ୍ୱରରେ ଅମୀୟ ସମର୍ଥକଙ୍କ ପ୍ରତିବାଦ ହଙ୍ଗାମା ଚାଲିଥିବା ବେଳେ ସେପଟେ କୋରାପୁଟର ଲକ୍ଷ୍ମୀପୁର ବିଜେପି ଅଫିସରେ ନିଆଁ ଜଳିଥିଲା । ବିଜେପି କର୍ମୀମାନେ ଅଫିସରେ ପଶି ବ୍ୟାପକ ଭଙ୍ଗାରୁଜା କରିଥିଲେ । ଧର୍ମେନ୍ଦ୍ର ପ୍ରଧାନଙ୍କ ଫଟୋ, ଦଳୀୟ ପତାକାକୁ ଜାଳି ଦେଇଥିଲେ । ସେଠାରେ କୁମୁଦ ସାଉନ୍ତଙ୍କ ପ୍ରାର୍ଥୀତ୍ୱକୁ କର୍ମୀମାନେ ଗ୍ରହଣ କରିବାକୁ ନାରାଜ । ବିପିନ କୁମାର ମାନିଙ୍ଗା ବିଜେପି ପାଇଁ ରକ୍ତ ଦେଇ କାମ କରୁଛନ୍ତି । ତାଙ୍କୁ ଟିକେଟ ନ ଦେଇ କୁମୁଦଙ୍କୁ ଟିକେଟ ଦେଲ, ଏବେ ସମ୍ଭାଳ ବୋଲି ଧମକ ଦେଇଛନ୍ତି । ଟିକେଟକୁ ନେଇ କୋରେଇ, ବଡ଼ଚଣା, ବାସୁଦେବପୁରରେ ବି କର୍ମୀମାନେ ଆଜି ତାତିଛନ୍ତି । ନୀଳଗିରିରେ ପ୍ରତାପ ଷଡ଼ଙ୍ଗୀଙ୍କ ସମର୍ଥକମାନେ ତାଙ୍କର ଲୋକସଭା ପ୍ରାର୍ଥୀତ୍ୱକୁ ନେଇ କ୍ଷୁବ୍ଧ ହୋଇପଡ଼ିଛନ୍ତି । ସତ୍ୟବାଦୀରେ ରମାରଂଜନ ବଳିଆରସିଂଙ୍କ ସମର୍ଥକମାନେ ବି ପ୍ରବଳ କ୍ଷୁବ୍ଧ ।

ସେପଟେ ଦଳର ବରିଷ୍ଠ ନେତା ତଥା ଖରିଆର ବିଧାୟକ ଦୁର୍ଯୋଧନ ମାଝୀଙ୍କୁ ଟିକେଟ ମିଳି ନ ଥିବାରୁ ତାଙ୍କ ସମର୍ଥକମାନେ ତାତିଛନ୍ତି । ନେତୃତ୍ୱ ଦ୍ୱାରା ନିଜକୁ ଉପେକ୍ଷିତ ମନେ କରି ଶ୍ରୀ ମାଝୀ ଆଜି ସଂଧ୍ୟାରେ ବିଜେପିରୁ ଇସ୍ତଫା ଘୋଷଣା କରିଛନ୍ତି । ରାଜ୍ୟ ନେତୃତ୍ୱ ବିରୋଧରେ ସେ ପ୍ରବଳ ବିଷୋଦଗାର କରିଛନ୍ତି ।

ବିଜେପିରେ ଦେଖାଦେଇଥିବା ଅସନ୍ତୋଷ ଆଗକୁ ଆହୁରି ଉଗ୍ରରୂପ ନେବ ବୋଲି ବିଭିନ୍ନ ନିର୍ବାଚନମଣ୍ଡଳୀରେ ଟିକେଟରୁ ବଞ୍ଚିତ ଆଶାୟୀମାନେ ଖୋଲାଖୋଲି କହିଛନ୍ତି ।