ଭୁବନେଶ୍ୱର: ବିଜେଡ଼ିର ବରିଷ୍ଠ ନେତା ତଥା ବାଙ୍କୀ ବିଧାୟକ ପ୍ରଭାତ ତ୍ରିପାଠୀ ଏଥର ନିର୍ବାଚନ ଲଢ଼ିବେନି । ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ସେ ତାଙ୍କର ଇଚ୍ଛା ଜଣାଇଛନ୍ତି । ସାଧାରଣ ଜୀବନରେ ନୈତିକତା ରକ୍ଷା ଏବଂ ରାଜନୀତିରେ ମୂଲ୍ୟବୋଧକୁ ଗୁରୁତ୍ୱ ଦେଉଥିବା ନବୀନଙ୍କ ଆଦର୍ଶକୁ ସମର୍ଥନ କରି ସେ ଏହି ନିଷ୍ପତ୍ତି ନେଉଥିବା ଜଣାଇଛନ୍ତି । ବିଜେଡ଼ିର ଜଣେ ସାଧାରଣ କର୍ମୀଭାବେ ସଭାପତି ଯେଉଁ ଦାୟିତ୍ୱ ଦେବେ ତାହାକୁ ଅକ୍ଷରେ ଅକ୍ଷରେ ପାଳିବେ ବୋଲି କହିଛନ୍ତି ।
ବିଜେଡ଼ିର ଏହି ବରିଷ୍ଠ ନେତା ଦଳ ସଭାପତିଙ୍କୁ ଏକ ଆବେଗପୂର୍ଣ୍ଣ ଚିଠି ଲେଖିଛନ୍ତି । ବିଜେଡ଼ିର ଜଣେ ପ୍ରତିଷ୍ଠାତା ସଭ୍ୟ ଭାବେ ଦଳ ଓ ଦଳର ନେତାଙ୍କ ପ୍ରତି ତାଙ୍କର ଅଗାଧ ସମ୍ମାନ ରହିଛି । ଗତ ନିର୍ବାଚନରେ ବାଙ୍କୀରୁ ସେ ତାଙ୍କ ନିକଟତମ ପ୍ରତିଦ୍ୱନ୍ଦୀଙ୍କୁ ୪୪ ହଜାର ଭୋଟ ବ୍ୟବଧାନରେ ପରାସ୍ତ କରିଥିଲେ । ତେବେ ତାଙ୍କର ଏହି ଲୋକପ୍ରିୟତା ତାଙ୍କ ପାଇଁ କାଳ ହେଲା । ବିଜେପି ଇର୍ଷାନ୍ୱିତ ହୋଇ ତାଙ୍କ ବିରୋଧରେ ବିରାଟ ଷଡ଼ଯନ୍ତ୍ର ରଚିଲା ଏବଂ ଚିଟଫଣ୍ଡ୍ ସ୍କାମ୍ ରେ ଫସାଇଲା । କନ୍ଧମାଳ ଉପନିର୍ବାଚନ ପରିପ୍ରେକ୍ଷୀରେ ଦଳ ଏବଂ ତାଙ୍କୁ ବଦନାମ କରିବାକୁ ବିଜେପିର ଏହି ଷଡ଼ଯନ୍ତ୍ର ଥିଲା ।
ବାସ୍ତବରେ ଚିଟଫଣ୍ଡ ମାମଲାରେ ତାଙ୍କର କିଛି ବି ଦୋଷ ନାହିଁ । କୌଣସି ଚିଟଫଣ୍ଡ ସଂସ୍ଥାର ସେ ସେୟାର ହୋଲଡର କିମ୍ବା ନିର୍ଦ୍ଦେଶକ ନୁହଁନ୍ତି । ବାଙ୍କୀ ମହୋତ୍ସବ ଆୟୋଜନ ପରିପ୍ରେକ୍ଷୀରେ ସାମାନ୍ୟ ଏକ ଟେଲିଫୋନ୍ କଲ୍ ଆଧାରରେ ତାଙ୍କୁ ଫସାଇ ଦିଆଗଲା । ବିଜୁ ଜନତା ଦଳ ଏବଂ ତାଙ୍କ ଭାବମୂର୍ତ୍ତକୁ ସାଧାରଣରେ କ୍ଷୂର୍ଣ୍ଣ କରିବା ପାଇଁ ଏଭଳି କରାଗଲା । ତେବେ ବିଜେପିର ଏହି ହୀନ ଗେମପ୍ଲାନ୍ ସଫଳ ହୋଇପାରିନାହିଁ । ଯେଉଁ ଫାଇଦା ପାଇବାର ଆଶା ରଖିଥିଲା ପାଇପାରିଲା ନାହିଁ । ବିଜେଡ଼ି ଆଜି ବି ରାଜ୍ୟରେ ଲୋକପ୍ରିୟ ଦଳ ଏବଂ ବାଙ୍କୀ ଜନସାଧାରଣଙ୍କ ଆଗରେ ତାଙ୍କର ଭାବମୂର୍ତ୍ତି ପୂର୍ବଭଳି ଅକ୍ଷୂର୍ଣ୍ଣ ଅଛି ବୋଲି ପ୍ରଭାତ ଲେଖିଛନ୍ତି ।
ସାଧାରଣ ଜୀବନରେ ନୈତିକତା ଏବଂ ରାଜନୀତିରେ ମୂଲ୍ୟବୋଧ ରକ୍ଷାରେ ଦଳ ସଭାପତି ନବୀନ ପଟ୍ଟନାୟକ ସମଗ୍ର ଦେଶରେ ଜଣେ ଆଦର୍ଶ ରାଜନେତା । ତାଙ୍କର ଏହି ଆଦର୍ଶକୁ ସେ ସମ୍ମାନ ଜଣାଇବାକୁ ଚାହାଁନ୍ତି ଏବଂ ତାଙ୍କର କୌଣସି ନିଷ୍ପତ୍ତି ଉପରେ ବୋଝ ହେବାକୁ ଚାହାଁନ୍ତିନି ବୋଲି ପ୍ରଭାତ ଜଣାଇଛନ୍ତି । ତାଙ୍କ ବିରୋଧରେ ବିଜେପି ପ୍ରଣୋଦିତ ଚିଟଫଣ୍ଡ ମାମଲା ବିଚାରାଧୀନ ଅବସ୍ଥାରେ ଥିବାରୁ ସେ ଏଥର ନିର୍ବାଚନ ଲଢ଼ିବେ ନାହିଁ । ନବୀନ ପଟ୍ଟନାୟକଙ୍କ ମୂଲ୍ୟବୋଧ ରାଜନୀତିକୁ ତାଙ୍କର ସମର୍ଥନ ରହିଛି । ଦଳ ଚାହିଁଲେ, ସାଂଗଠନିକ କାର୍ଯ୍ୟକ୍ରମ ଏବଂ ନିର୍ବାଚନ ପ୍ରଚାରରେ ସମ୍ପୂର୍ଣ୍ଣ ସମୟ ଦେବେ ବୋଲି ପ୍ରଭାତ ଲେଖିଛନ୍ତି ।
