କନ୍ଧମାଳ: ନବୀନଙ୍କ ଲୋକପ୍ରିୟତା ଓ ନିଜର ଆତ୍ମବିଶ୍ୱାସକୁ ପୁଂଜି କରିଛନ୍ତି ଡ.ଅଚ୍ୟୁତ ସାମନ୍ତ

ଫୁଲବାଣୀ(ସିଦ୍ଧାର୍ଥ ଶଙ୍କର ସୁନ୍ଦରରାୟ) : ପାଦରେ ଚାଲି ଗାଁ ଗାଁ ବୁଲୁଛନ୍ତି । ନିରୀହ ଆଦିବାସୀଙ୍କ ସୁଖଦୁଃଖ ପଚାରି ବୁଝୁଛନ୍ତି । ସେମାନଙ୍କ ଆର୍ଶିବାଦ ପାଇଲେ ଅଞ୍ଚଳର ଶିକ୍ଷା, ସ୍ୱାସ୍ଥ୍ୟ ଆଦି ମୌଳିକ ସମସ୍ୟାକୁ ଅଗ୍ରାଧିକାର ଦେବେ । ଲୋକଙ୍କ କର୍ମନିଯୁକ୍ତି ଓ ରୋଜଗାର ଉପରେ ଗୁରୁତ୍ୱ ଦେବେ । ଅଞ୍ଚଳର ସର୍ବାଙ୍ଗୀନ ବିକାଶ କରି ଭାରତବର୍ଷରେ ଶ୍ରେଷ୍ଠ ନିର୍ବାଚନମଣ୍ଡଳୀ ଭାବେ ଗଢ଼ି ତୋଳିବେ । କନ୍ଧମାଳ ଲୋକସଭା ନିର୍ବାଚନମଣ୍ଡଳୀର ବିଜେଡ଼ି ପ୍ରାର୍ଥୀ ତଥା ଜଣାଶୁଣା ଶିକ୍ଷାବିତ୍ ଡ. ଅଚ୍ୟୁତ ସାମନ୍ତ ଏମିତି ପ୍ରତିଶ୍ରୁତି ଦେଇ ଲୋକଙ୍କଠାରୁ ଭୋଟ ଭିକ୍ଷା କରୁଛନ୍ତି । ନବୀନ ପଟ୍ଟନାୟକଙ୍କ ପ୍ରତି ଲୋକଙ୍କ ଭଲ ପାଇବା ଓ ନିଜର ଆତ୍ମବିଶ୍ୱାସକୁ ପୁଞ୍ଜି କରି ବିଜୟର ଲକ୍ଷ୍ୟ ରଖିଛନ୍ତି ଡ. ସାମନ୍ତ ।

ଖୁବ୍ କମ ଦିନ ମଧ୍ୟରେ ନିର୍ବାଚନମଣ୍ଡଳୀର ୭ଟି ଯାକ ବିଧାନସଭା କ୍ଷେତ୍ର ବୁଲି ଲୋକଙ୍କ ସହ ସମ୍ପର୍କ ଯୋଡି ସାରିଲେଣି ଡ. ସାମନ୍ତ । କନ୍ଧମାଳରୁ ଲୋକସଭା ପ୍ରାର୍ଥୀ ହେବା ତାଙ୍କ ପାଇଁ ଅଚାନକ ହୋଇଥିଲେ ମଧ୍ୟ ଅଞ୍ଚଳ ତାଙ୍କ ପାଇଁ ନୂଆ ନୁହେଁ । ଗରିବ ଆଦିବାସୀ ପିଲାଙ୍କୁ ପାଠ ପଢ଼ାଇ ମଣିଷ କରିବାରେ ନିଜର ସଂକଳ୍ପ ଓ ନିଷ୍ଠା ବଳରେ କନ୍ଧମାଳବାସୀଙ୍କ ହୃଦୟରେ ଆଗରୁ ଥିଲେ । ତାଙ୍କଦ୍ୱାରା ପ୍ରତିଷ୍ଠିତ ‘କିସ୍’ ଶିକ୍ଷାନୁଷ୍ଠାନ କନ୍ଧମାଳରୁ ଶହ ଶହ ଗରିବ ଆଦିବାସୀ ଛୁଆଙ୍କୁ ପାଠ ପଢ଼ାଇ ମଣିଷ କରିଥିବାରୁ ଲୋକଙ୍କ ହୃଦୟରେ ତାଙ୍କ ପାଇଁ ସ୍ୱତନ୍ତ୍ର ଶ୍ରଦ୍ଧା ଓ ସମ୍ମାନ ରହିଛି । ଲୋକଙ୍କ ଏହି ଆର୍ଶିବାଦ ସାଙ୍ଗକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ଓ କନ୍ଧମାଳବାସୀଙ୍କ ପାଇଁ ଅଙ୍ଗୀକାରବଦ୍ଧତା ତାଙ୍କୁ ବିଜୟର ଟୀକା ପିନ୍ଧାଇବ ବୋଲି ଡ. ସାମନ୍ତଙ୍କର ଆଶା ।

ବିରୋଧୀଙ୍କ ପକ୍ଷରୁ ହେଉଥିବା ଅପପ୍ରଚାରକୁ ଖାତିର କରିନାହାନ୍ତି ଡ. ସାମନ୍ତ । ତାଙ୍କ ଦ୍ୱାରା ପ୍ରତିଷ୍ଠିତ ‘କିସ୍’ ଭଳି ବିଶ୍ୱସ୍ତରୀୟ ଶିକ୍ଷାନୁଷ୍ଠାନ ଯାହା ଭାରତକୁ ବିଶ୍ୱଦରବାରରେ ଗର୍ବିତ କରିଛି, ତାହାକୁ ରାଜନୀତି ସହ ଯୋଡି କିଛି ବ୍ୟକ୍ତି କୁତ୍ସାରଟନା କରୁଥିବାରୁ ଦୁଃଖ କରିଛନ୍ତି ସତ ହେଲେ ବିଚଳିତ ନୁହଁନ୍ତି । ୩୦ ବର୍ଷ କାଳ ନିଃସ୍ୱାର୍ଥପର ଜନସେବାରେ ନିଜକୁ ନିୟୋଜିତ କରିଛନ୍ତି ଏବଂ ମୃତ୍ୟୁ ପର୍ଯ୍ୟନ୍ତ ତାହା ଜାରି ରଖିବେ ବୋଲି କହିଛନ୍ତି । ନବୀନବାବୁ ତାଙ୍କ ଉପରେ ଆସ୍ଥା ରଖି ଯେଉଁ ଦାୟିତ୍ୱ ଦେଇଛନ୍ତି ତାହାକୁ ସୁଚାରୂରୂପେ ପାଳନ କରିବାର ସଂକଳ୍ପ ଧରି ଆଗକୁ ବଢୁଥିବା ଡ. ସାମନ୍ତ ବିଭିନ୍ନ ସଭାସମିତିରେ ଭାଷଣ ଦେଉଛନ୍ତି ।

ସୂଚନାଯୋଗ୍ୟ, ୧୯୯୮ ମସିହାରୁ କନ୍ଧମାଳ ଆସନଟି ବିଜେଡ଼ି ଦୁର୍ଗ ହୋଇ ରହିଛି । ୨୦୧୪ ନିର୍ବାଚନରେ ବିଜେଡ଼ି ପ୍ରାର୍ଥୀ ହେମେନ୍ଦ୍ର ସିଂ ତାଙ୍କ ନିକଟତମ ପ୍ରତିଦ୍ୱନ୍ଦୀ କଂଗ୍ରେସ ପ୍ରାର୍ଥୀ ହରିହର କରଣଙ୍କୁ ୧ ଲକ୍ଷ ୮୧ ହଜାର ୭୧ ଖଣ୍ଡ ଭୋଟରେ ପରାସ୍ତ କରିଥିଲେ । ହେମେନ୍ଦ୍ରଙ୍କ ଅକାଳ ମୃତ୍ୟୁ ଯୋଗୁଁ ମାତ୍ର ୬ ମାସ ପରେ ସେଠାରେ ଉପନିର୍ବାଚନ ଅନୁଷ୍ଠିତ ହୋଇଥିଲା । ବିଜେଡ଼ି ପ୍ରାର୍ଥୀ ଭାବେ ସ୍ୱର୍ଗତ ହେମେନ୍ଦ୍ରଙ୍କ ପତ୍ନୀ ପ୍ରତ୍ୟୁଷା ରାଜେଶ୍ୱରୀ ସିଂ ତାଙ୍କର ନିକଟତମ ବିଜେପି ପ୍ରତିଦ୍ୱନ୍ଦୀ ରୁଦ୍ରମାଧବ ରାୟଙ୍କୁ ୨ ଲକ୍ଷ ୯୮ ହଜାର ଭୋଟ ବ୍ୟବଧାନରେ ପରାସ୍ତ କରିଥିଲେ ।

ଅବଶ୍ୟ ଦଳୀୟ ଦୃଷ୍ଟିକୋଣରୁ ଏଥର ବିଜେଡ଼ି କନ୍ଧମାଳରେ ପୂର୍ବସ୍ଥିତିରେ ନାହିଁ । ଗତଥର ଜି. ଉଦୟଗିରିକୁ ଛାଡ଼ିଦେଲେ ୬ଟି ଯାକ ବିଧାନସଭା ଆସନ ବିଜେଡ଼ି ଅକ୍ତିଆରକୁ ଆସିଥିଲେ ମଧ୍ୟ ଏଥର ବିଜେପି ଏକ ଶକ୍ତି ଭାବେ ଉଭା ହୋଇଛି । ସବୁଜାଗାରେ କଂଗ୍ରେସର ପକେଟ ଭୋଟ୍ ଥାଇ ବି ଦୁର୍ବଳ ସଂଗଠନ ଯୋଗୁଁ କଂଗ୍ରେସକୁ ପଛରେ ପକାଇ ଦେଇଛି ବିଜେପି । ବାସ୍ତବରେ ଦେଖିଲେ, ବିଜେଡ଼ି ଓ ବିଜେପି ମଧ୍ୟରେ ସବୁଠି ଟକ୍କର ହେଉଛି । ଭଂଜନଗର, ଦଶପଲ୍ଲାଓ ଅନେକାଂଶରେ ବୌଦ୍ଧକୁ ଛାଡ଼ିଦେଲେ ବିଜେଡ଼ି ପାଇଁ ଅନ୍ୟ ୪ଟି ଜାଗାରେ କଡ଼ା ଚାଲେଂଜ ରହିଛି । ଦଳୀୟ ଅର୍ନ୍ତଦ୍ୱନ୍ଦ ସାଙ୍ଗକୁ ବିଜେପିର ପ୍ରଭାବ ବିଜେଡ଼ି ପାଇଁ କିଛିଟା ଚାଲେଂଜ ହୋଇଛି । ତେବେ ଅସନ୍ତୁଷ୍ଟ ଦଳୀୟ ନେତା ଓ କର୍ମୀଙ୍କୁ ସାଙ୍ଗରେ ନେଇ ବିଜେଡ଼ି ଭୋଟ ଅତୁଟ ରଖିବାକୁ ଡ. ସାମନ୍ତ ପ୍ରାଣମୂର୍ଚ୍ଛା ଉଦ୍ୟମ ଚଳାଇଛନ୍ତି । ପୂର୍ବସ୍ଥିତିରେ ବହୁ ଉନ୍ନତି ଆସିସାରିଲାଣି ବୋଲି ତାଙ୍କ ସମର୍ଥକମାନେ ଦାବି କରିଛନ୍ତି ।

ତେବେ ସେ ଯାହା ହେଉନା କାହିଁକି, ବିଜେଡ଼ି ଓ ନବୀନ ପଟ୍ଟନାୟକଙ୍କ ଲୋକପ୍ରିୟତା ଏବଂ ଡ. ଅଚ୍ୟୁତ ସାମନ୍ତଙ୍କ ବ୍ୟକ୍ତିତ୍ୱ କନ୍ଧମାଳରେ ତାଙ୍କୁ ବିଜୟର ମୁକୁଟ ପିନ୍ଧାଇବ ବୋଲି ରାଜନୈତିକ ସମୀକ୍ଷକମାନେ ଆକଳନ କରୁଛନ୍ତି ।