ନୂଆଦିଲ୍ଲୀ: ବହୁ ପ୍ରତୀକ୍ଷିତ ସୌର ଅଭିଯାନରେ ଭାରତ ଇତିହାସ ରଚିଛି । ସୂର୍ଯ୍ୟ ଅଭିମୁଖେ ଯାତ୍ରା କରିଛି ଆଦିତ୍ୟ-ଏଲ୍ ୧ । ଆନ୍ଧ୍ରପ୍ରଦେଶର ଶ୍ରୀହରିକୋଟାସ୍ଥିତ ସତୀଶ ଧାୱନ ମହାକାଶ କେନ୍ଦ୍ରରୁ ଦିନ ୧୧ଟା ୫୦ ମିନିଟରେ ଏହା ସଫଳତାର ସହ ଉତକ୍ଷେପଣ ହୋଇଛି । PSLV C57 ରକେଟରେ ଏହା ମହାକାଶକୁ ପ୍ରେରଣ କରାଯାଇଛି । ଉତକ୍ଷେପଣର ୧ ଘଣ୍ଟା ପରେ ନିର୍ଦ୍ଧାରିତ କକ୍ଷପଥରେ ଆଦିତ୍ୟ-ଏଲ୍ ୧ ସ୍ଥାପିତ ହୋଇଥିବା ଇସ୍ରୋ ଅଧ୍ୟକ୍ଷ ଏସ.ସୋମନାଥ ସୂଚନା ଦେଇଛନ୍ତି ।
ପୃଥିବୀଠାରୁ ସୂର୍ଯ୍ୟର ଦୂରତା ୧୫ କୋଟି କିଲୋମିଟର ହୋଇଥିଲେ ମଧ୍ୟ ଆଦିତ୍ୟ-ଏଲ୍ ୧ ସମୁଦାୟ ୧୫ ଲକ୍ଷ କିଲୋମିଟର ଯାତ୍ରା କରିବ । ଲକ୍ଷ୍ୟସ୍ଥଳ ଏଲ୍ ୧ ବା ଲାଗ୍ରାଞ୍ଜ ପଏଣ୍ଟ୍-୧ ରେ ପହଞ୍ଚିବାକୁ ତାକୁ ୪ ମାସ(୧୨୭ ଦିନ) ସମୟ ଲାଗିବ । ସେଠାରେ ଏହି ମହାକାଶ ଯାନକୁ ଅବସ୍ଥାପିତ କରି ତାହା ଜରିଆରେ ଇସ୍ରୋ ସୂର୍ଯ୍ୟର ଫଟୋସ୍ପିୟର, କ୍ରୋମୋସ୍ପିୟର, ବାହ୍ୟସ୍ତର କରୋନା ତଥା ସୌର ବାୟୁ ଉପରେ ଅନୁଧ୍ୟାନ କରି ତଥ୍ୟ ହାସଲ କରିବ ।
ପ୍ରଥମ ପର୍ଯ୍ୟାୟରେ ଏହି ମହାକାଶ ଯାନ ଆଦିତ୍ୟ-ଏଲ୍ ୧କୁ ପୃଥିବୀର ନିମ୍ନ କକ୍ଷପଥରେ ଅବସ୍ଥାପିତ କରାଯିବ । ପରବର୍ତ୍ତୀ ପର୍ଯ୍ୟାୟରେ କକ୍ଷପଥରେ ପରିବର୍ତ୍ତନ କରାଯିବ । ଶେଷରେ ଏହାକୁ ପୃଥିବୀଠାରୁ ୧୫ ଲକ୍ଷ କିଲୋମିଟର ଦୂରତାରେ ଥିବା ସୂର୍ଯ୍ୟ-ପୃଥିବୀ ସିଷ୍ଟମର ଲାଗ୍ରାଞ୍ଜ ପଏଣ୍ଟ(ଏଲ୍ ୧) ପାଖରେ ହାଲୋ ଅର୍ବିଟରେ ସ୍ଥାପନ କରାଯିବ । ଏଲ୍ ୧ ପଏଣ୍ଟରେ ଗୋଟିଏ ମହାକାଶ ଯାନ ରହିବାର ସୁବିଧା ଏୟା ଯେ ଏହା କୌଣସି ଗ୍ରହଣ ଆଦିର ପ୍ରତିବନ୍ଧକ ବିନା ସୌର କାର୍ଯ୍ୟକଳାପ ଉପରେ ନିରନ୍ତର ଅନୁଧ୍ୟାନ କରିପାରିବ ।
ଆଦିତ୍ୟ-ଏଲ୍ ୧ ମହାକାଶ ଯାନରେ ୭ଟି ପେଲୋଡ ରହିଛି । ସେଥିରୁ ୪ଟି ପେଲୋଡ ସୂର୍ଯ୍ୟ ଉପରେ ଅନୁଧ୍ୟାନ କରିବାକୁ ଥିବା ବେଳେ ୩ଟି ପେଲୋଡ୍ ଲାଗ୍ରାଞ୍ଜ ପଏଣ୍ଟ ଏଲ୍ ୧ ଉପରେ ପରୀକ୍ଷା ନିରୀକ୍ଷା କରିବ ।
ଭାରତର ଚନ୍ଦ୍ରଯାନ-୩ ର ସଫଳତା ପରେ ପରେ ଏବେ ସୂର୍ଯ୍ୟ ଅଭିଯାନ ଉପରେ ସମଗ୍ର ବିଶ୍ୱର ନଜର ରହିଛି । ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ(ଇସ୍ରୋ)ର ଏହା ହେଉଛି ପ୍ରଥମ ସୌର ମିସନ । ଏହି ସୌରଯାନ ସମ୍ପୂର୍ଣ୍ଣ ରୂପେ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ହୋଇଛି ।
