ମୁମ୍ବାଇ: ଷ୍ଟୁଡିଓରେ ସଦାସର୍ବଦା ଗଳା ଫଟାଇ ହଲାପଟା କରୁଥିବା ରିପବ୍ଲିକ୍ ଟିଭି ଚାନେଲ୍ ମାଲିକ ତଥା ସମ୍ପାଦକ ଅର୍ଣ୍ଣବ ଗୋସ୍ୱାମୀ କୋର୍ଟକୁ ମଧ୍ୟ ଟିଭି ଷ୍ଟୁଡିଓ ଭାବିଦେବାରୁ ହଟହଟା ହୋଇଛନ୍ତି । ଗତ ୪ ତାରିଖରେ ମୁମ୍ବାଇ ପୁଲିସ ଅର୍ଣ୍ଣବଙ୍କୁ ଗିରଫ କଲା ପରେ ଆଲିବାଗ୍ କୋର୍ଟର ଚିଫ୍ ମାଜିଷ୍ଟ୍ରଟ୍ ଙ୍କ ଆଗରେ ହାଜର କରିଥିଲେ । ତେବେ ଅର୍ଣ୍ଣବ ନିଜକୁ ଜଣେ ଅଭିଯୁକ୍ତ ବୋଲି ମାନିବାକୁ ପ୍ରସ୍ତୁତ ନ ଥିଲେ । କୋର୍ଟରେ ସାମ୍ବାଦିକ ଠାଣି ଦେଖାଇବାରୁ ଚିଫ୍ ମାଜିଷ୍ଟ୍ରେଟ୍ ତାଙ୍କୁ କୋର୍ଟ ଡେକୋରମ୍ ଶିଖିବାକୁ ପରାମର୍ଶ ଦେଇଥିଲେ ।
ବୁଧବାର ସଂଧ୍ୟାରେ ଅର୍ଣ୍ଣବଙ୍କୁ ଆଲିବାଗ ଚିଫ୍ ମାଜିଷ୍ଟ୍ରେଟ୍ ଶ୍ରୀମତୀ ସୁନେନା ପିଙ୍ଗାଲେଙ୍କ କୋର୍ଟରେ ହାଜର କରାଯାଇଥିଲା । ପ୍ରତିପକ୍ଷ ଓକିଲ ବିଳାସ ନାଏକଙ୍କ ସୂଚନା ଅନୁଯାୟୀ, ଜାମିନ୍ ଆବେଦନ ଉପରେ ଉଭୟ ପକ୍ଷର ଶୁଣାଣି ଚାଲିଥିବା ବେଳେ କାଠଗଡ଼ାରେ ଛିଡ଼ା ଅର୍ଣ୍ଣବ ମାଜିଷ୍ଟ୍ରେଟ୍ ଙ୍କ ଆଡକୁ ହାତ ହଲାଇ ପାଟି କରୁଥିଲେ । ପୁଲିସ ତାଙ୍କୁ ମାଡ଼ ମାରି ଆହତ କରିଥିବା କହୁଥିଲେ । ଏପରିକି ମାଜିଷ୍ଟ୍ରେଟ୍ ଙ୍କୁ ଆଘାତ ଚିହ୍ନ ଦେଖାଇବାକୁ ତାଙ୍କ ଡାଏସ୍ ଉପରେ ଚଢ଼ିବାକୁ ଉଦ୍ୟମ କରିଥିଲେ । ଅର୍ଣ୍ଣବଙ୍କର ଏଭଳି ଆଚରଣରେ ମାଜିଷ୍ଟ୍ରେଟ୍ କ୍ଷୁବ୍ଧ ହୋଇ ଶାଳୀନତା ରକ୍ଷା ପାଇଁ ତାଗିଦ୍ କରିଥିଲେ ।
ତେବେ ଅର୍ଣ୍ଣବ କିଛି ଶୁଣିବା ଅବସ୍ଥାରେ ନ ଥିଲେ । ତାଙ୍କ ଓକିଲ ମାମଲା ଉପସ୍ଥାପନ କରି ନିଜର ଯୁକ୍ତି ରଖୁଥିଲା ବେଳେ ଅର୍ଣ୍ଣବ ସେମିତି ହାତ ହଲାଇ ଚିଲ୍ଲାଉଥିଲେ । ମାଜିଷ୍ଟ୍ରେଟ୍ ଙ୍କୁ ତାଙ୍କ ହାତର ଆଘାତ ଚିହ୍ନ ଦେଖାଇବାକୁ ପୁଣି ଥରେ ଉଦ୍ୟମ କରିଥିଲେ ।
ଅର୍ଣ୍ଣବଙ୍କ ଏଭଳି ବ୍ୟବହାରରେ ଚିଫ୍ ମାଜିଷ୍ଟ୍ରେଟ୍ ଭୀଷଣ ବିରକ୍ତ ହୋଇଥିଲେ । ଶାଳୀନତା ରକ୍ଷା ପାଇଁ ତାଙ୍କୁ ବାରମ୍ବାର ତାଗିଦ୍ କରିଥିଲେ । ତେବେ ତାହାପରେ ବି ଅର୍ଣ୍ଣବଙ୍କ ଆଚରଣ ବଦଳି ନ ଥିଲା । ମାଜିଷ୍ଟ୍ରେଟ୍ ଡାକ୍ତରଙ୍କୁ ପ୍ରଶ୍ନ କରୁଥିଲା ବେଳେ ଅର୍ଣ୍ଣବ ସେଥିରେ ବାଧା ଦେଇ ଡାକ୍ତର ମିଛ କହୁଛନ୍ତି ବୋଲି ପୁନର୍ବାର ଚିକ୍ରାର କରିଥିଲେ । ମାଜିଷ୍ଟ୍ରେଟ୍ ଶ୍ରୀମତୀ ପିଙ୍ଗାଲେ ଏଥିରେ ଉତକ୍ଷିପ୍ତ ହୋଇ କୋର୍ଟ ରୁମ୍ ରୁ ବାହାର କରିଦେବା ପାଇଁ ବାଧ୍ୟ ହେବେ ବୋଲି ଶେଷରେ ଅର୍ଣ୍ଣବଙ୍କୁ ସତର୍କ କରିଥିଲେ ।
ଖାଲି ଅର୍ଣ୍ଣବ ନୁହଁନ୍ତି କୋର୍ଟରେ ଉପସ୍ଥିତ ତାଙ୍କ ପତ୍ନୀ ସମ୍ୟବ୍ରତାଙ୍କ ଆଚରଣ ବି ମାଜିଷ୍ଟ୍ରେଟ୍ ଙ୍କୁ କ୍ଷୁବ୍ଧ କରିଥିଲା । ସମ୍ୟବ୍ରତା ନିଜ ମୋବାଇଲ୍ ରେ କୋର୍ଟ ପ୍ରୋସିଡିଂ ରେକର୍ଡ କରୁଥିବାରୁ ମାଜିଷ୍ଟ୍ରେଟ୍ ତାଙ୍କୁ ମଧ୍ୟ ତାଗିଦ୍ କରିଥିଲେ ।
ଅର୍ଣ୍ଣବଙ୍କ ସପକ୍ଷରେ ଓକିଲାତି କରିବାକୁ କିଛି ନେତା ବି କୋର୍ଟରେ ହାଜର ହୋଇଯାଇଥିଲେ । ଧଳା କୁର୍ତ୍ତା ପାଇଜାମା ପିନ୍ଧା ବିଜେପି ବିଧାୟକ ରାହୁଲ ନରଭେକର୍ ପାଟିତୁଣ୍ଡ କରି କୋର୍ଟ ପ୍ରୋସିଡିଂରେ ବାଧା ସୃଷ୍ଟି କରୁଥିଲା ବେଳେ ମାଜିଷ୍ଟ୍ରେଟ୍ ଙ୍କ ନିର୍ଦ୍ଦେଶରେ ପୁଲିସ ତାଙ୍କୁ କୋର୍ଟରୁମ୍ ରୁ ଧକ୍କା ମାରି ବାହାର କରିଦେଇଥିଲେ ।
ରାତି ୧୧.୩୦ ବେଳକୁ ଅର୍ଣ୍ଣବଙ୍କୁ ୧୪ ଦିନିଆ ବିଚାର ବିଭଗୀୟ ହେପାଜତକୁ ପଠାଇଥିଲେ ଚିଫ୍ ମାଜିଷ୍ଟ୍ରେଟ୍ ।
