ଭୁବନେଶ୍ୱର: ବିଜେପିର ଲୋକସଭା ପ୍ରଭାସ କାର୍ଯ୍ୟକ୍ରମ ଅଂଶବିଶେଷ ଭାବେ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହଙ୍କର ଦୁଇ ଦିନିଆ ଓଡ଼ିଶା ଗସ୍ତ କାର୍ଯ୍ୟକ୍ରମ ସ୍ଥିର ହୋଇଥିଲା । ଗୋଟିଏ ଦିନ ଢ଼େଙ୍କାନାଳ ଓ ଆଉ ଗୋଟେ ଦିନ ଭଦ୍ରକ ଜିଲ୍ଲା ବୁଲିଥାନ୍ତେ । ବିଭିନ୍ନ ସ୍ଥାନରେ ସଭାସମିତି ଓ ୱାନ୍ ଟୁ ୱାନ୍ ଆଲୋଚନା କରି କର୍ମୀମାନଙ୍କ ସହ ଯୋଡ଼ି ହୋଇଥାନ୍ତେ । ମାତ୍ର ତାଙ୍କ ଚୂଡ଼ାନ୍ତ ଗସ୍ତ କାର୍ଯ୍ୟକ୍ରମରୁ ଢ଼େଙ୍କାନାଳ ଜିଲ୍ଲା ବାଦ୍ ପଡ଼ିଛି ।
ଆଜି ରାଜ୍ୟ ବିଜେପି ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ଅମିତ୍ ଶାହଙ୍କ ଓଡ଼ିଶା ଗସ୍ତ କାର୍ଯ୍ୟକ୍ରମ ଓ ତାରିଖ ଘୋଷଣା କରିଛନ୍ତି ଦଳର ସାଧାରଣ ସମ୍ପାଦିକା ଲେଖାଶ୍ରୀ ସାମନ୍ତସିଂହାର । ଶ୍ରୀ ଶାହ ମାର୍ଚ୍ଚ ୨୬ ତାରିଖରେ ଭଦ୍ରକ ଜିଲ୍ଲାର ଧାମନଗର ନିର୍ବାଚନମଣ୍ଡଳୀରେ ସଭା କରିବେ । ସଂଧ୍ୟାରେ ଭୁବନେଶ୍ୱରରେ ଦଳୀୟ ନେତାଙ୍କ ସହ ଆଲୋଚନା କରି ଦିଲ୍ଲୀ ଫେରିଯିବେ ।
ଶ୍ରୀମତୀ ସାମନ୍ତସିଂହାରଙ୍କ ସୂଚନା ଅନୁଯାୟୀ, ମାର୍ଚ୍ଚ ୨୬ ରେ ଶ୍ରୀ ଶାହା ଓଡ଼ିଶା ଆସି ଭଦ୍ରକ ଜିଲ୍ଲା ଗସ୍ତ କରିବେ । ପ୍ରଥମେ ଆରଡିର ପ୍ରସିଦ୍ଧ ଆଖଣ୍ଡଳମଣି ପୀଠ ଦର୍ଶନ କରିବେ । ଏହାପରେ ଧାମନଗର ନିର୍ବାଚନମଣ୍ଡଳୀର ସାଆଁଳପୁରରେ ଏକ ସାଧାରଣ ସଭାରେ ଉଦବୋଧନ ଦେବେ । ଭଦ୍ରକ ଲୋକସଭା ନିର୍ବାଚନମଣ୍ଡଳୀ ଅନ୍ତର୍ଗତ ସମସ୍ତ ବିଧାନସଭା କ୍ଷେତ୍ରରୁ ୫୦ ହଜାରରୁ ଅଧିକ କର୍ମୀ ଏହି ସଭାରେ ଯୋଗଦେବେ ।
ସେଠି କାର୍ଯ୍ୟକ୍ରମ ସାରି ଶ୍ରୀ ଶାହ ଭୁବନେଶ୍ୱର ଫେରିବେ । ଭୁବନେଶ୍ୱରରେ ଦଳର ବରିଷ୍ଠ ନେତା ଓ କର୍ମକର୍ତ୍ତାଙ୍କ ସହିତ ଦଳୀୟ ସ୍ଥିତି ସମ୍ପର୍କରେ ସମୀକ୍ଷା କରିବେ । ଗତଥର ଓଡ଼ିଶା ଗସ୍ତ କାଳରେ ଦଳୀୟ ନେତାଙ୍କୁ ସେ ଦେଇ ଯାଇଥିବା କାମ କେଉଁ ପର୍ଯ୍ୟନ୍ତ ଯାଇଛି ତାହା ପଚାରି ବୁଝିବେ ।
ସୂଚନାଯୋଗ୍ୟ, ୨୦୨୨ ଅଗଷ୍ଟ ୮ରେ ଶାହ ଓଡ଼ିଶା ଗସ୍ତରେ ଆସିଥିଲେ । ୨୦୧୯ ସାଧାରଣ ନିର୍ବାଚନ ପରେ ଏବଂ କେନ୍ଦ୍ର ଗୃହମନ୍ତ୍ରୀ ଭାବେ ତାଙ୍କର ଏହା ଥିଲା ପ୍ରଥମ ଓଡ଼ିଶା ଗସ୍ତ । କଟକଠାରେ ପ୍ରଜାତନ୍ତ୍ର ବାର୍ଷିକ ଉତ୍ସବରେ ସେ ଯୋଗଦେବା ପରେ ଭୁବନେଶ୍ୱରରେ ଦଳୀୟ ନେତାଙ୍କ ସହ ସାଂଗଠନିକ ସ୍ଥିତିର ସମୀକ୍ଷା କରିଥିଲେ ।
ଏଥର ଶାହଙ୍କର ଏହି ଗସ୍ତ ରାଜନୈତିକ ଦୃଷ୍ଟିକୋଣରୁ ବେଶ ଗୁରୁତ୍ୱ ହେବ । ମନ୍ତ୍ରୀ ନବ ଦାସ ହତ୍ୟା ଘଟଣାକୁ ନେଇ ରାଜ୍ୟ ସରକାରଙ୍କ ବିରୋଧରେ ବିଜେପି କମ୍ପମାନ କରୁଛି । ହତ୍ୟା ଷଡ଼ଯନ୍ତ୍ରର ପର୍ଦ୍ଦାଫାସ ପାଇଁ ସିବିଆଇ ତଦନ୍ତ ଦାବି କରୁଛି । ବିରୋଧୀ ଦଳ ନେତା ଜୟନାରାୟଣ ମିଶ୍ର ଏବଂ ବିଜେଡି ମୁହାଁମୁହିଁ ଅବସ୍ଥାରେ ଅଛନ୍ତି । ଏହି ମାମଲାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ବିଜେଡି ଟାର୍ଗେଟ୍ କରିଛି । ସୁତରାଂ ଗୃହମନ୍ତ୍ରୀ ଶାହଙ୍କର ଆଭିମୁଖ୍ୟକୁ ସମସ୍ତଙ୍କର ପ୍ରତୀକ୍ଷା ରହିଛି ।
