ଭୁବନେଶ୍ୱର: ରାଜଭବନରେ କାର୍ଯ୍ୟ କରୁଥିବା ଏଏସଓ ବୈକୁଣ୍ଠ ପ୍ରଧାନଙ୍କର ଗୃହ ବିଭାଗକୁ ବଦଳି ହୋଇଯାଇଛି । ରାଜ୍ୟପାଳ ରଘୁବର ଦାସଙ୍କ ପୁଅ ଲଳିତ କୁମାର ଓ ତାଙ୍କର ୫ ଜଣ ଝାଡ଼ଖଣ୍ଡୀ ସହଯୋଗୀଙ୍କ ଦ୍ୱାରା ଆକ୍ରମଣର ଶିକାର ହୋଇ ସେ ଲହୁ ଲୁହାଣ ହୋଇଥିଲେ । ରାଜ୍ୟପାଳ ତାଙ୍କୁ ନ୍ୟାୟ ଦେବେ ବୋଲି ପ୍ରତିଶ୍ରୁତି ଦେଇ ୭ ଦିନ ସମୟ ମାଗିଥିଲେ । ମାତ୍ର ପୀଡ଼ିତଙ୍କ ପରିବାରକୁ ଭେଟି ରାଜ୍ୟପାଳ ଆଲୋଚନା କରିବାର ଦିନକ ପରେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ବଦଳରେ ଅଭିଯୋଗକାରୀ ଏଏସଓ ବୈକୁଣ୍ଠଙ୍କୁ ବଦଳି କରାଯାଇଛି । ମୋହନ ସରକାରଙ୍କର ଏହା କି ପ୍ରକାର ନ୍ୟାୟ ବୋଲି ଏବେ ସବୁ ମହଲରେ ପ୍ରଶ୍ନ ଉଠିଛି ।
ଅଭିଯୋଗ ଅନୁଯାୟୀ, ଗତ ୭ ତାରିଖରେ ପୁରୀ ରାଜଭବନରେ ରାଜ୍ୟପାଳଙ୍କ ପୁଅ ନିଜର ସହଯୋଗୀମାନଙ୍କ ସହ ସେଠାରେ କାର୍ଯ୍ୟରତ ଏଏସଓ ବୈକୁଣ୍ଠ ପ୍ରଧାନଙ୍କୁ ଅଶ୍ଲୀଳ ଭାଷାରେ ଗାଳି କରିଥିଲେ । ନିର୍ଧୂମ ପିଟିଥିଲେ । ଜୋତାରେ ଛେପ ପକାଇ ତାହାକୁ ଚାଟିବାକୁ ବାଧ୍ୟ କରିଥିଲେ । ଜୀବନରୁ ମାରିଦେବାକୁ ଧମକାଇଥିଲେ । ବୈକୁଣ୍ଠ ଲିଖିତ ଭାବେ ଏହି ଘଟଣାକୁ ରାଜ୍ୟପାଳଙ୍କ ପ୍ରମୁଖ ସଚିବ ଶାଶ୍ୱତ ମିଶ୍ରଙ୍କୁ ଆଗ ଜଣାଇଲେ । କିଛି ନ ହେବାରୁ ରାଜ୍ୟପାଳଙ୍କ ଦୃଷ୍ଟିକୁ ମଧ୍ୟ ଆଣିଲେ । ମାତ୍ର ନ୍ୟାୟ ନ ମିଳିବାରୁ ବୈକୁଣ୍ଠଙ୍କ ପତ୍ନୀ ପୁରୀ ସି-ବିଚ୍ ଥାନାରେ ଏତଲା ଦେଲେ । ପୁଲିସ ପ୍ରଥମେ ଏହାକୁ ଗ୍ରହଣ କଲାନାହିଁ । ପରବର୍ତ୍ତୀ ସମୟରେ ରାଜ୍ୟ ସଚିବାଳୟ ସେବା ସଂଘର ଚାପ ଯୋଗୁଁ ପୁଲିସ ମାମଲାକୁ ପଞ୍ଜୀକରଣ କଲା ।
୧୩ ତାରିଖରେ ରାଜ୍ୟପାଳ ଶ୍ରୀ ଦାସ ପୀଡ଼ିତ ଓ ତାଙ୍କ ପରିବାରକୁ ଡ଼ାକି ରାଜଭବନରେ ଆଲୋଚନା କରିଥିଲେ । ଆଲୋଚନା ସମୟରେ ଡିସିପି ପ୍ରତୀକ ସିଂହ ମଧ୍ୟ ଉପସ୍ଥିତ ଥିଲେ । ଅନ୍ୟତମ ଅଭିଯୁକ୍ତ ତଥା ରାଜ୍ୟପାଳଙ୍କ ରୋଷେୟା ସେଠାକୁ ଆସି ପୀଡ଼ିତଙ୍କୁ କ୍ଷମା ମାଗିଥିଲେ । ଝାଡ଼ଖଣ୍ଡରେ ଥିବା ରାଜ୍ୟପାଳଙ୍କ ପୁଅଙ୍କୁ ଏଠାକୁ ଡ଼ାକି ମାମଲାର ସମାଧାନ କରାଯିବ ବୋଲି କୁହାଗଲା । ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ନିଜେ ରାଜ୍ୟପାଳ ପ୍ରତିଶ୍ରୁତି ଦେଇ ୭ ଦିନ ସମୟ ନେଇଥିଲେ ।
ମାତ୍ର ଦୁଇଦିନ ପରେ ଆଜିର ସ୍ଥିତି ହେଉଛି, ଏଏସଓ ଶ୍ରୀ ପ୍ରଧାନ ଆଉ ରାଜଭବନରେ ନାହାନ୍ତି । ଗତକାଲି ତାଙ୍କୁ ରାଜଭବନରୁ ଗୃହ ବିଭାଗକୁ ବଦଳି କରାଯାଇଛି । ଯାହାକୁ ନେଇ ରାଜ୍ୟବାସୀଙ୍କ ମନରେ ପ୍ରବଳ ପ୍ରତିକ୍ରିୟା ସୃଷ୍ଟି ହୋଇଛି । ହେଲେ ଏ ପର୍ଯ୍ୟନ୍ତ ରାଜଭବନ ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଇନାହିଁ କି ପୁଲିସ ମାମଲାରେ କୌଣସି ପଦକ୍ଷେପ ନେଇନାହିଁ ।
ଏହି ଘଟଣାରେ କେବଳ ରାଜ୍ୟପାଳ ସମାଲୋଚନାର ଶିକାର ହୋଇନାହାନ୍ତି ବରଂ ତାଙ୍କଠାରୁ ଅଧିକ ରାଜ୍ୟ ସରକାରଙ୍କୁ ନିନ୍ଦିତ ହେବାକୁ ପଡ଼ିଛି । ରାଜ୍ୟପାଳଙ୍କ ପୁଅ ବୋଲି ଆଇନ ବାଟ ଭାଙ୍ଗି ଚାଲିଯିବା ଘଟଣାକୁ ବୁଦ୍ଧୀଜୀବୀମାନେ ନାପସନ୍ଦ କରିଛନ୍ତି । ମୋହନ ସରକାରଙ୍କ ଘୋଷିତ ଓଡ଼ିଆ ଅସ୍ମିତା ଉପରେ ଏହା କୁଠାରାଘାତ କହି ସମାଲୋଚନା ହେଉଛି ।
ରାଜ୍ୟପାଳଙ୍କ ପୁଅ ଜଣେ କାର୍ଯ୍ୟରତ ଓଡ଼ିଆ ଅଧିକାରୀଙ୍କୁ ବିନା କାରଣରେ ମାଡ଼ମାରି ଲହୁ ଲୁହାଣ କରିଥିଲେ ମଧ୍ୟ ରାଜ୍ୟର ପ୍ରମୁଖ ଗଣମାଧ୍ୟମରେ ଏହି ଖବର ଗୌଣ ହୋଇଯିବା ସମସ୍ତଙ୍କୁ ଆହୁରି ଆଘାତ ଦେଇଛି । ଏହା କି ପ୍ରକାର ସାମ୍ବାଦିକତା ବୋଲି ସୋସିଆଲ୍ ମିଡିଆରେ ଅନେକ ପ୍ରଶ୍ନ କରିଛନ୍ତି । ସେହିଭଳି ଟିଭି ପରଦାରେ ମୁହଁ ଦେଖାଉଥିବା ତଥାକଥିତ ବଡ଼ ବୁଦ୍ଧୀଜୀବୀ, ସାମାଜିକ କର୍ମୀମାନେ ଏ ସମ୍ପର୍କରେ ପାଟି ନ ଖୋଲିବା ଚିନ୍ତାର ବିଷୟ ହୋଇଛି ।
ଅଭିଯୁକ୍ତ ରାଜ୍ୟପାଳଙ୍କ ପୁଅ ଲଳିତ କୁମାରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବିରେ ଯୁବ ଓ ଛାତ୍ର କଂଗ୍ରେସ ପକ୍ଷରୁ ଆନ୍ଦୋଳନ ଜାରି ରହିଥିଲା ବେଳେ ମୁଖ୍ୟ ବିରୋଧୀ ଦଳ ବିଜେଡିର ବିଳମ୍ବରେ ନିଦ ଭାଙ୍ଗିଛି । ଆଜିଠାରୁ ସୋସିଆଲ୍ ମିଡିଆରେ କର୍ମୀମାନେ ଟିକେ ସକ୍ରିୟ ହୋଇଛନ୍ତି । ବିଜେଡି ନେତ୍ରୀ ଲେଖାଶ୍ରୀ ସାମନ୍ତସିଂହାର ଆଜି ଏକ ସାମ୍ବାଦିକ ସମ୍ମିଳନୀରେ ରାଜ୍ୟପାଳଙ୍କ ପୁଅ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ନଚେତ୍ ବିଜେଡି ଆନ୍ଦୋଳନକୁ ଓହ୍ଲାଇବ ବୋଲି ଚେତାବନୀ ଦେଇଛନ୍ତି ।
