୨୩ ରାଜ୍ୟ ପାଇଁ ବିଜେପିର ନିର୍ବାଚନ ପ୍ରଭାରୀ
ଭୁୁବନେଶ୍ୱର: ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ଓଡ଼ିଶାରୁ ଆଉ ନିର୍ବାଚନ ଲଢ଼ିବେନି କି? ବିଜେଡି ଟିକେଟରେ କେନ୍ଦ୍ରାପଡ଼ାରୁ ଲଗାତର ଦୁଇଥର ଲୋକସଭାକୁ ନିର୍ବାଚିତ ହୋଇଥିବା ବୈଜୟନ୍ତ ଗତଥର ବିଜେପି ଟିକେଟରେ ଲଢ଼ି ବିଜେଡିର ଅନୁଭବ ମହାନ୍ତିଙ୍କଠାରୁ ଦେଢ଼ଲକ୍ଷ ଭୋଟରେ ହାରିଥିଲେ । ଏହାପରଠାରୁ ସେ କେନ୍ଦ୍ରାପଡ଼ା ଏବଂ ସର୍ବୋପରି ଓଡ଼ିଶାରୁ ମୁହାଁ ଫେରାଇ ନେଇଥିଲେ । ତେବେ ଗତଥର ପରାଜୟର ପ୍ରତିଶୋଧ ନେବାକୁ ସେ କାଳେ ସୁଯୋଗ ଅପେକ୍ଷାରେ ଥିଲେ । ମାତ୍ର ତାଙ୍କୁ ଆଉ ସେହି ସୁଯୋଗ ମିଳି ନ ପାରେ । ଉତ୍ତରପ୍ରଦେଶର ନିର୍ବାଚନ ପ୍ରଭାରୀ ଭାବେ ଆଜି ତାଙ୍କୁ ନିଯୁକ୍ତି ମିଳିଛି । ଜାତୀୟ ରାଜନୀତିରେ ସବୁଠାରୁ ଅଧିକ ଗୁରୁତ୍ୱ ରଖୁଥିବା ୟୁପି ଭଳି ରାଜ୍ୟର ପ୍ରଭାରୀ ଭାବେ ଦାୟିତ୍ୱ ପାଇଲା ପରେ ଓଡ଼ିଶାରୁ ସେ ନିର୍ବାଚନ ଲଢ଼ିବାର ଆଶା ତୁଟିଯାଇଛି । ପରବର୍ତ୍ତୀ ସମୟରେ ସେ ୟୁପି କି ଆସାମରୁ ରାଜ୍ୟସଭାକୁ ଯିବେ ବୋଲି ସମର୍ଥକମହଲରୁ ଶୁଣିବାକୁ ମିଳିଛି । ବୈଜୟନ୍ତ ୟୁପି ଦାୟିତ୍ୱ ପାଇଲା ପରେ ସବୁଠାରୁ ବେଶୀ ଖୁସି ହୋଇଛନ୍ତି ସାଂସଦ ଅପରାଜିତା ଷଡ଼ଙ୍ଗୀ । ବୈଜୟନ୍ତଙ୍କୁ ସେ ଶୁଭେଚ୍ଛା ଜଣାଇ ଲେଖିଛନ୍ତି Right Persons in the Right Place.
ଆଗାମୀ ସାଧାରଣ ନିର୍ବାଚନ ପରିପ୍ରେକ୍ଷୀରେ ୧୬ଟି ରାଜ୍ୟ ଏବଂ ୭ କେନ୍ଦ୍ରଶାସିତ ଅଞ୍ଚଳ ପାଇଁ ଦଳୀୟ ପ୍ରଭାରୀ ନିଯୁକ୍ତି କରିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି.ନଡ୍ଡା । ବିଜୟପାଲ ସିଂ ତୋମାରଙ୍କୁ ଓଡ଼ିଶା ନିର୍ବାଚନ ପ୍ରଭାରୀ ଭାବେ ନିଯୁକ୍ତି ମିଳିଛି । ରାଜ୍ୟସଭା ସାଂସଦ ତଥା ବିଜେପି କିଷାନ ମୋର୍ଚ୍ଚାର ପୂର୍ବତନ ରାଷ୍ଟ୍ରୀୟ ଅଧ୍ୟକ୍ଷ ଶ୍ରୀ ତୋମାର ବର୍ତ୍ତମାନ ଓଡ଼ିଶା ବିଜେପିର ସହ ପ୍ରଭାରୀ ଦାୟିତ୍ୱରେ ଅଛନ୍ତି । ତୋମାରଙ୍କ ସହ ଛତିଶଗଡ଼ର ପୂର୍ବତନ ମନ୍ତ୍ରୀ ସୁଶ୍ରୀ ଲତା ଉସେଣ୍ଡିଙ୍କୁ ନିର୍ବାଚନ ସହ ପ୍ରଭାରୀ ଭାବେ ନିଯୁକ୍ତି ମିଳିଛି । ସରଳ ଅର୍ଥରେ ବୁଝିଲେ, ବିଜୟପାଲ ସିଂ ତୋମାର ଏବଂ ଲତା ଉସେଣ୍ଡି ଆଗାମୀ ନିର୍ବାଚନରେ ଓଡ଼ିଶା ବିଜେପିକୁ ମାର୍ଗଦର୍ଶନ କରିବେ ।
ଅନ୍ୟପକ୍ଷରେ ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କୁ ଉତ୍ତର ପ୍ରଦେଶର ନିର୍ବାଚନ ପ୍ରଭାରୀ ଭାବେ ନିଯୁକ୍ତି ମିଳିଛି । ବର୍ତ୍ତମାନ ସେ ଆସାମ ଓ ଦିଲ୍ଲୀର ପ୍ରଭାରୀ ଦାୟିତ୍ୱରେ ଅଛନ୍ତି । ଏଠାରେ ଉଲ୍ଲେଖ କରାଯାଇପାରେ କି ଗତ ବିଧାନସଭା ନିର୍ବାଚନ ବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ୟୁପି ନିର୍ବାଚନ ପ୍ରଭାରୀ ଭାବେ ନିଯୁକ୍ତି ପାଇଥିଲେ । ସେହି ଦାୟିତ୍ୱକୁ ସେ ଅତି ସଫଳତାର ସହ ତୁଲାଇଥିଲେ । ଏବେ ଲୋକସଭା ନିର୍ବାଚନ ପାଇଁ ବୈଜୟନ୍ତଙ୍କୁ ଏହି ଗୁରୁତ୍ୱପୂର୍ଣ୍ଣ ରାଜ୍ୟର ଦାୟିତ୍ୱ ମିଳିଛି ।
ବିଜେପି ରାଷ୍ଟ୍ରୀୟ ସାଧାାରଣ ସମ୍ପାଦକ ବିନୋଦ ତାୱଡ଼େଙ୍କୁ ବିହାରର ପ୍ରଭାରୀ କରାଯାଇଥିବା ବେଳେ ରାଜ୍ୟସଭା ସଦସ୍ୟ ତଥା ପୂର୍ବତନ ଝାଡ଼ଖଣ୍ଡ ରାଜ୍ୟ ମୁଖ୍ୟ ଦୀପକ ପ୍ରକାଶଙ୍କୁ ସହ ପ୍ରଭାରୀ ନିଯୁକ୍ତି ଦିଆଯାଇଛି ।
ରାଷ୍ଟ୍ରୀୟ ଉପାଧ୍ୟକ୍ଷ ତଥା ରାଜ୍ୟସଭା ସାଂସଦ ଲକ୍ଷ୍ମୀକାନ୍ତ ବାଜପେୟୀଙ୍କୁ ଝାଡ଼ଖଣ୍ଡ ଦାୟିତ୍ୱ ମିଳିଛି । ତ୍ରିପୁରାର ପୂର୍ବତନ ମୁଖ୍ୟମନ୍ତ୍ରୀ ତଥା ରାଜ୍ୟସଭା ସାଂସଦ ବିପ୍ଲବ କୁମାର ଦେବଙ୍କୁ ହରିୟାନାର ପ୍ରଭାରୀ ଏବଂ ସୁରେନ୍ଦ୍ର ନାଗରଙ୍କୁ ସହ ପ୍ରଭାରୀ ନିଯୁକ୍ତି ଦିଆଯାଇଛି ।
ବିହାରର ପୂର୍ବତନ ମୁଖ୍ୟମନ୍ତ୍ରୀ ମଙ୍ଗଲ ପାଣ୍ଡେଙ୍କୁ ପଶ୍ଚିମବଙ୍ଗର ପ୍ରଭାରୀ ଏବଂ ଅମିତ୍ ମାଲବ୍ୟ ଓ ଆଶା ଲାକ୍ରା ସହ ପ୍ରଭାରୀ ଭାବେ ନିଯୁକ୍ତି ପାଇଛନ୍ତି ।
ୟୁପି ବିଧାନ ପରିଷଦ ସଭ୍ୟ ତଥା ପୂର୍ବତନ ମନ୍ତ୍ରୀ ମହେନ୍ଦ୍ର ସିଂହଙ୍କୁ ମଧ୍ୟପ୍ରଦେଶ ପ୍ରଭାରୀ ଏବଂ ସତୀଶ ଉପାଧ୍ୟାୟଙ୍କୁ ସହ ପ୍ରଭାରୀ ଭାବେ ନିଯୁକ୍ତି ଦିଆଯାଇଛି ।
ଗୁଜୁରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କୁ ପଞ୍ଜାବ ପ୍ରଭାରୀ ଏବଂ ଦଳର ଜାତୀୟ ସମ୍ପାଦକ ନରିନ୍ଦର ସିଂହଙ୍କୁ ସହପ୍ରଭାରୀ ନିଯୁକ୍ତି ମିଳିଛି ।
ୟୁପିର ପୂର୍ବତନ ମନ୍ତ୍ରୀ ଶ୍ରୀକାନ୍ତ ଶର୍ମାଙ୍କୁ ହିମାଚଳ ପ୍ରଦେଶ ପ୍ରଭାରୀ ଏବଂ ସଞ୍ଜୟ ଟଣ୍ଡନଙ୍କୁ ସହ ପ୍ରଭାରୀ କରାଯାଇଛି ।
