ଭୁବନେଶ୍ୱର: ବିଜେଡିର ୬ ଥରିଆ ସାଂସଦ ଭର୍ତ୍ତୃହରି ମହତାବ ଆଜି ସେହି ଦଳ ଛାଡ଼ିଛନ୍ତି । ବିଜେଡିର ପ୍ରାଥମିକ ସଦସ୍ୟ ପଦରୁ ସେ ଇସ୍ତଫା ଦେଇଛନ୍ତି । କଟକଠାରେ ଏକ ସାମ୍ବାଦିକ ସମ୍ମିଳନୀ ଡାକି ସେ ତାଙ୍କର ଇସ୍ତଫା ଘୋଷଣା କରିଛନ୍ତି । ଯେଉଁ ବିଜୁ ଜନତା ଦଳ ଗଠନର ଆରମ୍ଭରୁ ମୁଁ ସଂପୃକ୍ତ, ଯାହାର ସମୃଦ୍ଧିରେ ମୋର ମଧ୍ୟ କିଛି ଅବଦାନ ରହିଛି, ଆଜି ସେ ଦଳରୁ ମୁଁ ଭଗ୍ନହୃଦୟରେ ସମ୍ପର୍କ ଛିନ୍ନ କରିବାକୁ ବାଧ୍ୟ ହେଉଛି ବୋଲି ତାଙ୍କ ଇସ୍ତଫାପତ୍ରରେ ଲେଖିଛନ୍ତି ।
ଭର୍ତ୍ତୃହରି ଏବେ କଟକର ସାଂସଦ ଅଛନ୍ତି । ବିଜେଡିରେ ତାଙ୍କ ନାଁ ଗଡୁଥିଲେ ମଧ୍ୟ ଦୀର୍ଘଦିନ ତଳୁ ସେ ବିଜେପିମୁହାଁ ହୋଇସାରିଥିବା ଚର୍ଚ୍ଚା ହେଉଥିଲା । ସେଥିପାଇଁ ବୋଧହୁଏ, ବିଜେଡିର କୌଣସି କାର୍ଯ୍ୟକ୍ରମରେ ପ୍ରାୟତଃ ତାଙ୍କୁ ଦେଖିବାକୁ ମିଳୁ ନ ଥିଲା । ବେଳେ ବେଳେ ଦଳୀୟ ପରିଚାଳନା ଓ ସରକାରଙ୍କ କାର୍ଯ୍ୟକ୍ରମକୁ କଟାକ୍ଷ କରି ସେ ନିଜ ଖବରକାଗଜରେ ସମ୍ପାଦକୀୟ ଲେଖୁଥିଲେ । ବିଭିନ୍ନ ସମୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କଠାରୁ ଆରମ୍ଭ କରି ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ଖୋଲାଖୋଲି ପ୍ରଶଂସା କରିବା ପଛରେ ତାଙ୍କର ବିଜେପି ସମ୍ପର୍କର ଇଙ୍ଗିତ କରୁଥିଲା ।
ଜଣେ ଭଲ ପାର୍ଲାମେଣ୍ଟାରିଆନ୍ ଭାବେ ଭର୍ତ୍ତୃହରିଙ୍କର ଦିଲ୍ଲୀରେ ସୁନାମ ଥିଲେ ମଧ୍ୟ ସାଧାରଣ ଜନତାଙ୍କର ସେ ନେତା ନ ଥିଲେ । ନିର୍ବାଚନ ସମୟକୁ ଛାଡ଼ିଦେଲେ ନିଜ ନିର୍ବାଚନ ମଣ୍ଡଳୀରେ ତାଙ୍କୁ କ୍ୱଚିତ ଦେଖିବାକୁ ମିଳେ । ଗତଥର ତାଙ୍କ ପ୍ରାର୍ଥୀତ୍ୱ ବିଚାରକୁ ସମସ୍ତେ ବିରୋଧ କରିଥିଲେ । ମାତ୍ର ଭର୍ତ୍ତୃହରି ବାବୁ ମୁଖ୍ୟମନ୍ତ୍ରୀଙ୍କ ଉପରେ ଚାପ ପକାଇ ଟିକେଟ ନେବାରେ ସମର୍ଥ ହୋଇଥିଲେ । ନିଜର ଲୋକସମ୍ପର୍କ ନୁହେଁ, ବିଜେଡି ହାୱାରେ ସେ ପୁନର୍ବାର ଜିତିଥିଲେ । ତେବେ ଏଥର ଟିକେଟ ପାଉନାହାନ୍ତି ବୋଲି ସେ ନିଶ୍ଚିତ ଥିଲେ ।
ଯେ କୌଣସି ମୁହୁର୍ତ୍ତରେ ସେ ବିଜେଡି ଛାଡ଼ି ବିଜେପିରେ ଯୋଗଦେଇପାରନ୍ତି ବୋଲି କଳ୍ପନାଜଳ୍ପନା ଲାଗି ରହିଥିବା ବେଳେ ଗତକାଲିର ଘଟଣା ତାଙ୍କୁ ବିଶେଷ କ୍ଷୁବ୍ଧ କରିଥିଲା । ୧୩ ବର୍ଷ ତଳର ଏକ ମାମଲାରେ ତାଙ୍କୁ ଚାର୍ଜଫ୍ରେମ କରାଯିବା ଘଟଣା ତାଙ୍କୁ ଅସହ୍ୟ ହୋଇଥିଲା । ୨୦୧୧ ମସିହା ଜାନୁଆରୀ ୨୩ରେ କଟକରେ ମୁଖ୍ୟମନ୍ତ୍ରୀଙ୍କ ସହିତ ଏକ କାର୍ଯ୍ୟକ୍ରମରେ ଯୋଗଦେଲା ବେଳେ ସେଠାରେ ସୁରକ୍ଷା ଦାୟିତ୍ୱରେ ଥିବା ଏସଆଇ ଅମିତାଭ ମହାପାତ୍ରଙ୍କ ଗାଲରେ ସେ ଚାପଡ଼ା ମାରିଥିଲେ । ଉକ୍ତ ମାମଲାରେ ତାଙ୍କ ବିରୋଧରେ ଗତକାଲି କଟକ ସ୍ୱତନ୍ତ୍ର ଏମପି/ଏମଲଏଏ କୋର୍ଟରେ ଚାର୍ଜଫ୍ରେମ୍ ହୋଇଛି । ଆଇପିସି ଦଫା ୩୪୧, ୩୨୩, ୨୯୪, ୩୫୩, ୫୦୬ ରେ ପୁଲିସ ଚାର୍ଜଫ୍ରେମ କରିଛି ।
ଭର୍ତ୍ତୃହରି ବିଜେପିରେ ଯୋଗଦେବା ନିଶ୍ଚିତ ଜଣାପଡୁଥିଲେ ମଧ୍ୟ ଆଜି ଏ ସମ୍ପର୍କିତ ସାମ୍ବାଦିକଙ୍କ ପ୍ରଶ୍ନର ସିଧା ଉତ୍ତର ଦେଇନାହାନ୍ତି । କେଉଁ ଦଳରେ ଯୋଗଦେବି ତାହା ସମୟ କହିବ ବୋଲି କହିଛନ୍ତି ।
