ଭୁୁବନେଶ୍ୱର: ୫-ଟି ସଚିବ ଭି.କେ.ପାଣ୍ଡିଆନଙ୍କୁ କାଳିମାଡ଼ କରିଥିବା ଦୁର୍ବୃତ୍ତ ଭାସ୍କର ସାହୁଙ୍କୁ ପୁଲିସ ଛାଡ଼ିଦେଇଛି । ତାଙ୍କ ବଡ଼ଭାଇଙ୍କ ବ୍ୟକ୍ତିଗତ ମୁଚାଳିକାରେ ସେ ଘରକୁ ଫେରି ଆସିଛନ୍ତି । ଖୋଦ୍ ୫-ଟି ସଚିବଙ୍କ ନିର୍ଦ୍ଦେଶରେ ଗିରଫ ଭାସ୍କରଙ୍କୁ ପୁଲିସ ବିଳମ୍ବିତ ରାତିରେ ଛାଡ଼ି ଦେଇଥିବା ଜଣାପଡ଼ିଛି । ଏଭଳି ଉଦାରତା ପାଇଁ ଭାସ୍କରଙ୍କ ପରିବାର ଲୋକେ ୫-ଟି ସଚିବଙ୍କୁ କୃତଜ୍ଞତା ଜଣାଇଛନ୍ତି । ଏଭଳି କାର୍ଯ୍ୟର ପୁନରାବୃତ୍ତି ନ କରିବା ପାଇଁ ଭାସ୍କର ଥାନାରେ ଲେଖିକି ଆସିଛନ୍ତି ।
ପୁରୀ ଜିଲ୍ଲା ଗସ୍ତରେ ଥିବା ୫-ଟି ସଚିବ ଶ୍ରୀ ପାଣ୍ଡିଆନଙ୍କୁ ଗତକାଲି ସତ୍ୟବାଦୀରେ ଏହି ଯୁବକ କାଳିମାଡ଼ କରିଥିଲେ । ସ୍ଥାନୀୟ ୟୁଜିଏସ୍ କଲେଜ ପଡ଼ିଆରେ ଆୟୋଜିତ ଜନଶୁଣାଣି କାର୍ଯ୍ୟକ୍ରମରେ ଯୋଗ ଦେବାକୁ ଯାଉଥିବା ବେଳେ ପକେଟରୁ ଏକ କାଳି ବୋତଲ ବାହାର କରି ଶ୍ରୀ ପାଣ୍ଡିଆନଙ୍କ ଉପରକୁ ଫିଙ୍ଗିଥିଲେ । କାଳିମାଡ଼ରୁ ପୁରୀ ଜିଲ୍ଲାପାଳ ସମର୍ଥ ବର୍ମା ବି ରକ୍ଷା ପାଇ ନ ଥିଲେ ।
ଘଟଣାସ୍ଥଳରୁ ହିଁ ଦୁର୍ବୃତ୍ତ ଭାସ୍କର ସାହୁଙ୍କୁ ପୁଲିସ କାବୁ କରି ଥାନାକୁ ନେଇ ଯାଇଥିଲା । ପୁଲିସ ଆଇଜି ଏବଂ ଏସପି ତାଙ୍କୁ ଜେରା କରିଥିଲେ । ଅନ୍ୟପକ୍ଷରେ ଭାସ୍କରଙ୍କ ପତ୍ନୀ ବିଭିନ୍ନ ଗଣମାଧ୍ୟମରେ ପ୍ରତିକ୍ରିୟା ଦେଇ ତାଙ୍କ ସ୍ୱାମୀଙ୍କ କାର୍ଯ୍ୟକୁ ସମର୍ଥନ କରିଥିଲେ ମଧ୍ୟ ତାଙ୍କୁ କ୍ଷମା କରିଦେବା ପାଇଁ ୫-ଟି ସଚିବଙ୍କୁ ଅନୁରୋଧ କରିଥିଲେ ।
ସେପଟେ କାଳିମାଡ଼ ଘଟଣାକୁ ନେଇ ବିଜେଡି ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଥିଲା । ୫-ଟି ସଚିବଙ୍କୁ କାଳିମାଡ଼ ପଛରେ ବିରୋଧୀ ରାଜନୈତିକ ଶକ୍ତିର ସଂପୃକ୍ତିକୁ ଇସାରା କରି ପ୍ରତିଶୋଧ ଓ ଘୃଣା ରାଜନୀତିର ଉଚିତ ଜବାବ ଦିଆଯିବ ବୋଲି କୁହାଯାଇଥିଲା । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଲୋକଙ୍କ ପାଖକୁ ଯାଉଥିବା ୫-ଟି ସଚିବଙ୍କ ମୁହଁରୁ ମିଶନ ଶକ୍ତି ମା’ ମାନେ ସେମାନଙ୍କ ପଣତ କାନିରେ କାଳି ପୋଛିବାର ଦୃଶ୍ୟକୁ ବିରୋଧୀଙ୍କ ଉଦ୍ଦେଶ୍ୟରେ ଦଳୀୟ ନେତାମାନେ ଅସ୍ତ୍ର କରିଥିଲେ ।
ଓଏଏସ୍ ସଂଘ ପକ୍ଷରୁ ଏକ ପ୍ରେସ୍ ମିଟ୍ କରାଯାଇ ୫-ଟି ସଚିବଙ୍କ ଉପରେ କାଳି ମାଡ଼ ଘଟଣାକୁ ତୀବ୍ର ନିନ୍ଦା କରାଯିବା ସହ ଦୃଢ଼ କାର୍ଯ୍ୟାନୁଷ୍ଠାନ ଦାବି କରାଯାଇଥିଲା । ସଂଘର ସଭାପତି ଜ୍ୟୋତିରଞ୍ଜନ ମିଶ୍ର ଏହି ଘଟଣାକୁ ଅତ୍ୟନ୍ତ ଦୁଃଖଦ ଓ ଅଶୋଭନୀୟ ଘଟଣା ବୋଲି ବର୍ଣ୍ଣନା କରିଥିଲେ ।
ସାମଗ୍ରିକ ଭାବେ ଏହି ଘଟଣା ସାରା ରାଜ୍ୟରେ ହଟଚମଟ ସୃଷ୍ଟି କରିଥିଲା ବେଳେ ଦୁର୍ବୃତ୍ତ ଭାସ୍କରଙ୍କ ବିରୋଧରେ ପୁଲିସ କାର୍ଯ୍ୟାନୁଷ୍ଠାନକୁ ସମସ୍ତଙ୍କର ଅପେକ୍ଷା ଥିଲା । ମାତ୍ର ନିଜେ ଶ୍ରୀ ପାଣ୍ଡିଆନ୍ ଉଦାର ମନୋଭାବରେ ତାଙ୍କୁ କ୍ଷମା କରିଦେବା ଏବଂ ଥାନାରୁ ଛାଡ଼ି ଦେବା ପାଇଁ ପୁଲିସକୁ ନିର୍ଦ୍ଦେଶ ଦେବା ଘଟଣା ଚର୍ଚ୍ଚାର ବିଷୟ ହୋଇଛି ।