ଭୁବନେଶ୍ୱର: ବୋହୁକୁ ଯୌତୁକ ନିର୍ଯ୍ୟାତନା ଅଭିଯୋଗ ମାମଲା ପଦାକୁ ଆସିଯିବା ପରେ କଟକ ସାଂସଦ ଭର୍ତ୍ତୃହରି ମହତାବଙ୍କ ଅସଲ ଚେହେରା ଧରାପଡ଼ିଯାଇଛି । ତେବେ ଏହି ଘରୋଇ ଅପରାଧ ମାମଲାରୁ ବର୍ତ୍ତିବା ପାଇଁ ସାଂସଦ ମହାଶୟ ଦଳ ମୁଖିଆଙ୍କ କାନ୍ଧରେ ଓହଳିବାକୁ ଉଦ୍ୟମ କରିବା ସମସ୍ତଙ୍କୁ ଚକିତ କରିଛି । ମୁଖିଆଙ୍କୁ ଅଳି କରି ବାରମ୍ବାର ସାଂସଦ ଟିକେଟ ନେବାରେ ଅଭ୍ୟସ୍ତ ଭର୍ତ୍ତୃହରି ନିଜ ଘରୋଇ ମାମଲାରେ ବି ସମାନ ନୀତି ଧରିଥିବା ଆଜି ତାଙ୍କ ପ୍ରତିକ୍ରିୟାରୁ ସ୍ପଷ୍ଟ ଜଣାପଡୁଛି ।
ସାଂସଦଙ୍କ ବିରୋଧରେ ଯୌତୁକ ନିର୍ଯ୍ୟାତନା ମାମଲା ଆଜି ଦିନତମାମ ଜାତୀୟ ଓ ଓଡ଼ିଶା ଗଣମାଧ୍ୟମରେ ଚର୍ଚ୍ଚା ହେଲା ବେଳେ ସାଂସଦଙ୍କ ପାଟିରୁ କଥା ବାହାରି ନ ଥିଲା । ତେବେ ସଂଧ୍ୟାବେଳେ ହଠାତ୍ ସାମ୍ବାଦିକମାନଙ୍କୁ ଡାକି ଭର୍ତ୍ତୃହରି ଅଦ୍ଭୂତ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ‘ତାଙ୍କ ଘରର ମାମଲା ନବୀନ ଆଗରୁ ଜାଣିଛନ୍ତି । ପରିବାରର ବଡ଼ଭାଇ ଭାବେ ସେ ଏସବୁ କଥା ଜାଣିଥିଲେ ।’ ତେବେ ନବୀନ କେମିତି ଜାଣିଲେ ବୋଲି ସାମ୍ବାଦିକମାନେ ପଚାରିବାରୁ ସାଂସଦଙ୍କ ଉତ୍ତର ଥିଲା.. ‘ନିର୍ବଦ୍ଧ ବେଳେ ନବୀନ ଥିଲେ । ରିସେପସନ୍ ରେ ବି ସେ ଥିଲେ ।’ ଭର୍ତ୍ତୃହରିଙ୍କ ଯୁକ୍ତିରେ ଯିଏ ବାହାଘରରେ ବରଯାତ୍ରୀ ଯିବେ ବା ରିସେପସନ୍ ରେ ଭୋଜି ଖାଇବେ ସିଏ ବିବାହ ପରର ଦାମ୍ପତ୍ୟ ଜୀବନ ଓ ପରିବାର ବିବାଦ ନିଶ୍ଚିତ ଜାଣିବେ । ଧନ, କ୍ଷମତା କି ଅନ୍ୟ କୌଣସି କାରଣରୁ ମଣିଷ ବାଉଳା ହେଲେ ମୁଣ୍ଡକୁ କିଭଳି ବୁଦ୍ଧି ଜୁଟେ ତାହା ଭର୍ତ୍ତୃହରିଙ୍କ ବକ୍ତବ୍ୟରୁ ବୁଝାପଡ଼ିଯାଉଛି ।
ଭର୍ତ୍ତୃହରିଙ୍କ ପରିଚୟ କେବଳ ସାଂସଦ ନୁହେଁ । ସେ ଜଣେ ଖବରକାଗଜର ସମ୍ପାଦକ ମଧ୍ୟ । ନିଜ ଖବରକାଗଜର ସମ୍ପାଦକୀୟ ସ୍ତମ୍ଭରେ ମଝିରେ ମଝିରେ ବହୁ ନୀତିବାଣୀ ଶୁଣାନ୍ତି । ସମ୍ବିଧାନ ଓ ଗଣତନ୍ତ୍ରର ସୁରକ୍ଷା, ନାରୀ ସ୍ୱାଧୀନତାର ନାରା ଦିଅନ୍ତି । ୬ ଥରିଆ ଏହି ସାଂସଦ, ତାଙ୍କ ପତ୍ନୀ ଏବଂ ପୁଅଙ୍କ ବିରୋଧରେ ନିଜ ବୋହୁ ଆଣିଛନ୍ତି ଯୌତୁକ ଓ ଶାରୀରିକ ନିର୍ଯ୍ୟାତନା । ଭୋପାଳ ମହିଳା ଥାନାରେ ବୋହୁ ଏତଲା ଦେଇଛନ୍ତି । ପୁଲିସ ଆଇପିସିର ଧାରା ୪୯୮-ଏ, ୪୦୬, ୫୦୬, ୩୪ ଏବଂ ଯୌତୁକ ନିରୋଧ ଆଇନ ୩ ଓ ୪ରେ ମାମଲା ରୁଜୁ କରିଛି ।
ସାଂସଦଙ୍କୁ ଏହା ଲଜ୍ଜିତ କରିବା କଥା । ନୈତିକତା ଦୃଷ୍ଟିରୁ ନିଜ ପଦରୁ ଇସ୍ତଫା ଦେଇଦେବା କଥା । ମାତ୍ର ତାହା ନ କରି ଦଳର ମୁଖିଆଙ୍କ ନାଁ କହି ଲୋକଙ୍କୁ ବିଭ୍ରାନ୍ତ କରୁଛନ୍ତି । ସୂଚନାଥାଉକି, ପୁଅ ଓ ବୋହୁ ୪/୫ ଦିନ ଏକାଠି ବି ରହିପାରିଲେନି ବୋଲି ଭର୍ତ୍ତୃହରି ନିଜେ ସ୍ୱୀକାର କରିଛନ୍ତି ।
ତେବେ ସେ ଯାହା ହେଉ, ସଙ୍ଗୀନ ମାମଲାରେ ଛନ୍ଦି ହୋଇଥିବା ଦଳୀୟ ସାଂସଦ ଭର୍ତ୍ତୃହରି ମହତାବଙ୍କ ବିରୋଧରେ ସଭାପତି ଏ ପର୍ଯ୍ୟନ୍ତ ଚୁପ୍ ରହିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ନବୀନ ତାଙ୍କ ଆଭିମୁଖ୍ୟ ବଦଳେଇ ଦେଲେଣି କି ବୋଲି ପ୍ରଶ୍ନ ଉଠିଛି । ଏକଦା ମୁଖ୍ୟମନ୍ତ୍ରୀଙ୍କ ଅତି ନିକଟତର କୁହାଯାଉଥିବା ମନ୍ତ୍ରୀ ରଘୁନାଥ ମହାନ୍ତି ଓ ତାଙ୍କ ପରିବାର ବିରୋଧରେ ବୋହୁ ବର୍ଷାସୋନୀ ଯୌତୁକ ଓ ଶାରୀରିକ ନିର୍ଯ୍ୟାତନା ଅଭିଯୋଗ ଆଣିଥିଲେ । ଏହି ଅଭିଯୋଗ ଆଧାରରେ ହିଁ ନବୀନ ତାଙ୍କ ପ୍ରତି କଠୋର ଆଭିମୁଖ୍ୟ ନେଇଥିଲେ । ତାଙ୍କର ମନ୍ତ୍ରୀ ପଦ ଗଲା, ଜେଲ୍ ଗଲେ । ଦଳରୁ ବିଦା ବି ହେଲେ ।
ଆଜି ସେହି ସମାନ ଅଭିଯୋଗ ସାଂସଦ ଭର୍ତ୍ତୃହରିଙ୍କ ବିରୋଧରେ । ମାତ୍ର କାର୍ଯ୍ୟାନୁଷ୍ଠାନର ସ୍ୱର ଶବ୍ଦ ନାହିଁ । ନାରୀ ସୁରକ୍ଷାର ନାରା ଦେଉଥିବା ମୁଖ୍ୟମନ୍ତ୍ରୀ ଦଳୀୟ ସାଂସଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ନ ନେଲେ ଜନମାନସରେ ତାଙ୍କୁ ନିନ୍ଦିତ ହେବାକୁ ପଡ଼ିବ । ଦଳୀୟ ସ୍ୱାର୍ଥ ଦୃଷ୍ଟିରୁ ନବୀନ ତୁରନ୍ତ ନିଷ୍ପତ୍ତି ନେବାକୁ ଖୋଦ୍ ବିଜେଡ଼ି ମହଲରୁ ଦାବି ହେଲାଣି । ମୁଖ୍ୟମନ୍ତ୍ରୀ ଏହାକୁ ଗୁରୁତ୍ୱର ସହ ବିଚାର କରିବାକୁ ଅନୁରୋଧ କରାଯାଇଛି ।
