ଭୁବନେଶ୍ୱର: ଆଗକୁ ପଞ୍ଚାୟତ ନିର୍ବାଚନ ଥିବା ବେଳେ ନେତାମାନେ ଏବେ ଜନତାମୁହାଁ ହୋଇଛନ୍ତି । ମନ୍ତ୍ରୀମଣ୍ଡଳ ସମ୍ପ୍ରସାରଣ ପରେ ପ୍ରଥମ କରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଆଜି ଓଡ଼ିଶା ମାଟିରେ ପାଦ ଦେଇ ବିଜେପିର “ଜନ ଆଶୀର୍ବାଦ’ ଯାତ୍ରା ଆରମ୍ଭ କରିଛନ୍ତି । ଆନୁୁଷ୍ଠାନିକ ଭାବେ ଏହି ଯାତ୍ରାର ନେତୃତ୍ୱ ନେଉଥିବା ଶ୍ରୀ ବୈଷ୍ଣବ ୫ ଦିନ ଧରି ୬ ଟି ଜିଲ୍ଲାକୁ ରେଳ ଯୋଗେ ବୁଲିବେ । ସମୁଦାୟ ୪୧୯ କିମି ଯାତ୍ରାରେ ୬ ରୋଡ ସୋ’ ଏବଂ ୩୦ ରୁ ଅଧିକ ସମ୍ବର୍ଦ୍ଧନା ସଭାରେ ଯୋଗଦେବେ । ଅନ୍ୟପକ୍ଷରେ ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ଆସନ୍ତାକାଲି ମାଲକାନଗିରି ଯାଇ ବିଜୁ ସ୍ୱାସ୍ଥ୍ୟ ଡିଜିଟାଲ୍ କାର୍ଡ ବଣ୍ଟନ କାର୍ଯ୍ୟକ୍ରମର ଶୁଭାରମ୍ଭ କରିବେ । ସେଥିପାଇଁ ବିଜେଡ଼ି ପକ୍ଷରୁ ବ୍ୟାପକ ପ୍ରସ୍ତୁତି ହୋଇଛି ।
ରୋଚକ କଥା ହେଉଛି, ରାଜ୍ୟର ଦୁଇ ପ୍ରମୁଖ ଦଳ ଦକ୍ଷିଣ ଓ ପଶ୍ଚିମ ଓଡ଼ିଶାକୁ ଫୋକସ୍ ରେ ରଖି ସେମାନଙ୍କ କାର୍ଯ୍ୟକ୍ରମ ଆରମ୍ଭ କରିଛନ୍ତି । ଦୁଇ କେନ୍ଦ୍ରମନ୍ତ୍ରୀ ଆଜି ପୁରୀ ଯାଇ ମହାପ୍ରଭୁଙ୍କୁ ଦର୍ଶନ କରିବା ପରେ ଭୁବନେଶ୍ୱର ରାଜ୍ୟ କାର୍ଯ୍ୟାଳୟରେ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଥିଲା । ଏହାପରେ ଶ୍ରୀ ବୈଷ୍ଣବ ଜନ ଆଶୀର୍ବାଦ ଯାତ୍ରାରେ ଭୁବନେଶ୍ୱର ଛାଡ଼ିଛନ୍ତି । ମୋଦି ସରକାରଙ୍କ ବିକାଶମୂଳକ କାର୍ଯ୍ୟକ୍ରମ ଲୋକଙ୍କ ପାଖରେ ପହଞ୍ଚାଇ ଆଶୀର୍ବାଦ ଲୋଡ଼ିବେ । ବିଜେପିର ଏହି ଯାତ୍ରା ପାଇଁ କର୍ମୀଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି ।
ଆସନ୍ତାକାଲି ରେଳମନ୍ତ୍ରୀ ରାୟଗଡ଼ା, କୋରାପୁଟ ଜିଲ୍ଲାରେ ରୋଡ୍ ସୋ ଏବଂ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ । ୨୧ ତାରିଖରେ ଜୟପୁର, ନବରଙ୍ଗପୁର, କଳାହାଣ୍ଡି ଏବଂ ୨୨ ତାରିଖରେ ବଲାଙ୍ଗୀର ଜିଲ୍ଲାରେ ତାଙ୍କର ରୋଡ୍ ସୋ ଏବଂ ବିଭିନ୍ନ କାର୍ଯ୍ୟକ୍ରମ ରହିଛି । ୨୩ ତାରିଖ ସକାଳେ ଭୁବନେଶ୍ୱରରେ କାର୍ଯ୍ୟକ୍ରମ ସାରି ନୂଆଦିଲ୍ଲୀ ଫେରିଯିବେ ।
ବିଜେପିର ଅଭିଯାନକୁ କାଉଣ୍ଟର କରିବା ପାଇଁ ବିଜେଡ଼ି ପ୍ରସ୍ତୁତି ବି କମ ନାହିଁ । ଆସନ୍ତାକାଲି ମୁଖ୍ୟମନ୍ତ୍ରୀ ମାଲକାନଗିରିରୁ ତାଙ୍କର ଜିଲ୍ଲା ଗସ୍ତ ଆରମ୍ଭ କରୁଛନ୍ତି । ଆଉ ଏଥର ଜିଲ୍ଲାଗସ୍ତରେ ଜନସାଧାରଣଙ୍କ ପାଇଁ ଭଲ ଉପହାର ନେଇ ଆସୁଛନ୍ତି । ଗତ ଅଗଷ୍ଟ ୧୫ରେ ମୁଖ୍ୟମନ୍ତ୍ରୀ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାକୁ ନୂଆ ରୂପରେ ଆଣିଥିଲେ । ଦେଶର ପ୍ରଥମ ରାଜ୍ୟ ଭାବେ ଓଡ଼ିଶାର ସାଢ଼େ ତିନି କୋଟି ଲୋକଙ୍କୁ ସ୍ମାର୍ଟ ହେଲଥ୍ କାର୍ଡ ଦେବାକୁ ମୁଖ୍ୟମନ୍ତ୍ରୀ ଘୋଷଣା କରିଥିଲେ । ଏହି ଯୋଜନାରେ ପରିବାର ପାଇଁ ୫ ଲକ୍ଷ ଏବଂ ମହିଳାଙ୍କ ପାଇଁ ୧୦ ଲକ୍ଷ ପର୍ଯ୍ୟନ୍ତ ଚିକିତ୍ସା ସୁବିଧା ରହିଛି ।
ଆସନ୍ତାକାଲି ମୁଖ୍ୟମନ୍ତ୍ରୀ ମାଲକାନଗିରିରେ ସ୍ମାର୍ଟ କାର୍ଡ ବଣ୍ଟନର ଶୁଭାରମ୍ଭ କରିବେ । ସମୁଦାୟ ୧,୫୫,୮୨୩ ଜଣଙ୍କୁ କାର୍ଡ ବଣ୍ଟନ କରାଯିବ । ୨୫ ତାରିଖ ଯାଏଁ ଜିଲ୍ଲାରେ କାର୍ଡ ବଣ୍ଟନ କାର୍ଯ୍ୟ ଚାଲିବ ଏବଂ ପ୍ରତି ବ୍ଲକ୍ ରେ ମନ୍ତ୍ରୀମାନେ ଉପସ୍ଥିତ ରହି କାଣ୍ଟ ବାଣ୍ଟିବେ । ନଭେମ୍ବର ମାସ ଭିତରେ ମୁଖ୍ୟମନ୍ତ୍ରୀ ୩୦ ଟି ଯାକ ଜିଲ୍ଲା ଗସ୍ତ କରିବେ ବୋଲି ଜଣାପଡ଼ିଛି ।
