ଭୁବନେଶ୍ୱର: ବାହାନଗା ରେଳ ଦୁର୍ଘଟଣାକୁ ୫ ଦିନ ବିତିଲା ପରେ ବିହାର ସରକାରଙ୍କ ନିଦ ଭାଙ୍ଗିଛି । ରାଜ୍ୟର ବିପର୍ଯ୍ୟୟ ପରିଚାଳନା ମନ୍ତ୍ରୀ ଶାହାନୱାଜ୍ ଆଲମ୍ ଙ୍କର ଏକ ବିବୃତିକୁ ଆଜି ସମ୍ବାଦ ସରବରାହ ସଂସ୍ଥା ଏଏନଆଇ ଟ୍ୱିଟ୍ କରିଛି । ମନ୍ତ୍ରୀ ମହୋଦୟଙ୍କର ଦାବି ହେଉଛି, ଦୁର୍ଘଟଣାରେ ବିହାରର ୪୩ ଲୋକଙ୍କର ମୃତ୍ୟୁ ହୋଇଥିବା ବେଳେ ୪୪ ଜଣ ଆହତ ହୋଇଛନ୍ତି । ୮୮ ଜଣଙ୍କର କୌଣସି ପତ୍ତା ମିଳୁନି ।
ଏତେବଡ଼ ଭୟଙ୍କର ଦୁର୍ଘଟଣା ପରେ ସମ୍ଭବତଃ ପ୍ରଥମ ଥର ପାଇଁ ବିହାର ସରକାରଙ୍କ ପକ୍ଷରୁ ଏମିତିକା ଚିନ୍ତାପ୍ରକଟ କରାଯାଇଛି । ବାହାନଗା ରେଳ ଦୁର୍ଘଟଣାରେ ପଶ୍ଚିମବଙ୍ଗ ପରେ ବିହାରର ସର୍ବାଧିକ ବ୍ୟକ୍ତି ମୃତାହତ ହୋଇଛନ୍ତି । ସେମାନଙ୍କ ମଧ୍ୟରୁ ଅଧିକାଂଶ ଗରିବ ଶ୍ରମିକ । ତେବେ ନିଜ ରାଜ୍ୟବାସୀଙ୍କ ପାଇଁ ମମତା ବାନାର୍ଜୀଙ୍କ ଭଳି ବ୍ୟସ୍ତତା ଦେଖାଇନାହାନ୍ତି ନୀତୀଶ କୁମାର । ଓଡ଼ିଶାକୁ ଆସି ନିଜ ରାଜ୍ୟର ମୃତକଙ୍କୁ ଉଦ୍ଧାର ଏବଂ ଆହତଙ୍କୁ ଚିକିତ୍ସା ବ୍ୟବସ୍ଥାର ତଦାରଖ କରିବାକୁ ସେ ଉଚିତ ମଣିନାହାନ୍ତି । ନିଜେ ଆସିନାହାନ୍ତି କି ତାଙ୍କର ମନ୍ତ୍ରୀ କି ଅଫିସରଙ୍କୁ ମଧ୍ୟ ପଠାଇ ନାହାନ୍ତି ।
ଦୁର୍ଘଟଣାରେ ଆହତମାନଙ୍କୁ ବାଲେଶ୍ୱର, ଭଦ୍ରକ, କଟକ ଓ ଭୁବନେଶ୍ୱରର ବିଭିନ୍ନ ହସ୍ପିଟାଲ୍ ରେ ଭର୍ତ୍ତି କରାଯାଇଛି । ଏସସିବିରେ ବର୍ତ୍ତମାନ ସୁଦ୍ଧା ଶତାଧିକ ଆହତଙ୍କୁ ଚିକିତ୍ସା କରାଯାଉଛି । ଗୁରୁତର ୧୭ ଜଣ ଆଇସିୟୁରେ ଭର୍ତ୍ତି ହୋଇଛନ୍ତି । ସେପଟେ ଭୁବନେଶ୍ୱର ଏମସ ରେ ଶବ ଚିହ୍ନଟ ପାଇଁ ପଶ୍ଚିମବଙ୍ଗ, ବିହାର ପ୍ରଭୃତି ରାଜ୍ୟର ଲୋକଙ୍କ ଧାଡ଼ି ଲାଗିଛି । ଏବେ ସୁଦ୍ଧା ବି ୮୩ ଶବ ଚିହ୍ନଟ ହୋଇପାରିନାହିଁ । ଶବ ଚିହ୍ନଟ ଏବଂ ହସ୍ତାନ୍ତର ପାଇଁ ଓଡ଼ିଶା ସରକାରଙ୍କ ପକ୍ଷରୁ ସବୁ ପ୍ରକାର ବ୍ୟବସ୍ଥା କରାଯାଇଛି । ବିଭିନ୍ନ ସ୍ୱେଚ୍ଛାସେବୀ ସଂଗଠନ ମଧ୍ୟ ସହାୟତା କରୁଛନ୍ତି । ପଶ୍ଚିମବଙ୍ଗ ସରକାର ମଧ୍ୟ ସହାୟତାର ହାତ ବଢ଼ାଇଛନ୍ତି । ନିଜ ରାଜ୍ୟର ଲୋକଙ୍କ ପାଇଁ ଏକ ହେଲ୍ପଡେସ୍କ କାର୍ଯ୍ୟ କରୁଛି ।
ମାତ୍ର ଦୁଃଖ ଓ ଆଶ୍ଚର୍ଯ୍ୟର କଥା ହେଉଛି, ଆହତଙ୍କ ଅବସ୍ଥା ବୁଝିବା ପାଇଁ ବିହାର ସରକାରଙ୍କ ପକ୍ଷରୁ କଟକ ଏସସିବିରେ କେହି ନାହାନ୍ତି କି ଶବ ଖୋଜିବା ଓ ହସ୍ତାନ୍ତରରେ ସହାୟତା ଦେବାକୁ ଭୁବନେଶ୍ୱର ଏମସ୍ ରେ କେହି ନାହାନ୍ତି । ଅଥଚ ତେଲେଙ୍ଗାନାର ଜଣେ ମନ୍ତ୍ରୀ ଏସସିବିରେ ଡେରା ପକାଇ ନିଜ ରାଜ୍ୟର ଆହତଙ୍କ ଅବସ୍ଥା ବୁଝୁଥିବା ଦେଖିବାକୁ ମିଳିଛି ।
ଏତେବଡ଼ ଦୁର୍ଘଟଣାରେ ସାରା ବିଶ୍ୱ ସ୍ତବ୍ଧ । ନିଜ ରାଜ୍ୟର ପାଖାପାଖି ୨୦୦ ଲୋକ ଟ୍ରେନ୍ ରେ ଯାତ୍ରୀ ଥିବା ବିହାର ସରକାର ହିସାବ ଦେଉଛନ୍ତି । ମାତ୍ର ନିଜର ସାମାନ୍ୟତମ ଦାୟିତ୍ୱ ଓ କର୍ତ୍ତବ୍ୟ ଭୁଲିଯାଇଛନ୍ତି । ଦୁର୍ଘଟଣାସ୍ଥଳ ଓ ହସ୍ପିଟାଲ୍ କୁ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କଠାରୁ ଆରମ୍ଭ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ତାମିଲନାଡୁ କ୍ରୀଡ଼ାମନ୍ତ୍ରୀ ଧାଇଁ ଆସିଥିଲେ ମଧ୍ୟ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କଠାରେ ସାମାନ୍ୟ ସମ୍ବେଦନଶୀଳତା ଦେଖିବାକୁ ନ ମିଳିବା ସମସ୍ତଙ୍କୁ ଆଚମ୍ବିତ କରିଛି ।
