ଭୁବନେଶ୍ୱର: କଳ୍ପନାଜଳ୍ପନାର ଅବସାନ ଘଟିଛି । ବିକ୍ରମ କେଶରୀ ଆରୁଖ, ସୁଦାମ ମାରାଣ୍ଡି ଏବଂ ସାରଦା ପ୍ରସାଦ ନାୟକ ହେବେ କ୍ୟାବିନେଟ୍ ମନ୍ତ୍ରୀ । ନବୀନ ପଟ୍ଟନାୟକଙ୍କ ମନ୍ତ୍ରିମଣ୍ଡଳରେ ଆସନ୍ତାକାଲି ସେମାନେ ସାମିଲ ହେବେ । ଲୋକସେବା ଭବନର କନଭେନସନ୍ ହଲରେ ସକାଳ ୯.୫୦ ମିନିଟ୍ ରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ସେମାନଙ୍କୁ ଶପଥ ପାଠ କରାଇବେ ।
ମନ୍ତ୍ରିମଣ୍ଡଳରେ ସାମିଲ ହେଉଥିବା ଏହି ତିନି ବରିଷ୍ଠ ନେତା ପୂର୍ବରୁ ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ପଦରେ ଥିଲେ । ବିକ୍ରମ ଏକାଧିକ ଥର ଓଜନଦାର ମନ୍ତ୍ରୀ ଥିଲା ବେଳେ ନବୀନଙ୍କ ତୃତୀୟ ପାଳିରେ ସାରଦା ନାୟକ ନଗର ଉନ୍ନୟନ, ଯୋଗାଣ ବିଭାଗର ରାଷ୍ଟ୍ରମନ୍ତ୍ରୀ(ସ୍ୱାଧୀନ) ଥିଲେ । ପଞ୍ଚମ ପାଳି ସରକାରରେ ବିକ୍ରମ ଏବଂ ସୁଦାମ କ୍ୟାବିନେଟ୍ ମନ୍ତ୍ରୀ ଥିଲେ । ମାତ୍ର ଗତବର୍ଷ ଜୁନ୍ ପ୍ରଥମ ସପ୍ତାହରେ ଅନୁଷ୍ଠିତ ଅଦଳବଦଳରେ ମୁଖ୍ୟମନ୍ତ୍ରୀ ଏହି ଦୁଇଜଣଙ୍କୁ ମନ୍ତ୍ରିପଦରୁ ଅବ୍ୟାହତି ଦେଇଥିଲେ । ବିକ୍ରମଙ୍କୁ ବାଚସ୍ପତି ପଦ ଦିଆଯାଇଥିଲା ।
ସୂଚନାଥାଉକି, ଗତ ଜାନୁଆରୀ ମାସରେ ନବ ଦାସଙ୍କ ପରଲୋକ ଏବଂ ନିକଟରେ ସମୀର ଦାଶ ଓ ଶ୍ରୀକାନ୍ତ ସାହୁଙ୍କ ଇସ୍ତଫା ଯୋଗୁଁ ୩ ମନ୍ତ୍ରୀ ପଦ ଖାଲି ପଡ଼ିଥିଲା । ବିକ୍ରମ ଆରୁଖ ମଧ୍ୟ ବାଚସ୍ପତି ପଦରୁ ଇସ୍ତଫା ଦେଇଥିଲେ । ମେ’ ୧୨ ତାରିଖରେ ମୁଖ୍ୟମନ୍ତ୍ରୀ ଦିଲ୍ଲୀରେ ଥିବା ବେଳେ ଭୁବନେଶ୍ୱରରେ ଅଚାନକ ଏହି ଇସ୍ତଫା ନାଟକ ସମସ୍ତଙ୍କୁ ଚକିତ କରିଥିଲା । ମନ୍ତ୍ରିମଣ୍ଡଳ ପୁନର୍ଗଠନ ସୁନିଶ୍ଚିତ ବୋଲି ଆଭାସ ମିଳିଥିଲା ।
ସୋମବାର ସକାଳେ ମନ୍ତ୍ରିମଣ୍ଡଳ ପୁନର୍ଗଠନ ହେବ ବୋଲି ଗତକାଲି ସଂଧ୍ୟାରେ ସ୍ପଷ୍ଟ ହୋଇଥିଲା । ନୂଆ ମନ୍ତ୍ରୀଙ୍କ ଶପଥ ଗ୍ରହଣ କାର୍ଯ୍ୟସୂଚୀ ମୁଖ୍ୟ ଶାସନ ସଚିବଙ୍କ ଅଫିସରୁ ଆଜି ଜାରି ହେବା ପରେ ମୁଖ୍ୟମନ୍ତ୍ରୀଙ୍କ ଅଫିସ୍ ରୁ କାହା ପାଖକୁ ଫୋନ୍ କଲ୍ ଯାଉଛି ତାହା ଜାଣିବାକୁ ସମସ୍ତେ ଉତ୍କଣ୍ଠାର ସହ ଅନାଇଁ ରହିଥିଲେ । ସଂଧ୍ୟା ପରେ ଏହି ଉତ୍କଣ୍ଠାର ଅବସାନ ଘଟିଛି ।
ଖୁବ୍ ଶୀଘ୍ର ନୂଆ ବାଚସ୍ପତିଙ୍କ ନାଁ ଘୋଷଣା ହେବ ବୋଲି ଜଣାପଡ଼ିଛି ।
