ଭୁବନେଶ୍ୱର: ଆଜି ସକାଳେ ନୂଆପଡ଼ା ଉପନିର୍ବାଚନ ପାଇଁ ମତଦାନ ଆରମ୍ଭ ହେବାର କିଛି ସମୟ ପରେ ବିଜେଡି ପକ୍ଷରୁ ଅଭିଯୋଗମାନ ଆସିବାରେ ଲାଗିଥିଲା । ପ୍ରତ୍ୟେକ ଜାଗାରେ ବିଜେପି ଆଦର୍ଶ ଆଚରଣ ବିଧିର ଉଲ୍ଲଂଘନ କରି ଚାଲିଛି ବୋଲି ବିଜେଡି ଅଭିଯୋଗ ଆଣି ମୁଖ୍ୟ ନିର୍ବାଚନ ଅଧିକାରୀଙ୍କ ହସ୍ତକ୍ଷେପ ଲୋଡ଼ିଥିଲା ।
ଅଭିଯୋଗ ଅନୁଯାୟୀ, ଭୋଟ ଗ୍ରହଣ ଚାଲିଥିବା ବେଳେ ବିଜେପି ନେତା ଓ କର୍ମୀମାନେ ସବୁ ନୀତି ନିୟମ ଓ କଟକଣାକୁ ଜଳାଞ୍ଜଳି ଦେଇଥିଲେ । ଆଦର୍ଶ ଆଚରଣ ବିଧିର ଧଜିଆ ଉଡ଼ାଇଥିଲେ । ବିଜେପି କର୍ମୀମାନେ ବୁଥ୍ ଭିତରେ ପଶି ଜୟ ଢ଼ୋଲକିଆଙ୍କୁ ଭୋଟ ଦେବା ପାଇଁ ଲୋକଙ୍କ ଉପରେ ବଳପୂର୍ବକ ଚାପ ପକାଉଥିଲେ । ମତଦାନ କେନ୍ଦ୍ର ଆଗରେ ବିଜେପି କର୍ମୀମାନେ ଭୋଟରଙ୍କୁ ଖାଦ୍ୟ ପୁଡ଼ିଆ ଦେଇ ପ୍ରଭାବିତ କରୁଥିଲେ ।
ଖରିଆର ରୋଡ୍ ଏନଏସି ଅନ୍ତର୍ଗତ ୩,୪,୫,୧୩,୧୪ ଓ ୧୫ ବୁଥ୍ ରୁ ଏଭଳି ଚିତ୍ର ସାମନାକୁ ଆଣିଥିଲା ବିଜେଡି । ବିଜେପି କର୍ମୀମାନେ ଅସ୍ଥାୟୀ ଜଳଖିଆ ବିତରଣ କେନ୍ଦ୍ର ଖୋଲିଥିଲେ ଏବଂ ଧାଡ଼ିରେ ଛିଡ଼ା ହୋଇଥିବା ଭୋଟରଙ୍କ ହାତକୁ ଗୋଟେ ଲେଖାଏଁ ପ୍ୟାକେଟ୍ ଧରାଉଥିଲେ । ନୂଆପଡ଼ାର ସବୁ ବୁଥ୍ ଆଗରେ ବିଜେପି ନେତା ଓ କର୍ମୀମାନେ ଷ୍ଟଲ ଲଗାଇ ଭୋଟ ଦେବା ପାଇଁ ଆସୁଥିବା ଲୋକଙ୍କୁ ଟିଫିନ୍ ପୁଡ଼ିଆ ଧରାଇ ବିଜେପି ପ୍ରାର୍ଥୀଙ୍କୁ ଭୋଟ ଦେବା ପାଇଁ ଭୋଟରଙ୍କୁ ପ୍ରବର୍ତ୍ତାଉଥିବା ନୂଆପଡ଼ା ଜିଲ୍ଲା ବିଜେଡି ପକ୍ଷରୁ ଅଭିଯୋଗ ହୋଇଥିଲା । ସଭାପତି ଅବନୀ ରଞ୍ଜନ ଯୋଶୀ ଜିଲ୍ଲା ନିର୍ବାଚନ ଅଧିକାରୀଙ୍କୁ ସ୍ମାରକପତ୍ର ଦେଇଥିଲା ବେଳେ ରାଜ୍ୟ ବିଜେଡି ପକ୍ଷରୁ ରାଜ୍ୟ ନିର୍ବାଚନ ଅଧିକାରୀଙ୍କ ହସ୍ତକ୍ଷେପ ଲୋଡ଼ାଯାଇଥିଲା ।
ସେହିଭଳି ଅଧିକାଂଶ ବୁଥ୍ ରେ ବିଜେପି ଏଜେଣ୍ଟ ଏବଂ ପ୍ରିଜାଇଡିଂ ଅଫିସରମାନେ ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ ଏବଂ ବିଜେପି ପ୍ରାର୍ଥୀଙ୍କ ଫଟୋ ଲାଗିଥିବା ଚିରୁକୁଟି ବାଣ୍ଟୁଥିବା ବିଜେଡି ଫଟୋ ଭିଡିଓ ସହ ଅଭିଯୋଗ ଆଣିଥିଲା । ଏ ସମ୍ପର୍କରେ ମୁଖ୍ୟ ନିର୍ବାଚନ ଅଧିକାରୀଙ୍କର ଦୃଷ୍ଟି ଆକର୍ଷଣ କରି କାର୍ଯ୍ୟାନୁଷ୍ଠାନ ଦାବି କରିଥିଲା ।
ନିର୍ବାଚନ ପ୍ରଚାର ଶେଷ ହେବା ପରଠାରୁ ବିଜେଡି ପକ୍ଷରୁ ମାଳ ମାଳ ଅଭିଯୋଗ ହୋଇ ଆସୁଥିଲା । ଉପନିର୍ବାଚନରେ ଅର୍ଥ, ବାହୁ ଓ କ୍ଷମତାବଳର ଅଭିଯୋଗ ଆଣିଥିଲା । ଅରାଜକତା ଓ ହିଂସାକାଣ୍ଡ ଘଟାଇବା ପାଇଁ ପ୍ରତ୍ୟେକ ପଞ୍ଚାୟତରେ ଛତିଶଗଡ଼ ଗୁଣ୍ଡା, ଅପରାଧୀଙ୍କୁ ବିଜେପି ନିୟୋଜିତ କରିଥିବା ଅଭିଯୋଗ ଆଣିଥିଲା । ଶେଷରେ ଭୋଟ ଚୋରି ଅଭିଯୋଗ ବି ଆଣିଛି । ଭୋଟରଙ୍କୁ ଟଙ୍କା ଦେଇ, ଡରାଇ ବିଜେପି ଭୋଟ ହାତେଇବାକୁ ଉଦ୍ୟମ କରିଛି ବୋଲି ବିଜେଡିର ଅଭିଯୋଗ । ପ୍ରତିଟି ଅଭିଯୋଗ ରାଜ୍ୟ ନିର୍ବାଚନ ଅଧିକାରୀଙ୍କ ଦୃଷ୍ଟିକୁ ଅଣାଯାଇ କାର୍ଯ୍ୟାନୁଷ୍ଠାନ ଦାବି କରାଯାଇଥିଲା ।
ସେହିଭଳି କଂଗ୍ରେସ ପକ୍ଷରୁ ବିଜେପି ବିରୋଧରେ ଭୋଟ ଚୋରି ଅଭିଯୋଗ ଆଣିଛନ୍ତି ପିସିସି ସଭାପତି ଭକ୍ତ ଚରଣ ଦାସ । ସ୍ଥାନୀୟ ପ୍ରଶାସନ ଓ ପୁଲିସ ସହାୟତାରେ ଭୋଟ ଚୋରି କରିଥିବାର ସେ ନିର୍ଦ୍ଦିଷ୍ଟ ଅଭିଯୋଗ ଆଣିଛନ୍ତି ।
