ଭୁବନେଶ୍ୱର: କେବଳ ଦଳ ସହ ବେଇମାନୀ କରିନାହାନ୍ତି, ଅରବିନ୍ଦ ମହାପାତ୍ର ପାଟକୁରାବାସୀଙ୍କ ସହ ବିଶ୍ୱାସଘାତକତା କରିଛନ୍ତି । ବିଜେଡି ଟିକେଟ ପାଇବା ଦିନରୁ ହିଁ ଦଳ ବିରୋଧରେ ଷଡ଼ଯନ୍ତ୍ର ରଚି ଆସୁଥିଲେ । ବାପ ପୁଅ ଦଳ ଭାବେ ପାଟକୁରାରେ ଶାସନ କରୁଥିଲେ । ସବୁ ପ୍ରମାଣ ପାଇଲା ପରେ ବିଜେଡିରୁ ତାଙ୍କୁ ନିଲମ୍ବନ କରାଗଲା । ଆଜି ଶଙ୍ଖ ଭବନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଯୁବ ବିଜେଡିର ସାଧାରଣ ସମ୍ପାଦକ ଅମରେଶ ପତ୍ରୀ ଏବଂ ମୁଖପାତ୍ର ତୁମ୍ବନାଥ ପଣ୍ଡା ଏହା କହିଛନ୍ତି । ବିଜେଡିକୁ ଦୁର୍ବଳ କରିବା ପାଇଁ ଅରବିନ୍ଦଙ୍କ କାର୍ଯ୍ୟକଳାପର ଗୋଟି ଗୋଟି କରି ପ୍ରମାଣ ଦେଇଛନ୍ତି ।
ସେମାନେ କହିଛନ୍ତି, ଅରବିନ୍ଦ ମହାପାତ୍ରଙ୍କୁ ବିଜେଡି ଟିକେଟ ଦେଇଥିଲା । ୨୪ ବର୍ଷ ତଳେ ତାଙ୍କ ବାପା ବିଜୁବାବୁଙ୍କ ସହ ବିଶ୍ୱାସଘାତକତା କରିଥିଲେ ମଧ୍ୟ ନବୀନ ପଟ୍ଟନାୟକ ତାହାକୁ ଭୁଲି ଅରବିନ୍ଦଙ୍କୁ ପ୍ରାର୍ଥୀ କରିଥିଲେ । ବିଜେଡି ଟିକେଟ ପାଇ ସେ ବିଧାୟକ ହୋଇଛନ୍ତି । ମାତ୍ର ସେ ଟିକେଟ ପାଇବା ପରଠୁଁ ବିଜେଡି ବିରୋଧରେ ଷଡ଼ଯନ୍ତ୍ର ଆରମ୍ଭ କରିଥିଲେ । ବିଜେଡିର ନୀତି ଆଦର୍ଶ ଭୁଲି ତାଙ୍କ ବାପାଙ୍କ ଦ୍ୱାରା ପରିଚାଳିତ ହେଲେ । ତାଙ୍କର ପ୍ରଥମ କାର୍ଯ୍ୟ ଥିଲା ଦଳୀୟ ସାଂସଦ ପ୍ରାର୍ଥୀଙ୍କୁ ହରାଇବା ଯୋଜନା । ସେଥିରେ ସେ ସଫଳ ହୋଇଥିଲେ । ସେ ବିଧାୟକ ହେବା ପରେ ତାଙ୍କୁ ଜିତାଇ ଆଣିଥିବା ପାଟକୁରାର ୯୦ ପ୍ରତିଶତ ବିଜେଡି କର୍ମୀଙ୍କୁ ପାଖ ପୂରାଇଲେ ନାହିଁ । ତାଙ୍କ ବାପାଙ୍କ ସହ ୨୪ ବର୍ଷ ଧରି ବୁଲୁଥିବା ଲୋକମାନଙ୍କୁ ପାଖରେ ରଖିଲେ । ବିଧାୟକ ପାଣ୍ଠି ସେମାନଙ୍କ ଦ୍ୱାରା ଖର୍ଚ୍ଚ କରାଇଲେ ।
ପାଟକୁରାରେ କୌଣସି କାର୍ଯ୍ୟକ୍ରମରେ ଦଳର ସଭାପତି ନବୀନ ପଟ୍ଟନାୟକଙ୍କ ଫଟୋ ରଖୁ ନ ଥିଲେ କି ଶଙ୍ଖ ଚିହ୍ନ ବ୍ୟବହାର କରୁ ନ ଥିଲେ । ପାଟକୁରାରେ ସମ୍ପୂର୍ଣ୍ଣ ଭାବେ ବାପ ପୁଅ ଦଳ ଚାଲିଥିଲା । ସବୁ ଘଟଣା ଜାଣିଲା ପରେ ନବୀନ ପଟ୍ଟନାୟକ ଉଚିତ ନିଷ୍ପତ୍ତି ନେଇଛନ୍ତି ।
ବିଜେଡି ପକ୍ଷରୁ କୁହାଯାଇଛି, ଯେଉଁଭଳି ବୃକ୍ଷ ସେଇଭଳି ଫଳ । ବିଜୁବାବୁଙ୍କୁ ତାଙ୍କ ବାପା ପଛପଟୁ ଛୁରି ମାରିଥିଲେ । ଆଜି ତାଙ୍କ ପୁଅ ମଧ୍ୟ ସେଇ କାର୍ଯ୍ୟକ୍ରମରେ ଥିଲେ । ଅରବିନ୍ଦଙ୍କୁ ଟିକେଟ ଦେବା ପରଠୁ ୨୨ ମାସ ଧରି ଦଳୀୟ ଗୁଇନ୍ଦା ତାଙ୍କ କାର୍ଯ୍ୟକଳାପ ଉପରେ ନଜର ରଖିଥିଲା । ସେହି ରିପୋର୍ଟ ଆଧାରରେ ନବୀନ ପଟ୍ଟନାୟକ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ।
ଅରବିନ୍ଦଙ୍କ କଟାକ୍ଷ
ଗତକାଲି ବିଜେଡି ମୁଖପାତ୍ର ଲେନିନ୍ ମହାନ୍ତି ତାଙ୍କ ଓ ବାପା ବିଜୟ ମହାପାତ୍ରଙ୍କ ବିରୋଧରେ ‘ମିଡ୍ ଡେ ଅପରେସନ୍’ ଅଭିଯୋଗ ଆଣିବା ପରେ ବିଧାୟକ ଅରବିନ୍ଦ ମହାପାତ୍ର ବିଜେଡିକୁ ପ୍ରମାଣ ମାଗିଥିଲେ । ଆଜି ବିଜେଡି ତାହାର ପ୍ରମାଣ ଦେବା ପରେ ଅରବିନ୍ଦ କଟାକ୍ଷ କରିଛନ୍ତି । ଦିଲ୍ଲୀ ଯିବା ପୂର୍ବରୁ ବିମାନବନ୍ଦରରେ ସାମ୍ବାଦିକମାନେ ଆଜିର ବିଜେଡି ସାମ୍ବାଦିକ ସମ୍ମିଳନୀ ଉପରେ ତାଙ୍କର ପ୍ରତିକ୍ରିୟା ଲୋଡ଼ିଥିଲେ । ଅରବିନ୍ଦ କହିଥିଲେ, ସେମାନେ ପ୍ରତ୍ୟେକ ଥର ନୂଆ ନୂଆ ଅଭିଯୋଗ ଆଣୁଛନ୍ତି । ଏକାଥରେ ସବୁ ଅଭିଯୋଗ କାଗଜରେ ଲେଖି ଦେଇ ଦିଅନ୍ତୁ । ଯାହା ଯାହା ଅଭିଯୋଗ ରହିଛି ସେ ନେଇ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ସହ କଥା ହେବାକୁ ଚେଷ୍ଟା କରିବି । ସାମ୍ବାଦିକମାନେ ଏହା ଉପରେ ଅଧିକ ପଚାରିବାରୁ ଅରବିନ୍ଦ କହିଥିଲେ, ଦିଲ୍ଲୀରୁ ଫେରିଲେ ପ୍ରେସ୍ ମିଟ୍ ରେ କଥା ହେବି ।
