ଭୁବନେଶ୍ୱର: ରାଜ୍ୟସଭା ନିର୍ବାଚନରେ କ୍ରସଭୋଟିଂ କରିଥିବା ବିଜେଡିର ୮ ବିଧାୟକଙ୍କ ସଭ୍ୟପଦ ରବ୍ଦ ପାଇଁ ଆଇନଗତ ପଦକ୍ଷେପ ନେଇଛି ବିଜେଡି । ବାଚସ୍ପତି ଶ୍ରୀମତୀ ସୁରମା ପାଢ଼ୀ ଏହି ଆବେଦନକୁ ନାକଚ କରିଥିବାରୁ ଦଳ ତାହାକୁ ଚାଲେଞ୍ଜ କରିଛି । ବାଚସ୍ପତିଙ୍କୁ ପକ୍ଷଭୁକ୍ତ କରି ହାଇକୋର୍ଟରେ ଏକ ରିଟ୍ ପିଟିସନ(ସିଭିଲ୍) କରାଯାଇଛି । ବିଜେଡିର ମୁଖ୍ୟ ସଚେତକ ଶ୍ରୀମତୀ ପ୍ରମିଳା ମଲ୍ଲିକ ଏହି ପିଟିସନ୍ ଦାଖଲ କରିଛନ୍ତି ।
‘ଆମକୁ ପକ୍ଷ ରଖିବାର ସୁଯୋଗ ନ ଦେଇ ବାଚସ୍ପତି ଏକତରଫା ଭାବେ ଯେଉଁ ନିଷ୍ପତ୍ତି ନେଇଛନ୍ତି ତାହା ବିରୋଧରେ ଆମେ ହାଇକୋର୍ଟଙ୍କ ପାଖରେ ଗତକାଲି ଆବେଦନ କରିଛୁ । ଦଳୀୟ ନିଷ୍ପତ୍ତି ବିରୋଧରେ ଯାଇଥିବା ୮ ଜଣଙ୍କ ବିରୋଧରେ ଆବେଦନ ଦେଇଛୁ’ ବୋଲି ଶ୍ରୀମତୀ ମଲ୍ଲିକ କହିଛନ୍ତି ।
ରାଜ୍ୟସଭାରେ କ୍ରସଭୋଟିଂ କରି ସଭ୍ୟପଦ ରବ୍ଦ ମାମଲା ଖାଇଥିବା ବିଜେଡି ବିଧାୟକମାନେ ହେଲେ ରମାକାନ୍ତ ଭୋଇ, ଅରବିନ୍ଦ ମହାପାତ୍ର, ସୁବାସିନୀ ଜେନା, ନବକିଶୋର ମଲ୍ଲିକ, ସନାତନ ମହାକୁଡ଼, ଚକ୍ରଧର କଅଁର, ସୌଭିକ ବିଶ୍ୱାଳ ଓ ଦେବୀରଞ୍ଜନ ତ୍ରିପାଠୀ ।
ଗତ ମାର୍ଚ୍ଚ ମାସରେ ଅନୁଷ୍ଠିତ ରାଜ୍ୟସଭା ନିର୍ବାଚନରେ କଂଗ୍ରେସର ତିନି ବିଧାୟକ ସୋଫିଆ ଫିରଦୋସ୍, ରମେଶ ଜେନା ଏବଂ ଦାଶରଥୀ ଗମାଙ୍ଗଙ୍କ ସମେତ ବିଜେଡିର ଏହି ୮ ବିଧାୟକ କ୍ରସଭୋଟିଂ କରିଥିଲେ । ଏମାନଙ୍କ ସଭ୍ୟପଦ ରବ୍ଦ ପାଇଁ ଦୁଇ ଦଳ ପକ୍ଷରୁ ବାଚସ୍ପତିଙ୍କୁ ପୃଥକ୍ ଆବେଦନ କରାଯାଇଥିଲା । ବିଜେଡିର ମୁଖ୍ୟ ସଚେତକ ଶ୍ରୀମତୀ ମଲ୍ଲିକ ଏପ୍ରିଲ୍ ୨୭ରେ ବାଚସ୍ପତିଙ୍କୁ ପିଟିସନ ଦେଇଥିଲେ । ସେଥିରେ ୮ ବିଧାୟକ ଦଳୀୟ ହ୍ୱିପ୍ ନ ମାନି ସ୍ୱେଚ୍ଛାକୃତ ଭାବେ ଦଳ ବିରୋଧରେ ଯାଇଥିବାରୁ ସମ୍ବିଧାନର ଦଶମ ପରିଚ୍ଛେଦ ଅନୁଯାୟୀ ସେମାନଙ୍କର ସଭ୍ୟପଦ ରବ୍ଦ କରିବାକୁ ଦାବି କରିଥିଲେ ।
ଜୁନ୍ ୨୨ରେ ବାଚସ୍ପତି ଏହି ଆବେଦନକୁ ଖାରଜ କରିଦେଇଥିଲେ । ଆବେଦନରେ ଆବଶ୍ୟକ ତଥ୍ୟ, ପ୍ରମାଣ ଓ ସତ୍ୟପାଠର ଅଭାବ ଥିବାରୁ ଏହା ସମ୍ପୂର୍ଣ୍ଣ ନୁହେଁ ବୋଲି ବିବେଚନା କରିଥିଲେ । ବିଧାନସଭା ରୁଲ୍-୬ର ସବ୍ ରୁଲ୍-୬ ଓ ୭ ଅନୁଯାୟୀ ପ୍ରମାଣ ଓ ତଥ୍ୟ ଉପସ୍ଥାପନ ହୋଇ ନ ଥିବାରୁ ଆବେଦନ ଖାରଜ ହୋଇଥିବା ରାୟ ଦେଇଥିଲେ ।
ବାଚସ୍ପତିଙ୍କ ଏହି ରାୟକୁ ଗଣତନ୍ତ୍ରର ହତ୍ୟା ବୋଲି ବିଜେଡି ପକ୍ଷରୁ କୁହାଯାଇଥିଲା । ସେଦିନ ଶଙ୍ଖ ଭବନରେ ଶ୍ରୀମତୀ ମଲ୍ଲିକ ଏବଂ ଡ. ଅରୁଣ ସାହୁ ଏକ ସାମ୍ବାଦିକ ସମ୍ମିଳନୀ କରି ବାଚସ୍ପତିଙ୍କ ରାୟକୁ ଚାଲେଞ୍ଜ କରିଥିଲେ । ବାଚସ୍ପତିଙ୍କ ରାୟ ବିରୋଧରେ ନ୍ୟାୟାଳୟ ଯିବୁ ବୋଲି କହିଥିଲେ ।
ଆଜି ସାମ୍ବାଦିକମାନଙ୍କ ପ୍ରଶ୍ନରେ ବରିଷ୍ଠ ବିଧାୟକ ଡ. ଅରୁଣ ସାହୁ କହିଛନ୍ତି ଯେ ରାଜ୍ୟସଭା ଭୋଟରେ ହ୍ୱିପ୍ ନାହିଁ । ଏକଥା ସମସ୍ତେ ଜାଣନ୍ତି । ବିଜେଡି ଯେଉଁ ପ୍ରସଙ୍ଗ ଉଠାଇଛି ତାହାକୁ ଜାଣିଶୁଣି ବିଭ୍ରାନ୍ତ କରାଯାଉଛି । ପ୍ରସଙ୍ଗ ହେଉଛି, ଯେଉଁ ବିଧାୟକମାନଙ୍କ କଥା କୁହାଯାଉଛି ସେମାନେ ବିଭିନ୍ନ ସମୟରେ ବାରମ୍ବାର ବିଧାୟକ ଦଳ ବୈଠକକୁ ନ ଆସି ଦଳୀୟ ହ୍ୱିପ୍ କୁ ଅବମାନନା କରିଛନ୍ତି । ଏହି ହ୍ୱିପ୍ ଅବମାନନା କଲେ ମଧ୍ୟ ସଭ୍ୟପଦ ରବ୍ଦ ହୋଇପାରିବ । ସେଥିପାଇଁ ଆମେ ହାଇକୋର୍ଟରେ ଅପିଲ୍ କରିଛୁ ।
