ଭୁବନେଶ୍ୱର: ବିଜେଡିକୁ ଦୁର୍ବଳ କରିବାକୁ କରାଯାଇଥିଲା ବଡ଼ ଷଡ଼ଯନ୍ତ୍ର । ଏଥିରେ ସାମିଲ ଥିଲେ ବିଜୟ ମହାପାତ୍ର, ଅରବିନ୍ଦ ମହାପାତ୍ର ଏବଂ ସନାତନ ମହାକୁଡ଼ । ଦଳକୁ ଦୁର୍ବଳ କରିବାକୁ ଲାଗିପଡ଼ିଥିବା ନେତାମାନଙ୍କୁ ସଂଗଠିତ କରିବାରେ ଏମାନେ ନେତୃତ୍ୱ ନେଉଥିଲେ । ଏହି ‘ମିଡ୍ ଡେ ଅପରେସନ୍’କୁ ମାସ ମାସ ଧରି ନଜରରେ ରଖାଯିବା ପରେ ଦୁଇ ବିଧାୟକ ଅରବିନ୍ଦ ଓ ସନାତନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇଛି ।
ବିଜେଡି ମୁଖପାତ୍ର ଲେନିନ୍ ମହାନ୍ତି ଆଜି ଗଣମାଧ୍ୟମରେ ଏହି ବିସ୍ଫୋରକ ବୟାନ ଦେଇଛନ୍ତି । ନିଲମ୍ବିତ ଦୁଇ ବିଧାୟକ ଦଳ ପ୍ରତି କିଭଳି ବିଶ୍ୱାସଘାତକତା କରିଛନ୍ତି ତାହା ବର୍ଣ୍ଣନା କରିଛନ୍ତି । ସେ କହିଛନ୍ତି, ବିଜେଡିକୁ ଦୁର୍ବଳ କରିବା ପାଇଁ ଗୋଟିଏ ବଡ଼ ଷଡ଼ଯନ୍ତ୍ର କରାଯାଇଥିଲା । ଯେଉଁ ଷଡ଼ଯନ୍ତ୍ରର ଅଂଶ ଥିଲେ ସନାତନ ମହାକୁଡ଼, ବିଜୟ ମହାପାତ୍ର ଏବଂ ଅରବିନ୍ଦ ମହାପାତ୍ର । ଗତ କିଛି ମାସ ଧରି ଏମାନଙ୍କର ମିଡ୍ ଡେ ଅପରେସନ୍ ଚାଲିଥିଲା । ଏହି ଖବର ଦଳର ସଭାପତିଙ୍କ ନଜରକୁ ଆସିଥିଲା । ଦଳର ଦୁଇ ବିଧାୟକଙ୍କ ଅନ୍ତର୍ଘାତୀ କାର୍ଯ୍ୟକୁ ସେ ଗୁରୁତ୍ୱର ସହ ନେଇଥିଲେ । ସେମାନଙ୍କ କାର୍ଯ୍ୟ ଦଳୀୟ ଅନୁଶାସନର ବିରୋଧୀ, ପାର୍ଟିକୁ ଧୋକାବାଜି ଏବଂ ଦଳ ପ୍ରତି ଅନ୍ୟାୟ ଥିଲା । ମୋଟାମୋଟି କହିଲେ ସେମାନେ ଦୁର୍ନୀତିଗ୍ରସ୍ତ ଏବଂ ବିଶ୍ୱାସଘାତକ ଥିଲେ । ଏହାକୁ ଭଲ ଭାବରେ ବିଚାର କରାଯିବା ପରେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି ।
ବିଜୟ ମହାପାତ୍ରଙ୍କ ସହ ନବୀନ ପଟ୍ଟନାୟକଙ୍କର ପୂର୍ବ ଶତ୍ରୁତା କାରଣରୁ ତାଙ୍କ ପୁଅ ଉପରେ ରାଗ ସୁଝା ଯାଇଛି କି ବୋଲି ଗଣମାଧ୍ୟମ ପ୍ରଶ୍ନରେ ବିଜେଡି ମୁଖପାତ୍ର କହିଛନ୍ତି ଯେ ପାଟକୁରାରେ ଅନେକ ଦକ୍ଷ ଓ ପ୍ରତିଭାସମ୍ପନ୍ନ ଯୁବନେତୃତ୍ୱ ଥିଲେ ମଧ୍ୟ ଅରବିନ୍ଦଙ୍କୁ ନିଜେ ନବୀନ ବାବୁ ଟିକେଟ ଦେଇଛନ୍ତି । ତାଙ୍କୁ ବିଧାୟକ ହେବାର ସୁଯୋଗ ଦେଇଛନ୍ତି । ତାଙ୍କଠୁ ଦଳ ବହୁତ ଆଶା ରଖିଥିଲା । ସେମିତି ସନା ମହାକୁଡ଼ ଦଳୀୟ ଆଭିମୁଖ୍ୟ ନେଇ ଚମ୍ପୁଆର ବିକାଶ ପାଇଁ କାର୍ଯ୍ୟ କରିବେ ବୋଲି ଆଶା କରାଯାଉଥିଲା । ମାତ୍ର ସେମାନେ ବିଜେଡିର ଆଦର୍ଶକୁ କେବଳ ଧୂଳିସାତ କରିନାହାନ୍ତି, ଦଳକୁ ଦୁର୍ବଳ କରିବାକୁ ଷଡ଼ଯନ୍ତ୍ର କରିଛନ୍ତି ।
ମୁଖପାତ୍ର ଶ୍ରୀ ମହାନ୍ତି ଆହୁରି କହିଛନ୍ତି ଯେ ବିଜେଡିରେ ସଭାପତିଙ୍କୁ ଚାଲେଂଜ ଦେବାର କ୍ଷମତା କାହାରି ନାହିଁ । ମିଡ୍ ନାଇଟ୍ ଅପରେସନ୍ ଫେଲ୍ ମାରିଥିଲା । ଏବେ ମିଡ୍ ଡେ ଅପରେସନ୍ ଫେଲ୍ ହେଲା । ଆଗକୁ ମିଡ୍ ଇଭିନିଙ୍ଗ ଅପରେସନ୍ ବି ଫେଲ୍ ହେବ । ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ବିଜେଡି ଓଡ଼ିଶାବାସୀଙ୍କ ସେବାରେ ସମର୍ପିତ କରିଛି ଏବଂ ଆଗକୁ ଏହା ଜାରି ରହିବ ବୋଲି ସେ କହିଛନ୍ତି । ଦୁର୍ନୀତିଗ୍ରସ୍ତ, ଧୋକାବାଜ ଓ ବିଶ୍ୱାସଘାତକଙ୍କର ଏହି ଦଳରେ ସ୍ଥାନ ନାହିଁ ବୋଲି ସେ କହିଛନ୍ତି ।
ପ୍ରମାଣ ଦିଅ: ଅରବିନ୍ଦ
ଭୁବନେଶ୍ୱର: ତାଙ୍କର ଓ ତାଙ୍କ ବାପାଙ୍କ ବିରୋଧରେ ବିଜେଡିର ଆରୋପକୁ ମିଛ ଓ ନିରାଧାର କହି ଖଣ୍ଡନ କରିଛନ୍ତି ବିଧାୟକ ଅରବିନ୍ଦ ମହାପାତ୍ର । ତାଙ୍କ ବିରୋଧରେ ଅଣାଯାଇଥିବା ଅଭିଯୋଗର ପ୍ରମାଣ ଦେବାକୁ ସେ ଆହ୍ୱାନ ଦେଇଛନ୍ତି । ଖାଲି ଅଭିଯୋଗ କରିଦେଲେ ହେବ ନାହିଁ । କାହା ସହ କେଉଁଦିନ, କେତେବେଳେ ବସିଥିଲି ତଥ୍ୟ ସହ ପ୍ରମାଣ ଦିଅନ୍ତୁ । ମୁଁ ମାତ୍ର ଦେଢ଼ବର୍ଷର ବିଧାୟକ । କାହାକୁ ସଂଗଠିତ କରିବାର କ୍ଷମତା ମୋର ନାହିଁ । ବାପା ସ୍ୱତନ୍ତ୍ର । ତାଙ୍କୁ ଅଯଥାରେ ବିବାଦ ଭିତରକୁ ଟାଣନ୍ତୁ ନାହିଁ । ସନାତନ ମହାକୁଡ଼ ଜଣେ ବରିଷ୍ଠ ନେତା । ତାଙ୍କ ସହ ବିଧାନସଭାରେ କେବଳ ଦେଖା ହୁଏ । ଲବିରେ ମଧ୍ୟ ମୋର ସାକ୍ଷାତ ହୋଇନାହିଁ ବୋଲି ଅରବିନ୍ଦ କହିଛନ୍ତି ।
ତାଙ୍କ ବିରୋଧରେ ବିଜେଡି ଆଣିଥିବା ଦୁର୍ନୀତି ଓ ବିଶ୍ୱାସଘାତକତାର ଜବାବ ଦେଇ ସେ କହିଛନ୍ତି, ମୋର ଦେଢ଼ବର୍ଷର ବିଧାୟକ କାଳରେ ୩ଟି ଯାକ ବ୍ଲକ୍ ରେ କୌଣସିଠାରେ ଦୁର୍ନୀତି ହୋଇନାହିଁ । ମୋ ପାଖରେ ଅଖଣ୍ଡ କ୍ଷମତା ନାହିଁ ଯେ ମୁଁ ଦୁର୍ନୀତି କରିବି । ମୁଁ ଦୁର୍ନୀତିକୁ ବିରୋଧ କରେ । ମୋ ନାଁରେ ଦୁର୍ନୀତି ଥିଲେ ତାହା ପ୍ରମାଣ କରନ୍ତୁ ।
ସେହିଭଳି ବିଶ୍ୱାସଘାତକତା ଅଭିଯୋଗକୁ ଖଣ୍ଡନ କରିଛନ୍ତି ଅରବିନ୍ଦ । ମୁଁ କାହା ସହ କେମିତି ବିଶ୍ୱାସଘାତକତା କରିଛି ତାହାର ପ୍ରମାଣ ଦିଅନ୍ତୁ । ଗଣତନ୍ତ୍ରରେ ସମସ୍ତଙ୍କ କହିବାର ଅଧିକାର ଅଛି । ମାତ୍ର ଅନ୍ୟକୁ ଦୋଷୀ କଲା ବେଳେ ତାହାର ପ୍ରମାଣ ଦେବାକୁ ପଡ଼ିବ । ନିଲମ୍ବନ ଘଟଣାକୁ ନେଇ ମୁଁ ବ୍ୟସ୍ତ ବିବ୍ରତ ନୁହେଁ । ବର୍ତ୍ତମାନ ମୁଁ ପାଟକୁରାର ବିଧାୟକ । ପାଟକୁରାର ବିକାଶ ମୋର ଦାୟିତ୍ୱ । ସେହି ଦାୟିତ୍ୱକୁ ମୁଁ ପାଳନ କରୁଛି ଏବଂ ଆଗାମୀ ଦିନରେ କାର୍ଯ୍ୟକ୍ରମ ଜାରି ରହିବ ବୋଲି ଅରବିନ୍ଦ କହିଛନ୍ତି ।
