ଭୁବନେଶ୍ୱର: ପୂର୍ବତନ ସାଂସଦ ରବୀନ୍ଦ୍ର ଜେନା ବିଜେଡିରୁ ଇସ୍ତଫା ଦେଲା ପରେ ତାଙ୍କର ବିଧାୟିକା ପତ୍ନୀ ସୁବାସିନୀ ଜେନାଙ୍କ ରାଜ୍ୟସଭା ଭୋଟ ଉପରକୁ ସମସ୍ତଙ୍କ ନଜର ଚାଲିଯାଇଛି । ସ୍ୱାମୀଙ୍କ ପକ୍ଷ ନେଇ ସେ ବିଜେପି ସମର୍ଥିତ ପ୍ରାର୍ଥୀଙ୍କୁ ଭୋଟ ଦେବେ ବୋଲି ଚର୍ଚ୍ଚା ହେଉଥିଲା ବେଳେ ଆଜି ଏହାକୁ ସେ ଖଣ୍ଡନ କରିଛନ୍ତି । ସେ ସଫା ସଫା କହିଛନ୍ତି ଯେ ନବୀନ ବାବୁ ମୋର ନେତା । ମୁଁ ବିଜେଡିର ଜଣେ ଶୃଙ୍ଖଳିତ କର୍ମୀ । ଦଳୀୟ ଶୃଙ୍ଖଳାରେ ବନ୍ଧା । ଦଳ ନିଷ୍ପତ୍ତି ସାଥୀରେ ଅଛି । ଦଳ ମୋତେ ଯାହା ନିର୍ଦ୍ଦେଶ ଦେବ ତାହାକୁ ଅକ୍ଷରେ ଅକ୍ଷରେ ପାଳନ କରିବି ।
ଆପଣ କାହାକୁ ଭୋଟ ଦେବେ ବୋଲି ସାମ୍ବାଦିକମାନେ ତାଙ୍କୁ ପ୍ରଶ୍ନ କରିବାରୁ ଶ୍ରୀମତୀ ଜେନା ସମାନ କଥା କହିଥିଲେ । ମୋତେ ବାରମ୍ବାର ଭୋଟ କଥା କାହିଁକି ପଚାରୁଛନ୍ତି । ରାଜ୍ୟସଭା ନିର୍ବାଚନ ଏମିତି ଗୋଟେ ପ୍ରକ୍ରିୟା, ବାଲେଟ୍ ପେପର୍ ଦେଖାଇବାକୁ ପଡ଼ିବ । ମୁଁ ଜଣେ ଶୃଙ୍ଖଳିତ କର୍ମୀ ଭାବେ ଦଳର ନେତା ଯାହା ନିଦେ୍ର୍ଦଶ ଦେବେ ସେହି କାମ କରିବି । ମୁଁ କାହାକୁ ଭୋଟ ଦେବି ଏବେଠୁ କାହିଁକି କହିବି? ଏକଥା ବାରମ୍ବାର କାହିଁକି ପଚାରୁଛନ୍ତି? ସ୍ୱାମୀଙ୍କ ବିଷୟରେ ସାମ୍ବାଦିକମାନେ ପଚାରିବାରୁ ସେ କହିଥିଲେ, ରବି ଜେନା ବିଜେପିକୁ କାହିଁକି ଗଲେ ରବି ଜେନାଙ୍କୁ ପଚାରିବେ । ଆମେ ସ୍ୱାଧୀନ ଦେଶର ନାଗରିକ । ସମସ୍ତଙ୍କର ସ୍ୱତନ୍ତ୍ର ମତ ରହିଛି । ମୁଁ ବିଜେଡିରେ ଅଛି । ଦଳୀୟ ଶୃଙ୍ଖଳାରେ ବାନ୍ଧି ହୋଇ ଅଛି । ତାଙ୍କୁ ସଂତୃପ୍ତ ମିଶ୍ର ଭେଟ ହୋଇ ଭୋଟ ମାଗିଛନ୍ତି । ଦତ୍ତେଶ୍ୱର ହୋତା ଫୋନ୍ ରେ କଥା ହୋଇଛନ୍ତି । ମାତ୍ର ଦିଲ୍ଲୀପ ରାୟ ତାଙ୍କ ସହ ଯୋଗାଯୋଗ କରିନାହାନ୍ତି ବୋଲି ଶ୍ରୀମତୀ ଜେନା କହିଛନ୍ତି । ସଂଧ୍ୟାରେ ଶ୍ରୀମତୀ ଜେନା ନବୀନ ନିବାସ ଆସି ସଭାପତିଙ୍କୁ ଭେଟିଛନ୍ତି । ଆଲୋଚନା ବେଳେ ମୁଖ୍ୟ ସଚେତକ ପ୍ରମିଳା ମଲ୍ଲିକ ଉପସ୍ଥିତ ଥିଲେ ।
