ନଘାଂ ତଣ୍ଟିଆ ଖାଇଲ କାହିଁକି?

ଭୁବନେଶ୍ୱର: ପୂର୍ବତନ ରାଜ୍ୟପାଳ ତଥା ଝାଡ଼ଖଣ୍ଡୀ ବିଜେପି ନେତା ରଘୁବର ଦାସଙ୍କୁୁ ନେଇ ବିବାଦ ତଥାପି ଥମୁନି । ଓଡ଼ିଶାରୁ ଅପମାନଜନକ ବିଦାୟ ନେଇ ପୁଣି ଥରେ ବିଜେପି ସକ୍ରିୟ ରାଜନୀତିକୁ ଫେରିଥିବା ରଘୁବର ରାଜ୍ୟପାଳ ଲାଟ୍ ସାହେବ ନୁହଁନ୍ତି ବୋଲି ଏକ ମନ୍ତବ୍ୟ ଦେଇଥିଲେ । ତାଙ୍କ କହିବା ମର୍ମ ଥିଲା- ଓଡ଼ିଶାର ରାଜ୍ୟପାଳ ଭାବେ ସେ ଲୋକଙ୍କ ପାଖକୁ ଯାଇ ସେମାନଙ୍କ ଆପତ୍ତି ଅଭିଯୋଗ ଶୁଣୁଥିଲେ । ନିଜକୁ ଲାଟ୍ ସାହେବ ଭାବି ରାଜଭବନରେ ବସୁ ନ ଥିଲେ । ସୁତରାଂ ରାଜ୍ୟପାଳମାନେ ତାଙ୍କ ଭଳି ସକ୍ରିୟ ରହିବା ଉଚିତ୍ ବୋଲି ସେ କହିବାକୁ ଚାହିଁଥିଲେ ।

ରଘୁବରଙ୍କ ଏହି ଲାଟ୍ ସାହେବ ମନ୍ତବ୍ୟକୁ ନେଇ ବିଜେଡି, କଂଗ୍ରେସ ଏବଂ ବାମପନ୍ଥୀ ଦଳର ନେତାମାନେ ତାଙ୍କୁ କଡ଼ା ସମାଲୋଚନା କରିଥିବା ବେଳେ ରାଜ୍ୟ ବିଜେପି ତାଙ୍କର ସୁରକ୍ଷା କବଚ ହୋଇଛି । ତାଙ୍କୁ ଲୋକଙ୍କ ରାଜ୍ୟପାଳ ଭାବେ ଅଭିହିତ କରି ରାଜ୍ୟ ବିଜେପି ନେତାମାନେ ରଘୁବରଙ୍କୁ ମୁଣ୍ଡରେ ବସାଇଛନ୍ତି ।

ରଘୁବରଙ୍କୁ ନେଇ ରାଜନୈତିକ ବୟାନବାଜି ଭିତରେ ବିଜେଡିର ମୁଖପାତ୍ର ତଥା ବରିଷ୍ଠ ବିଧାୟକ ଅରୁଣ ସାହୁ ଆଜି ବିଜେପିକୁ କେତେକ ମୌଳିକ ପ୍ରଶ୍ନ ପଚାରିଛନ୍ତି । ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ ରଘୁବର ରାଜ୍ୟପାଳ ପଦରେ ଥିଲା ବେଳେ ୩ ମାସରେ ୩୦ ଜିଲ୍ଲା ବୁଲି ଲୋକଙ୍କ ସାଙ୍ଗରେ ମିଶିଥିବା କହୁଛନ୍ତି । ତାଙ୍କର ଏଭଳି କାର୍ଯ୍ୟ ଜରିଆରେ ସେ ବିଜେପିର ରାଜନୈତିକ ଏଜେଣ୍ଟ ଭାବେ କାମ କରୁଥିବା ବିଜେଡି ସେତେବେଳେ ଅଭିଯୋଗ କରିଥିଲା । ଖାଲି ସେତିକି ନୁହେଁ, ଝାଡ଼ଖଣ୍ଡ ନିର୍ବାଚନ ବେଳେ ସେ ଓଡ଼ିଶା ରାଜଭବନକୁ ବିଜେପି ପାର୍ଟି ଅଫିସ କରି ଏଠାରୁ ନିର୍ବାଚନ ପରିଚାଳନା କରୁଥିଲେ । ତେଣୁ ବିଜେପି ସେଥିରୁ ଲାଭବାନ ହୋଇଥିବାରୁ ତାଙ୍କୁ ଲୋକପ୍ରିୟ ଏବଂ ଲୋକଙ୍କ ରାଜ୍ୟପାଳ କହିବାରେ ଆଶ୍ଚର୍ଯ୍ୟ ହେବାର ନାହିଁ ।

ମାତ୍ର ଶ୍ରୀ ସାହୁ ରଘୁବରଙ୍କ ପୁଅର ଅପରାଧିକ କାର୍ଯ୍ୟ ମନେ ପକାଇଦେଇଛନ୍ତି । ରାଜଭବନରେ କାର୍ଯ୍ୟରତ ଜଣେ ଓଡ଼ିଆ ଅଧିକାରୀଙ୍କୁ ତତ୍କାଳୀନ ରାଜ୍ୟପାଳ ରଘୁବରଙ୍କ ପୁଅ ନିର୍ଘାତ ମାଡ଼ ମାରିଥିଲେ । ଜୋତାରେ ଛେପ ପକାଇ ଛଟେଇଥିଲେ । ମାତ୍ର କାହାରି ପୁଅ କ୍ରାଇମ୍ କଲେ ଦଣ୍ଡ ମିଳେନି? ରାଜ୍ୟପାଳ ନା ଲାଟ୍ ସାହେବଙ୍କ ପୁଅ? ରାଜ୍ୟର ବିଜେପି ନେତାମାନଙ୍କଠାରୁ ସେ ଏହାର ଉତ୍ତର ଚାହିଁଛନ୍ତି ।

ରଘୁବର ରାଜ୍ୟପାଳ ଭାବେ ଲୋକଙ୍କ ସାଥୀରେ ମିଶି ଆପତ୍ତି ଅଭିଯୋଗ ଆଣିଥିଲେ । ତେବେ ସେ ଲୋକଙ୍କଠାରୁ ଆପତ୍ତି ଅଭିଯୋଗ ଆଣିବାକୁ ଯାଉଥିଲେ ନା ବିଜେପିର ସ୍ଥିତି ଜାଣିବାକୁ ଯାଉଥିଲେ ନା ବିଜେଡିକୁ ବଦନାମ କରିବାକୁ ଯାଉଥିଲେ? ଲୋକଙ୍କର ରାଜ୍ୟପାଳଙ୍କୁ କେତୋଟି ଆପତ୍ତି ଅଭିଯୋଗ ବର୍ତ୍ତମାନର ବିଜେପି ସରକାର ସମାଧାନ କଲେଣି ଶ୍ରୀ ସାହୁ ତାହାର ଜବାବ ମାଗିଛନ୍ତି ।

ରାଜ୍ୟପାଳ ଭାବେ ରଘୁବରଙ୍କ ଲୋକପ୍ରିୟତା କେତେ ତାହା ଓଡ଼ିଶାବାସୀ ଜାଣିଛନ୍ତି । ଧରାଧରି କଲେ ବି ୩୦ ପ୍ରତିଶତ ମାର୍କ ପାଇବା କଷ୍ଟ । ସେ ଏଠି କ’ଣ କରୁଥିଲେ ସମସ୍ତେ ଜାଣନ୍ତି । ତାଙ୍କ ପାଟିରୁ ଲାଟ୍ ସାହେବ ମନ୍ତବ୍ୟ ଶୋଭା ପାଉନି । ଯଦି ଏତେ କାମିକା ଥିଲେ, ତେବେ ତାଙ୍କୁ ନଘାଂ ତଣ୍ଟିଆ ଦେଇ କାହିଁକି ବିଦାୟ କରାଗଲା, ବିଜେପି ବାଲା ସ୍ପଷ୍ଟ କରନ୍ତୁ ।

ରାଜ୍ୟପାଳ ରଘୁବରଙ୍କ ପୁଅ ଓଡ଼ିଆ ଅଧିକାରୀଙ୍କୁ ମାଡ଼ ମାରି ଅପରାଧ କରିଥିଲେ ବି ରାଜ୍ୟ ସରକାର ତାଙ୍କ ଦେହରେ ହାତ ମାରିଲେନି । ଓଡ଼ିଆ ଅସ୍ମିତାକୁ ଜଳାଞ୍ଜଳି ଦେଇଦେଲେ । ଏବେ ରଘୁବର ରାଜ୍ୟପାଳ ନାହାନ୍ତି । ତାଙ୍କ ପୁଅ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ରାଜ୍ୟ ସରକାର ଓଡ଼ିଆ ଅସ୍ମିତାକୁ ଫେରାଇ ଆଣିବେ କି?

ଯେଉଁଠି ଅଣ ବିଜେପି ସରକାର ଅଛନ୍ତି, ସେଠି ରାଜ୍ୟପାଳଙ୍କ ଭୂମିକା କ’ଣ? କେଉଁ କେଉଁ ରାଜ୍ୟରେ ରାଜ୍ୟପାଳ ଲାଟ୍ ସାହେବ ହୋଇଛନ୍ତି ବିଜେପିଠାରୁ ତାହାର ଉତ୍ତର ମାଗିଛନ୍ତି ବିଜେଡି ମୁଖପାତ୍ର ଶ୍ରୀ ସାହୁ ।