ଡିଏଭି ପୋଖରୀପୁଟରେ ବାର୍ଷିକ ପ୍ରଦର୍ଶନୀ(ଟେକ୍ଟୋପିଆ) ଅନୁଷ୍ଠିତ

ଭୁବନେଶ୍ୱର: ଶିଶୁମାନଙ୍କ ଅନ୍ତର୍ନିହିତ ପ୍ରତିଭାର ବିକାଶ ନିମନ୍ତେ ଡିଏଭି ପୋଖରୀପୁଟରେ ପ୍ରତିବର୍ଷପରି ଚଳିତ ବର୍ଷ ବାର୍ଷିକ ପ୍ରଦର୍ଶନୀ ଟେକ୍ଟୋପିଆ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟର ପଦାର୍ଥବିଜ୍ଞାନ ଓ ପ୍ରଯୁକ୍ତିବିଦ୍ୟା ନିର୍ଦ୍ଦେଶକ ପ୍ରଫେସର ପ୍ରଶାାନ୍ତ କୁମାର ପାଣିଗ୍ରାହୀ ମୁଖ୍ୟ ଅତିଥି ରୂପେ ଯୋଗଦାନ କରି ପ୍ରଦର୍ଶନୀର ଶୁଭ ଉଦ୍ଘାଟନ କରିଥିଲେ । ପ୍ରତିକୂଳ ପରିସ୍ଥିତି ଓ ସଂଘଂର୍ଷମୟ ଜୀବନ ଦେଇ ଗତି କରିଥିବା ମଣିଷ ସଫଳତା ଲାଭ କରିଥାଏ । ଗଭୀର ନିଷ୍ଠା, ପ୍ରଚେଷ୍ଟା ଓ ଗବେଷଣା ମାଧ୍ୟମରେ ଦେଶ ପାଇଁ ଗୌରବ ଆଣିବାକୁ ସେ ବିଦ୍ୟାର୍ଥୀମାନଙ୍କୁ ପରାମର୍ଶ ଦେଇଥିଲେ । ଏହା ବ୍ୟତୀତ ପ୍ରଦର୍ଶନୀ ମାଧ୍ୟମରେ ବିଦ୍ୟାର୍ଥୀମାନଙ୍କ ଅନ୍ତର୍ନିହିତ ଗୁଣବତ୍ତାର ପରିପ୍ରକାଶ ହୋଇପାରିବ ବୋଲି ସେ କହିଥିଲେ ।

ଗଣିତ, ବିଜ୍ଞାନ, ଇଂରାଜୀ, ଓଡ଼ିଆ, ହିନ୍ଦୀ, ସାମାଜିକ ବିଜ୍ଞାନ ଆଦି ବିଭିନ୍ନ ବିଭାଗରେ ପ୍ରାୟ ଚାରିଶହ ପ୍ରତିଭା ସମ୍ପନ୍ନ ଛାତ୍ରଛାତ୍ରୀ ସେମାନଙ୍କ ଯାଦୁକରୀ ସ୍ପର୍ଶରେ ପ୍ରକଳ୍ପ ଗୁଡିକ ଉପସ୍ଥାପନ କରିଥିଲେ । ଅରଣ୍ୟ ରହସ୍ୟ, ରାମାୟଣରେ ପ୍ରଭୁ ଶ୍ରୀରାମଙ୍କ ସହିତ ବନର ସମ୍ପର୍କ, ଗଣିତରେ ଜଙ୍ଗଲ, ଗଛର ବୟସ, ଜଙ୍ଗଲ ଓ ଜନଜାତି , ଭୂକମ୍ପନର ପ୍ରାକ୍ସୂଚନା ଯନ୍ତ୍ର, ଏଲିପ୍ସର ପ୍ରତିଫଳନ ଆଦି ପିଲାମାନଙ୍କ ଦ୍ୱାରା ପ୍ରଦର୍ଶିତ ଚିତ୍ତାକର୍ଷକ ପ୍ରକଳ୍ପଗୁଡ଼ିକ ଦର୍ଶକମାନଙ୍କୁ ବିମୋହିତ କରିଥିଲା ।

ବିଦ୍ୟାଳୟ ପରିଚାଳନା ସମିତିର ଚେୟାରମ୍ୟାନ୍‌ ଅରୁଣ କୁମାର ରଥ ସ୍ୱାଗତ ପରିଚୟ ପ୍ରଦାନ ପୂର୍ବକ ବିପର୍ଯ୍ୟୟ ସମୟରେ ବିଜ୍ଞାନ ଓ ପ୍ରଯୁକ୍ତି ବିଦ୍ୟାର ଭୂମିକା ସମ୍ପର୍କରେ ଆଲୋକପାତ କରିଥିଲେ । ପରିଶେଷରେ ବିଦ୍ୟାଳୟର ଅଧ୍ୟକ୍ଷ, ମୁଖ୍ୟ ଅତିଥି ଓ ବିଦ୍ୟାଳୟ ପରିଚାଳନା ସମିତି ଚେୟାର୍ମ୍ୟାନଙ୍କ ପ୍ରେରଣାଦାୟୀ ମାର୍ଗଦର୍ଶନ ପାଇଁ କୃତଜ୍ଞତା ଜ୍ଞାପନ କରିବା ସହ ଛାତ୍ରଛାତ୍ରୀଙ୍କର ଏତାଦୃଶ ଅଭିନବ ପ୍ରକଳ୍ପ ଅନ୍ୟମାନଙ୍କ ପାଇଁ ପ୍ରେରଣାର ଉତ୍ସ ହେବ ବୋଲି କହିଥିଲେ ।

ବିଦ୍ୟାଳୟର ବିଜ୍ଞାନ ବିଭାଗର ସଂଯୋଜକ ସୁଶାନ୍ତ କୁମାର ସାମଲଙ୍କ ସଂଯୋଜନାରେ ଉକ୍ତ କାର୍ଯ୍ୟକ୍ରମ ପରିଚାଳିତ ହୋଇଥିଲା । ବିଦ୍ୟାର୍ଥୀ, ଅଭିଭାବକ ଓ ଶିକ୍ଷକ ଶିକ୍ଷୟିତ୍ରୀମାନେ ପ୍ରଦର୍ଶିତ ପ୍ରକଳ୍ପଗୁଡ଼ିକୁ ଦେଖି ଭୂୟସୀ ପ୍ରଂଶସା କରିଥିଲେ ।