ଭୁବନେଶ୍ୱର: ନିଟ୍-ୟୁଜି ୨୦୨୬ ପରୀକ୍ଷାରେ ହୋଇଥିବା ଅନିୟମିତତାକୁ ନେଇ ଆନ୍ଦୋଳନ କରୁଥିବା ଛାତ୍ରଛାତ୍ରୀଙ୍କ ଉପରେ ପୋଲିସ୍ ର ବର୍ବରତାକୁ କଡ଼ା ଭାଷାରେ ନିନ୍ଦା କରିବା ସହ ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ପ୍ରତି ପୋଲିସ୍ ର ଏଭଳି ଅମାନୁଷିକ ଆକ୍ରମଣ ଦୁର୍ଭାଗ୍ୟଜନକ କହିଛି ବିଜୁ ଜନତା ଦଳ ।
ଦଳର ଉପସଭାପତି ତଥା ବରିଷ୍ଠ ଗଣମାଧ୍ୟମ ସଂଯୋଜକ ପ୍ରତାପ ଜେନା ଏକ ପ୍ରେସ ବିବୃତ୍ତିରେ କହିଛନ୍ତି ଯେ, ନିଟ୍-ୟୁଜି ୨୦୨୬ ପରୀକ୍ଷା ପ୍ରଶ୍ନପତ୍ର ଲିକ୍, ବିଭିନ୍ନ ଅନିୟମିତତା ଏବଂ ପ୍ରଶାସନିକ ବିଫଳତା ଯୋଗୁଁ ପ୍ରାୟ ୪୦ ଲକ୍ଷ ଛାତ୍ରଛାତ୍ରୀ ଏବଂ ସେମାନଙ୍କ ପରିବାର ଗଭୀର ଚିନ୍ତା ଓ ଅନିଶ୍ଚିତତାରେ ରହିଛନ୍ତି । ପରୀକ୍ଷାର୍ଥୀଙ୍କ ଦାବିକୁ ସମାଧାନ କରି ସେମାନଙ୍କୁ ନ୍ୟାୟ ପ୍ରଦାନ କରିବା ପରିବର୍ତ୍ତେ ସରକାର ଶାନ୍ତିପୂର୍ଣ୍ଣ ପ୍ରତିବାଦକାରୀଙ୍କ ଉପରେ ପୋଲିସ୍ ବଳ ପ୍ରୟୋଗ କରି ଦମନର ପଥ ଆପଣାଇଛନ୍ତି । ଏକ ସ୍ୱଚ୍ଛ ପରୀକ୍ଷା ବ୍ୟବସ୍ଥା ଦାବି କରିବା ପ୍ରତ୍ୟେକ ଛାତ୍ରଛାତ୍ରୀଙ୍କର ମୌଳିକ ଅଧିକାର । ଭବିଷ୍ୟତ ଡାକ୍ତରଙ୍କ ପ୍ରତି ଏଭଳି ଅତ୍ୟାଚାର କରି ଭାରତର ଗାରିମାକୁ ସାରା ବିଶ୍ୱରେ ନିନ୍ଦିତ କରିଛନ୍ତି ସରକାର ।
ଶ୍ରୀ ଜେନା ଆହୁରି କହିଛନ୍ତି , ପୋଲିସ୍ ର ବର୍ବରୋଚିତ ଆକ୍ରମଣରେ ଅନେକ ଛାତ୍ରଛାତ୍ରୀ ଆହତ ହୋଇଛନ୍ତି । ଭାରତର ଯୁବପିଢ଼ିଙ୍କ ସ୍ୱପ୍ନକୁ ଅନ୍ୟାୟ କିମ୍ୱା ପୋଲିସ୍ ର ବର୍ବରତା ଦ୍ୱାରା ଚାପି ଦିଆଯାଇପାରିବ ନାହିଁ । ପ୍ରଶାସନିକ ବିଫଳତା କାରଣରୁ ପ୍ରାୟ ୪୦ ଲକ୍ଷ ନିଟ୍ ପରୀକ୍ଷାର୍ଥୀଙ୍କ ଭବିଷ୍ୟତ ଏବେ ଅନ୍ଧାରରେ । ଧମକ ଓ ଦମନର ପଥ ଆପଣାଇବା ପରିବର୍ତ୍ତେ ସରକାର ନିରପେକ୍ଷ ଓ ସ୍ୱଚ୍ଛତାର ସହ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ । ନିଟ୍-ୟୁଜି ୨୦୨୬ରେ ପ୍ରଭାବିତ ସମସ୍ତ ପରୀକ୍ଷାର୍ଥୀଙ୍କ ପ୍ରତି ନିଜର ଦୃଢ଼ ସମର୍ଥନ ବ୍ୟକ୍ତ କରିବା ସହ ସେମାନଙ୍କୁ ତୁରନ୍ତ ନ୍ୟାୟ ପ୍ରଦାନ ପାଇଁ ବିଜୁ ଜନତା ଦଳ ଲଢ଼େଇ ଜାରି ରଖିବ । ଦଳ କେନ୍ଦ୍ର ସରକାରଙ୍କୁ ଆହ୍ୱାନ କରୁଛି ଯେ, ପରୀକ୍ଷା ଅନିୟମିତତା ପାଇଁ ଦାୟୀ ସମସ୍ତ ବ୍ୟକ୍ତିଙ୍କୁ ଚିହ୍ନଟ କରି ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯାଉ ଏବଂ କୌଣସି ଯୋଗ୍ୟ ଛାତ୍ରଛାତ୍ରୀଙ୍କ ଶିକ୍ଷାଗତ ଭବିଷ୍ୟତ ଯେପରି ବ୍ୟବସ୍ଥାଗତ ବିଫଳତା ଯୋଗୁଁ କ୍ଷତିଗ୍ରସ୍ତ ନ ହୁଏ ତାହା ସୁନିଶ୍ଚିତ କରାଯାଉ । ଛାତ୍ରଛାତ୍ରୀଙ୍କ ସଂଗ୍ରାମରେ ବିଜୁ ଜନତା ଦଳ ସବୁବେଳେ ସେମାନଙ୍କ ସହ ରହିଛି । ଛାତ୍ରଛାତ୍ରୀଙ୍କୁ ଧମକ ଦେବା ଏବଂ ସେମାନଙ୍କ ଉପରେ ବଳ ପ୍ରୟୋଗ କରିବା ପରିବର୍ତ୍ତେ ସରକାର ଆଲୋଚନା ଓ ଦୃଢ଼ ପଦକ୍ଷେପ ମାଧ୍ୟମରେ ଏହି ସଙ୍କଟର ସମାଧାନ କରନ୍ତୁ ।
