ଭୁବନେଶ୍ୱର: ନରେନ୍ଦ୍ର ମୋଦୀ ସରକାରଙ୍କୁ ବିଜେଡିର ଖୋଲା ସମର୍ଥନ । ମଣିପୁର ହିଂସା ଘଟଣାରେ ମିଳିତ ବିରୋଧୀ ଦଳ ଦ୍ୱାରା ଅଣାଯାଇଥିବା ଅନାସ୍ଥା ପ୍ରସ୍ତାବ ବିରୋଧରେ ଦଳ ଭୋଟ ଦେବ । ସେହିଭଳି ସଂସଦରେ ଦିଲ୍ଲୀ ସର୍ଭିସେସ୍ ବିଲ୍ କୁ ମଧ୍ୟ ସମର୍ଥନ କରିବ । ଜାତୀୟ ରାଜନୀତିରେ ସମ୍ପ୍ରତ୍ତିତ ବହୁ ଚର୍ଚ୍ଚିତ ଏହି ଦୁଇ ପ୍ରସଙ୍ଗରେ ବିଜେଡି ତା’ର ଆଭିମୁଖ୍ୟ ଆଜି ସ୍ପଷ୍ଟ କରିଛି ।
ଦଳର ଜାତୀୟ ମୁଖପାତ୍ର ତଥା ସାଂସଦ ଡ. ସସ୍ମିତ ପାତ୍ର ଜାତୀୟ ସମ୍ବାଦ ସରବରାହ ସଂସ୍ଥା ପିଟିଆଇକୁ ବିଜେଡିର ଏହି ନିଷ୍ପତ୍ତି ଜଣାଇଛନ୍ତି । ଏନଡିଏ ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଏବଂ ଦିଲ୍ଲୀ ସର୍ଭିସେସ୍ ବିଲ୍ ଆଲୋଚନା ଦିନ ଉଭୟ ଲୋକସଭା ଓ ରାଜ୍ୟସଭାରେ ବିଜେଡିର ସମସ୍ତ ସଦସ୍ୟ ଉପସ୍ଥିତ ରହିବାକୁ ହ୍ୱିପ୍ ଜାରି କରାଯାଇଥିବା ସେ କହିଛନ୍ତି ।
ମଣିପୁର ହିଂସା ଘଟଣାରେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ବିଫଳତାକୁ ଟାର୍ଗେଟ୍ କରିଛନ୍ତି ୨୬ ଟି ବିରୋଧୀ ଦଳକୁ ନେଇ ଗଠି ଇ-ଣ୍ଡି-ଆ ମେଣ୍ଟ । ସଂସଦରେ ପ୍ରଧାନମନ୍ତ୍ରୀ ମୋଦୀଙ୍କ ବିବୃତି ଦାବିରେ ସେମାନେ ଅଟଳ ଥିବାରୁ ଗୃହକାର୍ଯ୍ୟ ଚାଲି ପାରୁନାହିଁ । ମୋଦୀ ସରକାରଙ୍କ ବିରୋଧରେ ସେମାନେ ଆଣିଥିବା ଅନାସ୍ଥା ପ୍ରସ୍ତାବକୁ ବାଚସ୍ପତି ଆଲୋଚନା ପାଇଁ ଗ୍ରହଣ କରିଛନ୍ତି । ଏହି ପ୍ରସଙ୍ଗରେ ବିଜେଡିର ଭୂମିକା କ’ଣ ହେବ ତାହାକୁ ସମସ୍ତେ ଅପେକ୍ଷା କରିଥିଲେ । କାରଣ ବିଜେପି ଓ କଂଗ୍ରେସଠାରୁ ବିଜେଡି ସମଦୂରତା କଥା କହି ଆସୁଛି । ଅବଶ୍ୟ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଏନଡିଏ ସରକାରଙ୍କ ନିଷ୍ପତ୍ତି କୁ ବିଜେଡି ସମର୍ଥନ ଦେବା ନୂଆ କଥା ନୁହେଁ ।
ସୂଚନାଥାଉକି, ନରେନ୍ଦ୍ର ମୋଦୀ ସରକାରଙ୍କୁ ସମର୍ଥନ କରି ଅନାସ୍ଥା ପ୍ରସ୍ତାବ ବିରୋଧରେ ଭୋଟ ଦେବାକୁ ଜଗନ ରେଡ୍ଡୀଙ୍କ ୱାଇଏସଆର କଂଗ୍ରେସ ପୂର୍ବରୁ ନିଷ୍ପତ୍ତି ନେଇସାରିଛି । ଦିଲ୍ଲୀ ସର୍ଭିସେସ୍ ବିଲ୍ କୁ ମଧ୍ୟ ଦଳ ସମର୍ଥନ କରିବ । ଲୋକସଭାରେ ୱାଇଏସଆର କଂଗ୍ରେସର ୨୨ ଜଣ ସାଂସଦ ଥିବା ବେଳେ ରାଜ୍ୟସଭାରେ ୯ ଜଣ ସାଂସଦ ଅଛନ୍ତି ।
