ଭୁବନେଶ୍ୱର: ସଞ୍ଜୟ ଦାସ ବର୍ମାଙ୍କୁ ବିଜେଡିରେ ପୁଣି ଗୁରୁତ୍ୱ ମିଳିଛି । ଦୀର୍ଘ ଦିନ ଧରି ଦଳରେ ଅଦୃଶ୍ୟ ହୋଇଯାଇଥିବା ଏହି ବରିଷ୍ଠ ନେତାଙ୍କୁ ଭଦ୍ରକ ଜିଲ୍ଲାର ପର୍ଯ୍ୟବେକ୍ଷକ ଭାବେ ନିଯୁକ୍ତି ମିଳିଛି । ଦଳ ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ଏହି ଗୁରୁ ଦାୟିତ୍ୱ ଦେଇଛନ୍ତି । ଭଦ୍ରକ ଜିଲ୍ଲା ଦାୟିତ୍ୱରେ ପୂର୍ବରୁ ଥିବା ବିଧାୟକ ପ୍ରତାପ ଜେନାଙ୍କୁ କେନ୍ଦ୍ରାପଡ଼ା ଜିଲ୍ଲାର ପର୍ଯ୍ୟବେକ୍ଷକ ନିଯୁକ୍ତି କରାଯାଇଛି । ମାହାଙ୍ଗା ଡବଲ ମର୍ଡର ମାମଲାରେ ଜଣେ ଅଭିଯୁକ୍ତ ଭାବେ ଆଇନଜାଲରେ ଛନ୍ଦି ହୋଇଥିବା ପ୍ରତାପଙ୍କ ଉପରେ ନବୀନଙ୍କ ଆସ୍ଥା ଅତୁଟ ରହିଥିବା ଏହା ସ୍ପଷ୍ଟ କରିଛି ।
ସାଧାରଣ ନିର୍ବାଚନ ଆଉ ମାତ୍ର ୬ ମାସରୁ କମ୍ ସମୟ ଥିବା ବେଳେ ସଞ୍ଜୟ ଦାସବର୍ମାଙ୍କୁ ଦଳର ମୁଖ୍ୟସ୍ରୋତକୁ ଫେରାଇ ଆଣିବାର ନିଷ୍ପତ୍ତି ବିଜେଡି ରାଜନୀତିରେ ଯଥେଷ୍ଟ ଗୁରୁତ୍ୱ ବହନ କରୁଛି । ଏକଦା ବିଜେଡିର ହାତଗଣତି ଶକ୍ତିଶାଳୀ ନେତାଙ୍କ ମଧ୍ୟରେ ସଞ୍ଜୟଙ୍କୁ ଗଣାଯାଉଥିଲା । ତାଙ୍କର ସାଂଗଠନିକ ଦକ୍ଷତା ଉପରେ କାହାରି ତିଳେମାତ୍ର ସନ୍ଦେହ ନ ଥିଲା । ଗତ ସାଧାରଣ ନିର୍ବାଚନରେ ବ୍ରହ୍ମଗିରିରୁ ସେ ପରାଜିତ ହୋଇଥିଲେ ମଧ୍ୟ ମୁଖ୍ୟମନ୍ତ୍ରୀ ତାଙ୍କର ଗୁରୁତ୍ୱ କମାଇ ନ ଥିଲେ । ରାଜ୍ୟ ଯୋଜନା ବୋର୍ଡର ଉପାଧ୍ୟକ୍ଷ ଭାବେ ତାଙ୍କୁ ନିଯୁକ୍ତି ଦେଇଥିଲେ । ଦଳୀୟ ସାଧାରଣ ସମ୍ପାଦକ ପଦବୀରେ ତାଙ୍କୁ ମୁଖ୍ୟ କାର୍ଯ୍ୟାଳୟର ଦାୟିତ୍ୱ ମଧ୍ୟ ଦିଆଯାଇଥିଲା ।
ତେବେ ପରବର୍ତ୍ତୀ ସମୟରେ ମୁଖ୍ୟମନ୍ତ୍ରୀ ତାଙ୍କ ହାତରୁ ଯୋଜନା ବୋର୍ଡ ଉପାଧ୍ୟକ୍ଷ ପଦବୀ କାଢ଼ି ନେଇଥିଲେ । ପରବର୍ତ୍ତୀ ସମୟରେ ସାଧାରଣ ସମ୍ପାଦକ ପଦବୀରେ ଥାଇ ମଧ୍ୟ ଦଳୀୟ କାର୍ଯ୍ୟକ୍ରମରେ ତାଙ୍କର ଗୁରୁତ୍ୱ ଦେଖିବାକୁ ମିଳିଲାନି । ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱ ମଧ୍ୟ ମିଳିଲାନି । ଦଳୀୟ ନେତୃତ୍ୱ ଏବଂ ସଞ୍ଜୟଙ୍କ ମଧ୍ୟରେ ତୁ ତୁ ମେଁ ମେଁ ସମ୍ପର୍କ ଥିବା ଚର୍ଚ୍ଚା ହେଲା । ଏହି ଚର୍ଚ୍ଚାକୁ ଦାନା ଦେଇଥିଲା ଗତବର୍ଷର ବିଜେଡି ଜନ ସମ୍ପର୍କ ପଦଯାତ୍ରାରେ ନିଜ ନିର୍ବାଚନମଣ୍ଡଳୀ ବ୍ରହ୍ମଗିରିରେ ସଞ୍ଜୟଙ୍କ ତତଲା ଭାଷଣ । ପରୋକ୍ଷରେ ସେ ରାଜ୍ୟର ଶାସନକଳକୁ ଟାର୍ଗେଟ୍ କରିଥିଲେ । ଆଗାମୀ ଦିନରେ ଏହାର ଜବାବ ଦିଆଯିବ ବୋଲି ଚାଲେଂଜ ବି ଦେଇଥିଲେ ।
ଏହାପରଠାରୁ ବିଜେଡିରେ ସେ ଅଛୁଆଁ ହୋଇଯାଇଥିଲେ । ଖୁବ୍ ଶୀଘ୍ର ବିଜେପିରେ ଯୋଗଦେବା ନେଇ କିଛି ଗଣମାଧ୍ୟମ ତାଙ୍କ ନାଁରେ ଚର୍ଚ୍ଚା କରିଥିଲେ । ବିଜେଡିରେ ଏକ ଗୋଷ୍ଠୀ ସଞ୍ଜୟଙ୍କ ସାଥୀରେ ବିଜେପିକୁ ପଳାଇବେ ବୋଲି ମଧ୍ୟ ଚର୍ଚ୍ଚା ହେଲା । ସଞ୍ଜୟଙ୍କ ନିରବତା ଏହି ଚର୍ଚ୍ଚାକୁ ଆହୁରି ଖୋରାକ୍ ଦେଇଥିଲା । ତେବେ ମଝିରେ ମଝିରେ ବିଜେଡି ନେତୃବୃନ୍ଦଙ୍କ ସହ ତାଙ୍କର ବୁଝାମଣା ଖବର ବି ଆସିଥିଲା । ଏବେ ସେ ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱ ସହ ବିଜେଡି ସଂଗଠନ ଗୁରୁଦାୟିତ୍ୱକୁ ଫେରି ଆସିଛନ୍ତି । ଭଦ୍ରକ ଜିଲ୍ଲା ଭଳି ବିଜେଡି ପାଇଁ ଏକ ଚାଲେଜିଂ ଜିଲ୍ଲାର ଦାୟିତ୍ୱ ତାଙ୍କ ଉପରେ ଛଡ଼ାଯାଇଛି ।
ସଞ୍ଜୟ ନୂଆ ଦାୟିତ୍ୱ ପାଇଲା ପରେ ମୁଖ୍ୟମନ୍ତ୍ରୀଙ୍କୁ ଗଭୀର କୃତଜ୍ଞତା ଜଣାଇଛନ୍ତି । ସେ କହିଛନ୍ତି, ମାନ୍ୟବର ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକ ମତେ ଯେତେବେଳେ ଯେଉଁ ଦାୟିତ୍ୱ ଦେଇଛନ୍ତି, ମୁଁ ତାକୁ ନିଷ୍ଠାର ଓ ଆନ୍ତରିକତାର ସହ ନିର୍ବାହ କରିଛି । ଏବେ ଯେଉଁ ଦାୟିତ୍ୱ ମିଳିଛି, ତାକୁ ପୂର୍ବ ଭଳି ମୋର ସାଧ୍ୟମତେ ନିର୍ବାହ କରିବି । ମୋ ଉପରେ ଭରସା, ବିଶ୍ୱାସ ଓ ଆସ୍ଥା ପ୍ରକଟ କରିଥିବାରୁ ମୁଁ କୃତଜ୍ଞତା ଜଣାଉଛି ।
ଅନ୍ୟତମ ବରିଷ୍ଠ ନେତା ବିଧାୟକ ପ୍ରତାପ ଜେନାଙ୍କ କ୍ଷେତ୍ରରେ ଦଳର ସଭାପତିଙ୍କ ଆସ୍ଥା ଅତୁଟ ଥିବା ଦେଖିବାକୁ ମିଳିଛି । ୨୦୨୧ ମସିହାରେ ବହୁ ଚର୍ଚ୍ଚିତ ମାହାଙ୍ଗା ଡବଲ ମର୍ଡର କେସ୍ ରେ ତାଙ୍କ ନାଁ ଆସିବା ପରେ ସେ ବିବାଦୀୟ ହୋଇପଡ଼ିଥିଲେ । ସେତେବେଳେ ସେ ମନ୍ତ୍ରୀ ଥିଲେ । ତେବେ ବର୍ଷେ ପରେ ମନ୍ତ୍ରୀମଣ୍ଡଳ ସମ୍ପ୍ରସାରଣ ବେଳେ ମୁଖ୍ୟମନ୍ତ୍ରୀ ତାଙ୍କୁ ବିଦା କରିଥିଲେ ମଧ୍ୟ ସାଂଗଠନିକ ଦାୟିତ୍ୱରୁ ହଟାଇ ନ ଥିଲେ । ତାଙ୍କୁ ଭଦ୍ରକ ଜିଲ୍ଲାର ପର୍ଯ୍ୟବେକ୍ଷକ ଦାୟିତ୍ୱ ଦିଆଯାଇଥିଲା ।
ନିକଟରେ ଡବଲ୍ ମର୍ଡର କେସ୍ ରେ ସାଲେପୁର ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ୍(ଜେଏମଏଫସି) ଅଦାଲତ ତାଙ୍କୁ ସମନ ଜାରି କରିବା ପରେ ସେ ଅଧିକ ଚର୍ଚ୍ଚାକୁ ଆସିଥିଲେ । ଏହି ମାମଲାରେ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଏବେ ସାମାନ୍ୟ ଆଶ୍ୱସ୍ତି ପାଇଛନ୍ତି । ସୁତରାଂ ଜଣେ ହତ୍ୟା ଅଭିଯୁକ୍ତ ଭାବେ ଆଇନଜାଲରେ ଫସିଥିଲେ ମଧ୍ୟ ଦଳୀୟ ଦୃଷ୍ଟିକୋଣରୁ ମୁଖ୍ୟମନ୍ତ୍ରୀ ତାଙ୍କ ଉପରୁ ଆସ୍ଥା ହରାଇ ନାହାନ୍ତି ।
ସୂଚନାଥାଉକି, କେନ୍ଦ୍ରାପଡ଼ା ଜିଲ୍ଲାର ପର୍ଯ୍ୟବେକ୍ଷକ ଥିଲେ ଶ୍ରୀମତୀ ପ୍ରମିଳା ମଲ୍ଲିକ । ସେ ବାଚସ୍ପତି ହେବା ପରେ ଜିଲ୍ଲା ପର୍ଯ୍ୟବେକ୍ଷକ ପଦ ଖାଲି ଥିଲା ।
