ଭୁବନେଶ୍ୱର: ବୌଦ୍ଧ ଜିଲ୍ଲାର ଜଣେ ପୁଲିସ କନେଷ୍ଟବଳଙ୍କ ପାଖରୁ ନଗଦ ୬ ଲକ୍ଷ ଟଙ୍କା ଜବତ କରିଛି ଭିଜିଲାନସ୍ ବିଭାଗ । ଏହି ଟଙ୍କା ସେ କେଉଁଠୁ ଆଣିଲେ ପ୍ରଶ୍ନରେ ତାଙ୍କ ପାଟି ଖନି ମାରିଯାଇଛି । ଗଞ୍ଚେଇ ଚାଷୀ ଓ ବେପାରୀଙ୍କଠାରୁ ବଟି ଆକାରରେ ଏହି ଟଙ୍କା ସେ ଆଦାୟ କରିଥିବା ସନ୍ଦେହ କରାଯାଉଛି ।
ଏହି କନେଷ୍ଟବଳ ହେଉଛନ୍ତି ହରୀଶ ଚନ୍ଦ୍ର ସାହୁ । ବୌଦ୍ଧ ଜିଲ୍ଲାରେ ଡିଭିଏଫ(ଡିଷ୍ଟ୍ରିକ୍ଟ ଭଲୁଣ୍ଟାରୀ ଫୋର୍ସ) ରେ କାମ କରୁଛନ୍ତି । ଡିଭିଏଫ ସ୍କ୍ୱାଡ୍ ରେ ନିୟୋଜିତ କନେଷ୍ଟବଳ ହରୀଶ ସେଠାକାର ଗଞ୍ଜେଇ ଚାଷୀ, ବେପାରୀ ଓ ଚାଲାଣକାରୀଙ୍କଠାରୁ ମୋଟା ରକମ ବଟି ନେଇ ଗଞ୍ଜେଇ ବେପାରକୁ ସୁଗମ କରୁଥିବାର ଅଭିଯୋଗ ଭିଜିଲାନସ୍ ପାଖକୁ ଆସିଥିଲା । ସେବେଠାରୁ ଭିଜିଲାନସ୍ ର ଏକ ଟିମ୍ ତାଙ୍କ ଉପରେ ନଜର ରଖିଥିଲେ ।
ମାତ୍ର ଆଜି ହରୀଶଙ୍କ ଭାଗ୍ୟ ଖରାପ ପଡ଼ିଗଲା । ବୌଦ୍ଧ ଥାନା ଅନ୍ତର୍ଗତ ବାଘିଆପଡ଼ା ନିକଟରେ ତାଙ୍କୁ ସନେ୍ଦହଜନକ ଅବସ୍ଥାରେ ଭିଜିଲାନସ୍ ର ଏହି ଟିମ୍ ଧରିପକାଇଥିଲେ । ସର୍ଚ୍ଚ ବେଳେ ତାଙ୍କ ପାଖରୁ ନଗଦ ୬ ଲକ୍ଷ ଟଙ୍କା ମିଳିଥିଲା । ଏହି ଟଙ୍କା କେଉଁଠୁ ଆଣିଛନ୍ତି ତାଙ୍କ ପାଖରେ ଉତ୍ତର ନ ଥିଲା । ଭିଜିଲାନସ୍ ଟିମ୍ ଏହି ଟଙ୍କାକୁ ଜବତ କରିବା ସହ ତାଙ୍କର ଅନ୍ୟ ତିନୋଟି ଜାଗା ଉପରେ ଚଢ଼ଉ କରିଛି । ତାଙ୍କୁ ଅଧିକ ପଚରାଉଚୁରା ଜାରି ରହିଛି ।
ମିଳିଥିବା ସୂଚନା ଅନୁଯାୟୀ, ସଂପୃକ୍ତ କନେଷ୍ଟବଳ ହରିଶ ସାହୁ କୁଆଡ଼େ ଜଣେ ପେଶାଦାର ଲାଞ୍ଚୁଆ । ଏକଦା ପୂର୍ବତନ ଏସପିଙ୍କ ନାଁରେ ଟଙ୍କା ଆଦାୟ କରି ସେ ଧରାପଡ଼ିବା ପରେ ଚାକିରିରୁ ସସପେଣ୍ଡ ହୋଇଥିଲେ । ପରବର୍ତ୍ତୀ ସମୟରେ ଚାକିରିରେ ଅବସ୍ଥାପିତ ହୋଇ ଏସପିଙ୍କ ସ୍ପେଶାଲ ସେଲ୍ ରେ ନିୟୋଜିତ ହୋଇଥିଲେ । ଏହି ସୁଯୋଗ ତାଙ୍କୁ ଆହୁରି ମାଲେମାଲ କରିଥିଲା । ତାଙ୍କର ଏହି ତଥାକଥିତ ବଟି ଟଙ୍କାରେ ଉପରିସ୍ଥ ଅଧିକାରୀଙ୍କ ଭାଗ ଥିବା ଚର୍ଚ୍ଚା ହେଉଛି ।
