ଭୁବନେଶ୍ୱର: ମମିତା ମେହେର ହତ୍ୟା ମାମଲାକୁ ନେଇ ଏବେ ସାରା ରାଜ୍ୟ ଉଠୁଛି, ପଡୁଛି । ନୈତିକତା ଦୃଷ୍ଟିରୁ ମନ୍ତ୍ରୀ ଦିବ୍ୟଶଙ୍କର ମିଶ୍ର ନିଜଆଡୁ ଇସ୍ତଫା ଦେଉନାହାନ୍ତି କି ମୁଖ୍ୟମନ୍ତ୍ରୀ ତାଙ୍କୁ ବହିଷ୍କାର କରୁନାହାନ୍ତି । ଏହାକୁ ନେଇ ବିଜେପି ଓ କଂଗ୍ରେସର ଆନ୍ଦୋଳନ ଦିନକୁ ଦିନ ତୀବ୍ର ହେବାରେ ଲାଗିଲାଣି । ଆଜି ରାଜଧାନୀରେ ଛାତ୍ର କଂଗ୍ରେସ ପକ୍ଷରୁ ନବୀନ ନିବାସ ଘେରାଉ ଉଦ୍ୟମ ବେଳେ ପ୍ରବଳ ହଙ୍ଗାମା ହୋଇଛି । ସେପଟେ ରାଜ୍ୟ ବିଜେପିର ଉଚ୍ଚସ୍ତରୀୟ ପ୍ରତିନିଧି ଦଳ ଆଜି ମମିତାଙ୍କ ପରିବାରକୁ ଭେଟିଥିବା ବେଳେ ଦିଲ୍ଲୀରେ ପ୍ରେସମିଟ୍ କରିଛନ୍ତି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର । ମାମଲାର ଅନୁଧ୍ୟାନ ପାଇଁ ଏକ ତିନି ଜଣିଆ କେନ୍ଦ୍ରୀୟ ଟିମ୍ ଓଡ଼ିଶା ଆସୁଛନ୍ତି ।
ପୂର୍ବ ନିଷ୍ପତ୍ତି ଅନୁଯାୟୀ, ଆଜି ନବୀନ ନିବାସ ଘେରାଉ କରିବାକୁ ଛାତ୍ର କଂଗ୍ରେସ ପକ୍ଷରୁ ସଜବାଜ ହୋଇଥିଲା । ଶତାଧିକ ଛାତ୍ର କଂଗ୍ରେସ କର୍ମୀ ଫରେଷ୍ଟ ପାର୍କଠାରୁ ଏକ ରାଲିରେ ନବୀନ ନିବାସ ବାହାରିଥିଲେ । ତେବେ ଶିଶୁଭବନ ଛକଠାରେ ପୁଲିସ ସେମାନଙ୍କୁ ଅଟକାଇବାରୁ ପ୍ରବଳ ଉତ୍ତେଜନା ସୃଷ୍ଟି ହୋଇଥିଲା । କିଛି କର୍ମୀ କର୍ଡନ ଭାଙ୍ଗି ଆଗକୁ ବଢ଼ୁଥିବା ବେଳେ ପୁଲିସ ସହ ଧସ୍ତାଧସ୍ତି ହୋଇଥିଲା । ଉତ୍ତେଜିତ ଛାତ୍ର କଂଗ୍ରେସ କର୍ମୀମାନେ ପୁଲିସ ଉପରକୁ ଟମାଟୋ ଓ ଅଣ୍ଡାମାଡ଼ କରିବା ସହ ପୁଲିସ ଗାଡ଼ିକୁ ଟେକା ଫିଙ୍ଗିଥିଲେ । ଫଳରେ ଦୀର୍ଘ ସମୟ ଧରି ସେଠାରେ ଛାତ୍ର କଂଗ୍ରେସ କର୍ମୀ ଏବଂ ପୁଲିସ ମଧ୍ୟରେ ମୁହାଁମୁହିଁ ଲାଗି ରହିଥିଲା । ପରେ ଶତାଧିକ କର୍ମୀଙ୍କୁ ପୁଲିସ ଭ୍ୟାନ୍ ରେ ପୂରାଇ ସେଠାରୁ ନେଇ ଯାଇଥିଲା । ଡିସିପି ଉମାଶଙ୍କର ଦାଶଙ୍କ ସମେତ ଅନ୍ୟ ବରିଷ୍ଠ ପୁଲିସ ଅଧିକାରୀମାନେ ଉପସ୍ଥିତ ରହି ପରିସ୍ଥିତି ନିୟନ୍ତ୍ରଣକୁ ଆଣିଥିଲେ ।
କଟକରେ ମଧ୍ୟ କଂଗ୍ରେସ ପକ୍ଷରୁ ଡିଜିପିଙ୍କ ଅଫିସ ଘେରାଉ ଉଦ୍ୟମ ବେଳେ ଉତ୍ତେଜନା ସୃଷ୍ଟି ହୋଇଥିଲା ।
ସେହିଭଳି ମନ୍ତ୍ରୀ ଦିବ୍ୟଶଙ୍କରଙ୍କ ବହିଷ୍କାର ଓ ଗିରଫ ଦାବିରେ ବିଜେପି ତାର ଅଭିଯାନକୁ ତୀବ୍ର କରିଚାଲିଛି । ଦଳ ପକ୍ଷରୁ ଗତକାଲି ମୟୁରଭଞ୍ଜ ବନ୍ଦ ପାଳନ ହୋଇଥିଲା ବେଳେ ଆଜି ସମ୍ବଲପୁର ବନ୍ଦ ପାଳନ କରାଯାଇଥିଲା । ପୁରୀ ବଡ଼ଦାଣ୍ଡରେ ମହିଳା ମୋର୍ଚ୍ଚା କର୍ମୀମାନେ ପ୍ରତିବାଦ ରାଲି କରି ଦିବ୍ୟଶଙ୍କର ମିଶ୍ରଙ୍କ ବହିଷ୍କାର, ଗିରଫ ଓ ସିବିଆଇ ତଦନ୍ତ ଦାବି କରିଥିଲେ ।
